Galuega a le ʻAuaposetolo 10:1-48
10 Ua iai i Kaisareia se tagata e igoa iā Konelio, o se taʻitaʻiʻau* o le vaega ua taʻua o le ʻautau* a Italia.
2 Sa tapuaʻi faatasi o ia ma lona aiga atoa i le Atua, ma e masani ona ia avatu le tele o meaalofa i tagata, ma tatalo atu e lē aunoa i le Atua.
3 Pe e tusa o le itula e iva*+ o lenā aso, ua ia vaaia ai i se faaaliga le agelu a le Atua, ua sau iā te ia ma faapea mai: “Konelio e!”
4 Ua pulatoʻa atu Konelio iā te ia, ua fefe ma fesili atu: “O le ā se mea e te finagalo i ai le Alii e?” Ua ia fai mai iā te ia: “Ua oo atu au tatalo ma au meaalofa i luma o le Atua, ma ua ia manatuaina.+
5 O lea, ia e aauina atu nei ni tagata i Iopa, ma aami i le tagata e igoa iā Simona o lē e igoa foʻi iā Peteru.
6 O loo talimālō le tasi Simona, o lē e saunia paʻu o manu, i lenei tagata, ma o lona fale e latalata i le sami.”
7 Ina ua alu ese le agelu na la talanoa, ona ia valaau atu loa lea i ana auauna e toʻalua ma se fitafita e amioatua, mai iā i latou e tautua iā te ia,
8 ma faamatala atu mea uma iā i latou ma aauina atu i latou i Iopa.
9 I le aso na sosoo ai, a o faimalaga pea i latou ma ua latalata atu i le aai, ae ua alu aʻe Peteru i luga o le fale pe tusa o le itula e ono* e tatalo ai.
10 Peitaʻi, ua matelāina o ia i le fia ʻai. A o latou sauniunia meaʻai, ona ia vaaia ai lea o se faaaliga.+
11 Ua ia vaaia le lagi ua matala, ma ua tuutuu ifo ai se mea e pei o se ʻie lino telē i ona pito e fā i le lalolagi;
12 ma ua iai i totonu o lenei mea ituaiga eseese o manu vaefā, o mea fetolofi i le lalolagi, ma manufelelei o le lagi.
13 Ona faapea mai lea o se leo iā te ia: “Peteru e, tū ia i luga, inā fasi ma ʻai!”
14 Ae ua faapea atu Peteru: “E leai, le Alii e, auā ou te leʻi ʻai lava i se mea ua leaga ma lē mamā.”+
15 Ua toe faapea mai le leo iā te ia: “Aua e te toe taʻua e leaga mea ua faamamāina e le Atua.”
16 Ua faatolu ona faalogoina lea leo, ona ave aʻe loa lea o le mea e pei o se ʻie i le lagi.
17 A o popole le loto o Peteru i le uiga o le faaaliga na ia vaaia, ae tutū mai loa i le faitotoʻa o le pā tamāloloa na aauina mai e Konelio e saʻili i le fale o Simona.+
18 Ua latou fesili atu po o api i inā Simona, o lē e igoa foʻi iā Peteru.
19 A o manatunatu pea Peteru i le uiga o le faaaliga, ua faapea mai le agaga:+ “Faauta! e toʻatolu ni tamāloloa o loo saʻili iā te oe.
20 O lea, ia e tulaʻi ma alu ifo i lalo ma ō ma i latou, aua e te masalosalo auā ua ou aauina atu i latou.”
21 Ona alu ifo lea o Peteru i tamāloloa ma faapea atu: “O aʻu lenei o loo outou saʻilia. O le ā le mea ua outou ō mai ai?”
22 Ua latou faapea mai: “O le taʻitaʻiʻau o Konelio,+ o se tagata amiotonu ma e mataʻu i le Atua, e taʻuleleia foʻi i le nuu atoa o Iutaia. Na auina mai e le Atua se agelu paia, ma faatonuina o ia ina ia aami oe e te alu atu i lona fale ma faalogo i mea e te fai atu ai.”
23 Ona ia valaaulia lea o i latou i totonu ma talimālō iā i latou.
Ua tulaʻi o ia i le aso e sosoo ai, ua ō ma i latou. Ua ō faatasi foʻi ma ia nisi o le ʻauuso mai i Iopa.
24 Ona taunuu lea o ia i le aso e sosoo ai i Kaisareia. O loo faatalitalia i latou e Konelio, ma ua faapotopoto faatasi lona ʻauaiga ma ana uō mamae.
