Galuega a le ʻAuaposetolo 16:1-40
16 Ua taunuu o ia i Teipe atoa foʻi ma Lusa.+ O loo iai i inā le soo e igoa iā Timoteo,+ o le tama a se fafine Iutaia e talitonu, ae o le Eleni lona tamā,
2 ma ua taʻuleleia o ia e uso i Lusa ma Ikonio.
3 Ua faailoa atu e Paulo lona manaʻo ina ia la ō faatasi ma Timoteo, ona ia ave lea o ia e peritome ona o tagata Iutaia i na nofoaga,+ auā ua latou iloa uma o le Eleni lona tamā.
4 A o latou ō atu i aai, ua latou tuuina atu iā i latou i inā o poloaʻiga na faia e le ʻauaposetolo ma toeaina i Ierusalema,+ ina ia latou tausia.
5 O le mea lea, ua faaauau ai ona faamalosia le faatuatua o faapotopotoga, ma faatuputeleina ai mai i lea aso i lea aso.
6 Ua latou ui atu foʻi i Ferukia ma le atunuu o Kalatia,+ auā ua faasā i latou e le agaga paia ona talaʻi atu le upu i le itumalo o Asia.
7 Ina ua ō ifo foʻi i Musia, ua latou taumafai e ō atu i Pitunia,+ ae e leʻi faatagaina i latou e Iesu e ala i le agaga.
8 O lea, ua latou pasia ai Musia ma ō ifo i Teroa.
9 Ua maua e Paulo se faaaliga i le pō, o loo tū se tamāloa Maketonia ma ʻaiʻoi ane iā te ia: “Ia e sau i Maketonia e fesoasoani mai iā i matou.”
10 Ina ua uma ona ia vaaia le faaaliga, ona matou sauni lea e ō i Maketonia. Ua matou manatu ua faatonuina i matou e le Atua e folafola atu le tala lelei iā i latou.
11 O lea, ua matou folau saʻo atu ai mai i Teroa e agaʻi atu i Samotake, ona matou ō atu lea i Neapoli i le aso e sosoo ai;
12 ona matou tuua lea o i inā ma agaʻi atu i Filipi,+ o se kolone o Roma, o le laumua lea o le itumalo o Maketonia. Na matou nonofo pea i lenei aai mo ni nai aso.
13 Ua oo i le Sapati, ona matou ō atu lea i tua o le pā i autafa o se vaitafe, lea ua matou manatu o se nofoaga e fai ai tatalo, ma ua matou nonofo i lalo ma talanoa atu i fafine ua potopoto ai i inā.
14 E iai se fafine e igoa iā Litia mai i le aai o Tuatira,+ o sē e faatauina atu ʻie violē, ma o sē e tapuaʻi i le Atua; ua faalogo mai o ia iā i matou. Ua tatala e Ieova* lona loto e talia mea ua fai atu ai Paulo.
15 Ina ua papatisoina o ia ma lona aiga,+ ona augani mai lea o ia: “Afai e tou te manatu ua ou faamaoni iā Ieova,* ia ō mai e nonofo i loʻu fale.” O lona tauanau mai ua matou ō atu ai.
16 A o matou agaʻi atu i le mea e fai ai tatalo, ona matou fetaui ai lea ma se auauna teine ua iai se agaga, o se temoni e vavalo.+ Ua maua e ona matai le tele o polofiti e ala i lona faia o valovaloga.
17 Ua mulimuli solo mai lenei teine iā Paulo ma i matou, ma ua alaga e faapea: “O nei tane o pologa a le Atua Silisili Ese,+ ma o loo folafolaina atu iā te outou le ala i le faaolataga.”
18 Ua ia faia lenei mea mo le tele o aso. Ua oo ina fiu Paulo ma ua liliu atu ma faapea atu i le agaga: “Ou te faatonuina oe i le suafa o Iesu Keriso, inā alu ia i fafo mai iā te ia.” Ona alu ai loa lea o ia i fafo i lea lava taimi.+
19 Ina ua iloa e ona matai ua leai se faamoemoe e latou te toe maua ai ni polofiti,+ ona latou puʻea loa lea o Paulo ma Sila ma fetoso i laʻua i le maketi i taʻitaʻi.+
20 Ua latou avatu i laʻua i alii faamasino ma faapea atu: “Ua matuā faalavelave mai nei tagata i lo tatou aai.+ O i laʻua o ni Iutaia,
21 ma ua la folafola atu tū e faasā ona tatou talia pe faia foʻi, ona o i tatou o ni tagata Roma.”
