Failauga 3:1-22
3 E iai le taimi e atofaina mo mea uma,O le taimi mo mea uma e tutupu i lalo o le lagi:
2 O le taimi e fanau mai ai ma le taimi e oti ai;O le taimi e totō ai ma le taimi e liaʻiina ai mea na totō;
3 O le taimi e fasioti ai ma le taimi e toe malosi ai;O le taimi e lepeti ai ma le taimi e toe fausia ai;
4 O le taimi e tagi ai ma le taimi e ʻataʻata ai;O le taimi e tagitu‘i ai ma le taimi e siva ai;*
5 O le taimi e lafoaʻi ese ai maa ma le taimi e toe faaputu ai maa;O le taimi e fusifusi ai ma le taimi e lē fusifusi ai;
6 O le taimi e saʻili ai ma le taimi e tuu ai ua leiloa;O le taimi e tausi ai ma le taimi e lafoaʻi ai;
7 O le taimi e saeia ai+ ma le taimi e su‘i faatasi ai;O le taimi e filemu ai+ ma le taimi e tautala ai;+
8 O le taimi e alofa ai ma le taimi e ʻinoʻino ai;+O le taimi o le taua ma le taimi o le filemu.
9 O ā aogā e maua e le tagata faigaluega mai i ana galuega mamafa uma?+
10 Na ou vaai i galuega na tuuina mai e le Atua i le fanau a tagata, ina ia tele ai a latou mea e fai.
11 Ua ia faia mea uma ina ia matagofie* i lona lava taimi.+ Ua ia tuu fo‘i le faavavau i o latou loto; ae e lē iloa atoatoa e tagata galuega na faia e le Atua moni mai i le amataga e oo i le iʻuga.
12 Ua ou malamalama e leai se mea e sili atu mo i latou, nai lo o le olioli ma faia mea lelei i o latou olaga,+
13 ma ia taʻitasi le tagata ma ʻai ma inu ma fiafia i ana galuega mamafa uma. O le meaalofa lea mai i le Atua.+
14 Ua oo ina ou iloa o mea uma ua faia e le Atua moni, e tumau e faavavau. E leai se mea e faaopoopo i ai ma e leai foʻi se mea e toese mai ai. Ua faia faapea e le Atua moni ina ia matataʻu ai tagata iā te ia.+
15 O le mea ua tupu, sa tupu muamua, ma o le mea o le a oo mai, ua uma ona oo mai;+ ae e sa‘ilia e le Atua moni le mea na tuliloaina.*
16 Na ou iloa foʻi lenei mea i lalo o le lā: O le mea e ao ona iai le faamasinotonu, ua iai le amioleaga, ma o le mea e ao ona iai le amiotonu, ua iai le amioleaga.+
17 Ona ou faapea ifo lea i loʻu loto: “O le a faamasinoina e le Atua moni o lē e amiotonu ma lē e amioleaga,+ auā e iai le taimi mo mea uma e tutupu ma gaoioiga uma.”
18 Ua ou faapea ifo fo‘i i loʻu loto e tusa ai ma le fanau a tagata, o le a tofotofoina i latou e le Atua moni, ma faailoa atu iā i latou ua pei i latou o manu,
19 auā e iai le iʻuga e oo i tagata ma le i‘uga e oo i manu; e tutusa iʻuga e oo iā i latou uma.+ E pei ona mate o le tasi, e faapena foʻi ona oti o le isi; e tasi le agaga* iā i latou uma.+ O lea, e leai se mea e sili ai le tagata i lo o manu, auā e i‘uvale mea uma.
20 E ō uma i latou i le mea e tasi.+ O i latou uma e mai i le efuefu,+ e toe foʻi atu i latou uma i le efuefu.+
21 O ai sē na te iloa pe alu aʻe i luga le agaga* o tagata, ma pe e alu ifo i le eleele le agaga o manu?+
22 Ua ou iloa e leai se mea e sili atu i lo o le fiafia o le tagata i lana galuega,+ auā o lona taui* lea; auā o ai o le a toe aumaia o ia e vaavaai i mea o le a tutupu pe a mavae atu o ia?+
Faamatalaga Pito i Lalo
^ Epe., “osooso ai.”
^ Po o le “maopoopo; talafeagai.”
^ Pe atonu “le mea ua mavae.”
^ Po o le “malosi o le ola.”
^ Po o le “malosi o le ola.”
^ Po o le “tofi.”