25 A o ulufale atu Peteru, ona faafeiloaʻi lea o ia e Konelio, ua faapaʻū i ona vae ma ifo atu iā te ia.
26 Ae ua faatū o ia i luga e Peteru ma faapea atu: “Tū ia i luga, ua na o aʻu foʻi o se tagata.”+
27 A o la talanoa, ua alu atu o ia i totonu ma iloa ai le toʻatele o tagata o loo faapotopoto ai.
28 Ua fai atu o ia iā i latou: “Ua outou iloa lelei e sā i le tulafono, ona faifaimea faatasi pe asiasi atu se Iutaia i se tagata o se isi atunuu.+ Ae ui i lea, ua faailoa mai e le Atua iā te aʻu, e lē tatau ona ou taʻua se tasi e leaga pe e lē mamā.+
29 O lea ua ou sau ai ma loʻu lotomalie, ina ua aami atu aʻu. O le mea lea ou te fesili atu ai: Aiseā na outou aami atu ai aʻu?”
30 Ona faapea mai lea o Konelio: “E tusa ma le fā aso ua mavae, i lenei lava itula, o le itula lea e iva,* na ou tatalo ai i loʻu fale, ona faafuaseʻi lea ona tū mai i oʻu luma o se tagata o loo ofu i ofu pupula.
31 Na ia faapea mai: ‘Konelio e, ua faafofogaina lau tatalo ma ua manatua e le Atua au meaalofa.
32 O lea, ia aauina atu ni tagata i Iopa ma aami iā Simona, o lē e igoa foʻi iā Peteru. O loo talimālō ai Simona, o lē e saunia paʻu o manu, i lenei tagata, ma o lona fale e latalata i le sami.’+
33 O le mea lea na ou aami vave atu ai oe, ma ua lelei ua e sau i inei. O lea ua matou iai uma i inei i luma o le Atua, ina ia faalogologo i mea uma na poloaʻi atu ai Ieova* iā te oe e te fai mai ai.”
34 Ona faapea atu lea o Peteru: “O lea la ua ou malamalama nei, e lē faailoga tagata le Atua,+
35 ae o lē e mataʻu iā te ia i nuu uma lava ma faia le mea ua tonu, e talia e ia.+
36 Ua ia auina atu le upu i le fanauga a Isaraelu, ina ia faailoa atu iā i latou le tala lelei o le filemu+ e ala iā Iesu Keriso, o ia lenei o le Alii o tagata uma.+
37 Ua outou iloa le mataupu na talanoaina i Iutaia atoa e amata mai i Kalilaia,+ ina ua uma le papatisoga na talaʻi e Ioane.
38 O lenei mataupu e faatatau iā Iesu mai i Nasareta, o lē na faauuina e le Atua i le agaga paia+ ma le mana, na femaliua‘i o ia i le nuu ma faia galuega lelei, ma faamālōlō i latou uma sa mafatia ona o le Tiapolo,+ auā sa faatasi le Atua ma ia.+
39 O matou foʻi o molimau i mea uma na ia faia i le nuu o Iutaia ma Ierusalema, ae na latou fasiotia o ia i le faatautauina i le laau.
40 O ia lenei na toe faatūina e le Atua i le aso lona tolu,+ ma mafai ai ona faailoa atu o ia,
41 e lē i tagata uma, a o molimau o ē na tofia muamua e le Atua, o i matou nei o ē na aai ma feinu faatasi ma ia, ina ua mavae lona toetū mai i le oti.+
42 Na ia faatonuina foʻi i matou e talaʻi atu i tagata ma molimau māeʻaeʻa+ e faapea, o ia lenei ua tofia e le Atua e fai ma faamasino o ē ola ma ē oti.+
43 O ia lea na molimau ai perofeta uma+ e faapea, o i latou uma e faatuatua iā te ia, e faamagaloina a latou agasala e ala i lona suafa.”+
44 A o talanoa atu pea Peteru e uiga i nei mea, ona liligi ifo lea o le agaga paia iā i latou uma o loo faalogologo i le upu.+
45 Ona matuā taufaiofo ai lea o ē e talitonu* ua peritomeina, o ē na ō mai faatasi ma Peteru, auā ua liligi ifo foʻi le meaalofa foaʻifua o le agaga paia i tagata o nuu ese.
46 Ua latou faalogo foʻi ua latou tautatala i gagana eseese ma vivii atu i le Atua.+ Ona faapea atu lea o Peteru:
47 “Pe e mafai e se tasi ona taofia i latou nei o ē ua maua le agaga paia e pei o i tatou, mai i le papatisoina i le vai?”+
48 Ona ia faatonuina loa lea ina ia papatisoina i latou i le suafa o Iesu Keriso.+ Ua latou talosaga atu foʻi iā te ia ina ia latou nonofo mo ni nai aso.
Faamatalaga Pito i Lalo
^ O se tasi e taʻitaʻia ni fitafita e toʻa 100.
^ O se vaega o le ʻautau a Roma e iai fitafita e toʻa 600.
^ E faasino atu i le pe ā o le 3 i le afiafi.
^ E faasino atu i le pe ā o le 12 i le aoauli.
^ E faasino atu i le pe ā o le 3 i le afiafi.
^ Po o “ē e faamaoni.”
