Failauga 7:1-29
7 E sili le igoa lelei* nai lo o le suāuu lelei,+ e sili foʻi le aso e oti ai nai lo o le aso e fanau mai ai.
2 E sili le alu i le fale o iai le faavauvau nai lo o le alu i le fale o fai ai le faigaʻai,+ auā o le iʻuga lea o tagata uma, ma e ao ona manatunatu i ai loto o ē o loo ola.
3 E sili le puapuagatia nai lo o le ʻataʻata,+ auā o foliga faanoanoa e lelei ai le loto.+
4 O le loto o lē e atamai ua i le fale o iai le faavauvau, a o le loto o lē e valea ua i le fale o iai le fiafia.*+
5 E sili ona faalogo i le aʻoaʻiga a se tasi e atamai,+ nai lo o le faalogo i le pese a ē e valelea.
6 Auā e pei o le gapāpā o vao tuitui o loo mumū i lalo o le ulo, e faapena le ʻata a le tagata valea;+ ma e i‘uvale foʻi lea mea.
7 Ae o sauāga e mafai ona faalētonu ai le mafaufau o le tagata atamai, ma o se foa‘i faaalatua e mafai ona ʻolegia ai le loto.+
8 E sili ona lelei le faaiʻuga o se mataupu nai lo o lona amataga. E sili le onosaʻi nai lo o le iai o se agaga fiasili.+
9 Aua neʻi vave ona tigā lou loto,+ auā o ē e vālea o i latou ia e tigā o latou loto.*+
10 Aua le faapea ane, “Aiseā na sili ai ona lelei aso ua mavae nai lo o nei aso?” auā e lē o le atamai ua e fesili ai i lenei mea.+
11 E lelei le atamai faatasi ma le tofi, ma e aogā iā i latou o loo vāai i le malamalama o le ao.*
12 Auā ua fai le atamai ma puipuiga+ e pei ona fai tupe ma puipuiga,+ a o le aogā lenei o le poto: E faaolaina e le atamai i latou ua mauaina.+
13 Ia manatunatu i le galuega a le Atua moni, auā o ai e mafai ona toe faasaʻoina mea ua faapiʻoina e ia?+
14 I le aso lelei, ia e faaalia le agalelei,+ ae i le aso o le malaia, ia e iloa ua faia e le Atua lea aso e pei o le isi aso,+ ina ia lē mautinoa ai* e tagata mea o le a tutupu iā i latou i le lumana‘i.+
15 Ua ou vaai i mea uma a o faagasolo lo‘u olaga puupuu,*+ mai i le tagata amiotonu ua oti i lana amiotonu,+ e oo i le tagata amioleaga ua umi lona ola e ui i ana amioga leaga.+
16 Aua e te fia amiotonu naʻuā+ pe faaalialia fo‘i le tele o lou atamai.+ Aiseā e te faapogaia ai le faafanoina o oe lava?+
17 Aua e te amioleaga naʻuā pe valea foʻi.+ Aiseā o le a e oti ai a o leʻi taitai lou olaga?+
18 E sili ona lelei ona tausia o le tasi lapata‘iga e aunoa ma le lafoaʻia o le isi;+ auā o lē e mataʻu i le Atua e na te utagia ia lapata‘iga uma.
19 O le atamai e sili ai ona malosi le tagata atamai nai lo o tagata malolosi e toʻasefulu i se aai.+
20 Auā e leai se tagata e amiotonu i le lalolagi e na te faia le mea lelei i taimi uma ma e lē agasala.+
21 Aua e te teuina i lou loto upu uma e tautatala ai tagata;+ neʻi e faalogo o loo faia e lau auauna ni tala leaga e faatatau iā te oe;*
22 auā ua iloa lelei e lou loto e oo foʻi iā te oe, e tele taimi ua e faia ai tala leaga e faatatau i isi.+
23 Ua ou tofotofo ma le atamai i ia mea uma, ma ua ou faapea ane: “O le a ou atamai.” Ae ua faigatā tele mo aʻu.
24 Po o le ā lava le mea ua tupu, e mamao lava ma e matuā loloto. O ai se tasi e mafai ona malamalama i ai?+
25 Na faasaga loʻu loto ina ia iloa, ia suʻesuʻe ma saʻili i le atamai ma le uiga o mea, ma malamalama i le leaga o le valea ma le faavalevalea o amioga valea.+
26 Ona ou iloa lea o lenei mea: E sili ona tigā i lo o le oti, o le fafine ua pei o le upega a lē e tuli manu, o lona loto foʻi ua pei o ni upega toso, ma o ona lima ua pei o noanoataga ia. O lē e faafiafiaina le Atua moni e sao mai i le fafine,+ a o le tagata agasala, e puʻea e le fafine.+
27 Ua faapea mai le failauga:+ “Faauta! O le mea lenei ua ou iloa, ua ou suʻesuʻeina lea mea ma lea mea, ina ia faia ai la‘u faaiʻuga,
28 ae o le mea ou te saʻilia pea, ou te leʻi mauaina. Ua ou maua se tane amio sa‘o e toʻatasi mai i tane e toʻaafe, ae ou te leʻi maua se fafine amio saʻo mai i nei tagata uma.
29 E na o le pau lenei o le mea ua ou iloaina: Na faia e le Atua moni tagata ina ia amio sa‘o,+ ae o i latou lava ua latou faia le tele o faufauga.”+
Faamatalaga Pito i Lalo
^ Po o “se talaaga lelei.” Epe., “se igoa.”
^ Po o “taliēega.”
^ Pe atonu “auā o le tigā o le loto, o le faailoga lea o ē e vālea.”
^ E faasino atu i ē o loo feola.
^ Po o le “lē iloa ai.”
^ Po o le “iʻuvale.”
^ Po o le “o loo fetuu oe e lau auauna.”