22 Ona tetee atu lea o le motu o tagata iā i laʻua. Ina ua uma ona saei ese e alii faamasino o la ofu, ona faatonuina lea e sasa i laʻua i laau.+
23 Ina ua uma ona latou matuā sasaina i laʻua, ona latou tuu atu lea o i laʻua i le falepuipui, ma faatonu le leoleo o le falepuipui ina ia matuā vaavaai lelei i laʻua.+
24 Ona o lenei faatonuga, ua ia tuu ai i laʻua i le potu pito i totonu o le falepuipui, ma faamau o la vae i laau faamau.
25 Ae pe ā o le vaeluapō, ua tatalo ai Paulo ma Sila ma usu viiga i le Atua,+ ma ua faalogo foʻi i ai isi pagota.
26 Ona faafuaseʻi lea ona lūlū se mafuiʻe malosi, ma ua lūlūina ai faavae o le falepuipui. Ua matalatala ai foʻi faitotoʻa uma, ma mamulu ai mea ua saisaitia ai i latou uma.+
27 Ona ala lea o le leoleo o le falepuipui, ma iloa ai ua matalatala faitotoʻa. Ua seʻi aʻe lana pelu o le a pule i lona ola, auā ua manatu ua sosola pagota.+
28 Peitaʻi, ua alaga atu Paulo e faapea: “Aua neʻi e faia lenā mea iā te oe, o loo matou iai uma lava i inei!”
29 Ua fai atu le leoleo e aumai ni molī ma ua tamoʻe mai i totonu, ua gatete o ia ma faapaʻū atu i luma o Paulo ma Sila.
30 Ua ia aumaia i laʻua i fafo ma faapea mai: “Lua susuga e, o le ā se mea e ao ona ou faia ina ia faaolaina ai aʻu?”
31 Ua la tali atu: “Ia e talitonu i le Alii o Iesu, ona faaolaina ai lea o oe ma lou aiga.”+
32 Ona la taʻu atu lea o le afioga a Ieova* iā te ia ma lona aiga atoa.
33 Ua ia aveina foʻi i laʻua i lea lava taimi o le pō, ma faamamā o la manuʻa, ona papatisoina ai loa lea o ia ma lona aiga atoa.+
34 Ua ia aumaia i laʻua i lona fale ma laulau atu meaʻai mo i laʻua. Ua matuā olioli o ia ma lona aiga atoa, auā o lea ua ia talitonu i le Atua.
35 Ina ua ao, ona aauina mai lea e alii faamasino o leoleo e faapea mai: “Inā tatala ia na tagata.”
36 Ona taʻu mai lea e le leoleo o le falepuipui a latou upu iā Paulo e faapea: “Ua aauina mai e alii faamasino ia tagata e tatala iā te oulua. O lea, inā ō mai ia, ma ia lua ō ma le filemu.”
37 Ae ua faapea atu Paulo iā i latou: “Na latou sasaina i maʻua i luma o tagata, e ui o i maʻua o tagata Roma e leai se sala,+ ma tuuina i maʻua i le falepuipui. Ae po ua latou mananaʻo ea e tatala faalilolilo i maʻua? E leai! Ia fai i ai e ō mai e tatala i maʻua.”
38 Ua taʻu atu e leoleo nei faamatalaga i alii faamasino, ona fefefe ai lea o i latou ina ua faalogo o ni tagata Roma+ i laʻua.
39 O le mea lea, ua latou ō mai ai ma ʻaiʻoi mai iā i laʻua, ma tatala i laʻua. Ua latou talosaga mai foʻi ina ia la tuua le aai.
40 Peitaʻi, ua la tuua le falepuipui ma ō atu i le fale o Litia; ma ina ua la feiloaʻi atu i le ʻauuso, ua la faalaeiau atu iā i latou,+ ona la ō ai loa lea.
