Galuega a le ʻAuaposetolo 17:1-34
17 Ua malaga atu nei i laʻua e ui atu i Amefipoli ma Apolonia, ma taunuu atu ai i Tesalonia,+ o i inā e iai le sunako o tagata Iutaia.
2 Ua ulufale atu Paulo e tusa ai ma lana masani,+ ma e tolu sapati o fetufaaʻi o ia ma i latou i Tusitusiga Paia,+
3 ua ia faamatala atu ma faamaonia e ala i mea ua tusia, e tatau ona tigāina le Keriso+ ma toe faatūina mai i le oti,+ ma faapea atu: “O le Keriso lenei, o Iesu, o lē ua ou faailoa atu iā te outou.”
4 Ona talitonu ai lea o nisi o i latou ma aufaatasi atu iā Paulo ma Sila,+ ma ua faapena foʻi le toʻatele o tagata Eleni o ē tapuaʻi i le Atua, ma le toʻatele o tamaʻitaʻi tāua.
5 Peitaʻi ane, ua lotoleaga tagata Iutaia,+ ma ua latou faapotopoto mai ni tagata amioleaga o ē e tafafaovale i le maketi, ma ua latou faavevesi le aai. Ua latou osofaʻia le fale o Iasona, ma taumafai e aumai Paulo ma Sila i tagata faatupu vevesi.
6 Ina ua lē maua i laʻua, ona latou fetoso lea o Iasona ma nisi o le ʻauuso i alii pule o le nuu, ma alalaga atu: “O lea ua i inei tagata faatupu vevesi i le lalolagi atoa,+
7 ma ua talimālō Iasona iā i laʻua. Ua tetee atu foʻi nei tagata uma i poloaʻiga a Kaisara ma faapea mai, ua iai se isi tupu, o Iesu lea.”+
8 Ina ua latou faalogo i nei mea, ona matuā atuatuvale ai lea o le motu o tagata ma alii pule o le nuu;
9 ma ina ua lava le tupe na totogi e Iasona ma isi e tatala ai i latou, ona tuu atu lea o i latou e ō.
10 Ina ua pō, ona aauina atu loa lea e le ʻauuso o Paulo ma Sila i Perea, ma ina ua taunuu, ona ō atu ai lea o i laʻua i le sunako o tagata Iutaia.
11 Ua sili atu ona naunau na tagata e suʻesuʻe* nai lo i latou i Tesalonia, auā ua latou taliaina le upu ma le matuā naunau, ma ua latou matuā iloiloina Tusitusiga Paia i aso taʻitasi pe e moni nei mea.
12 Ona talitonu ai lea o le toʻatele o i latou, faapea foʻi le toʻatele o fafine aloaʻia o Eleni ma nisi o tamāloloa Eleni.
13 Ae ina ua iloa e tagata Iutaia mai i Tesalonia ua folafola atu e Paulo le afioga a le Atua i Perea, ona latou ō mai foʻi lea ua faaoso ma faaita le motu o tagata.+
14 Ona auina atu loa lea e le ʻauuso o Paulo ina ia alu atu i tai,+ ae ua nonofo ai pea Sila ma Timoteo i inā.
15 A o ē na momolia Paulo, ua latou ave o ia e oo i Atenai. Ona latou tuua lea o Paulo, ina ua ia poloaʻia i latou e fai atu iā Sila ma Timoteo,+ e vave ō mai iā te ia.
16 A o faatalitali Paulo mo i laʻua i Atenai, ua lē fiafia o ia i le vaai atu i le aai ua tumu i tupua.
17 Ona ia fetufaaʻi lea ma tagata Iutaia i le sunako, ma isi tagata o ē e tapuaʻi i le Atua, ma i latou uma e feiloaʻi i ai i aso uma i le maketi.
18 Ae ua ō mai nisi o le ʻaufaifilosofia a le ʻau Epikuro ma le ʻau Setoiko, ua finau mai iā te ia, ma ua faapea mai nisi: “O le ā le mea e manaʻo lenei tagata tautala soo e taʻu mai?” Ae ua faapea mai isi: “E aliali mai o loo ia folafolaina mai ni atua ese.” Ona talu ai ua ia folafola mai le tala lelei iā Iesu ma le toetū.+
19 Ona latou puʻe lea o ia ma avatu i Areopako* ma faapea mai: “Pe e mafai ona e faamatala mai iā i matou lenei aʻoaʻoga fou o loo e fai mai ai?
20 Auā ua e aʻoaʻoina mai ni mea e ese i la matou faalogo. E matou te fia iloa la, po o ā uiga o nei mea.”
21 O le mea moni, e masani ona faaalu e tagata Atenai ma tagata ese o loo aumau* i inā, lo latou taimi e faamatala ai se mea pe faalogologo foʻi i se mea fou.
22 Ona tū lea o Paulo i le ogatotonu o Areopako+ ma faapea atu:
“Tagata Atenai e, ua ou iloa i mea uma lava, ua sili atu lo outou matataʻu i atua* nai lo o isi tagata.+
23 O se faataʻitaʻiga, a o oʻu savali ane ma vaavaai totoʻa i mea o loo outou faatāuaina,* ua ou iloa ai se fata faitaulaga ua tusia ai ‘Mo le Atua e Lē Iloa.’ O lenei, o ia ua outou tapuaʻi i ai ma le lē iloa, ou te faailoa atu nei iā te outou.
24 O le Atua o lē na faia le lalolagi ma mea uma ua iai, o ia lea o le Alii o le lagi ma le lalolagi,+ e lē afio o ia i malumalu e faia e lima;+
25 e lē o lima foʻi o tagata e auauna ai iā te ia e peiseaʻī ua mativa o ia i se mea,+ auā o ia lava ua foaʻi maia i tagata uma le ola, ma le mānava,+ ma mea uma lava.
26 Na ia faia foʻi nuu uma mai i le tagata e toʻatasi,+ ina ia nonofo i le fogāeleele uma o le lalolagi,+ ma ua ia tofia taimi atofaina ma tuaoi o mea e latou te nonofo ai,+
27 ina ia latou saʻili i le Atua, pe mafai ona latou tautagotago iā te ia ma maua o ia,+ ae o le mea moni, e lē o mamao o ia mai iā i tatou taʻitoʻatasi.
28 Auā o ia ua tatou ola ai, gaoioi ai, ma ua tatou iai foʻi ona o ia, e pei ona taʻua e nisi o a outou tagata fatusolo e faapea, ‘Auā o i tatou foʻi o lana fanau.’
29 “O lea, ona o i tatou o fanau a le Atua,+ e lē tatau ai ona tatou manatu e faatusa le Atua i se auro, po o se siliva, po o se maa, po o se mea foʻi ua faia i le poto ma le atamai o le tagata.+
30 E moni, sa faapalepale le Atua i taimi e leʻi iloa ai e tagata o ia;+ a o le taimi nei, ua ia faatonuina tagata uma lava ina ia salamō.
31 Auā ua ia tofia le aso e faamasinoina+ ai le lalolagi uma i le amiotonu e le tagata ua ia tofia. Na ia toe faatūina lenei tagata mai i le oti, ina ia faamaonia atu ai i tagata uma, e taunuu moni lava lenā aso.”+
32 Ina ua latou faalogo i le toetū mai i le oti, ona tauemu lea o isi,+ ae ua faapea mai isi: “E matou te toe faalogo atu iā te oe i lenei mea i se isi taimi.”
33 Ona alu ese ai lea o Paulo mai iā i latou,
34 ae ua faatasi atu ni tane iā te ia ma ua talitonu ai, e aofia ai Taionusio, o se alii faamasino o le faamasinoga a Areopako, ma se fafine e igoa iā Tamari, atoa foʻi ma isi tagata.
Faamatalaga Pito i Lalo
^ Ele., “Ua sili atu ona mafaufau faatamālii na tagata.”
^ Tagaʻi i le Uiga o Upu.
^ Po o le “asiasi atu.”
^ Po o le “ua sili atu ona outou mapolotu.”
^ Po o le “tapuaʻi i ai.”
