Galuega a le ʻAuaposetolo 19:1-41
19 A o faagasolo aso, a o iai Apolo+ i Korinito, ua malaga atu ai Paulo i vaipanoa i uta ma alu ifo i Efeso.+ O i inā, ua ia maua ai ni soo
2 ma ua ia fai atu iā i latou: “Pe na outou maua le agaga paia ina ua outou talitonu?”+ Ua latou tali mai iā te ia: “E matou te leʻi faalogo lava e faatatau i le agaga paia.”
3 Ona ia fai atu lea: “O le papatisoga la a ai na papatisoina ai outou?” Ua latou fai mai: “O le papatisoga a Ioane.”+
4 Ua fai atu Paulo: “Na papatisoina e Ioane tagata i le papatisoga lea e fai ma faailoga o le salamō,+ ma taʻu atu i tagata ina ia talitonu i lē o loo mulimuli mai,+ o Iesu lea.”
5 Ina ua faalogo i lenei mea, ona papatisoina lea o i latou i le suafa o le Alii o Iesu.
6 Ua faaee atu lima o Paulo iā i latou, ona alu ifo lea o le agaga paia i o latou luga,+ ma latou tautatala ai i gagana eseese ma fai valoaga.+
7 O le aofaʻi o i latou, e tusa ma le toʻa 12 tane.
8 Ua ulu atu o ia i le sunako,+ ma tautala atu ma le lototele mo le tolu masina. Ua lauga atu o ia ma taumafai e faatalitonu i latou e faatatau i le Malo o le Atua.+
9 Ae ina ua matuā mumusu nisi e talitonu,* ma fai upu leaga i Le Ala+ i luma o tagata, ona tuumuli lea o ia mai iā i latou+ ma aveese le ʻausoo, ua lauga atu foʻi o ia i aso uma i le faleaʻoga o Turano.
10 Na faia lenei mea mo tausaga e lua, ma ua faalogo i le upu a le Alii i latou uma o i le itumalo o Asia, e aofia ai tagata Iutaia atoa foʻi ma Eleni.
11 Ua faia pea e le Atua galuega mamana e ala i lima o Paulo,+
12 e oo lava i fasi ʻie ma ofu* na paʻi i lona tino, e ave i tagata mamaʻi,+ ona teʻa ese ai lea o o latou maʻi, ma ō ese mai ai agaga leaga.+
13 A o nisi tagata Iutaia na faimalaga solo e tutuli temoni, ua latou taumafai foʻi e faaaogā le suafa o le Alii o Iesu i ē ua iai agaga leaga; e latou te faapea atu: “Ou te matuā fai atu iā te outou, i le suafa o Iesu, lea o loo talaʻia e Paulo.”+
14 Ua faia foʻi lenei mea e atalii e toʻafitu o Seva, o se faitaulaga sili ma o se tagata Iutaia.
15 Ae ua tali mai le agaga leaga iā i latou: “Ou te iloa Iesu+ ma Paulo;+ a o ai la outou?”
16 Ona oso mai ai lea iā i latou o le tagata ua iai le agaga leaga, ma ua sili atu ona malosi o ia iā i latou uma, ma ua latou toʻilalo ai, ona sosola ese lea o i latou mai i le fale, ua lē lavalavā ma ua manunuʻa.
17 Ua iloa e tagata uma lenei mea, o tagata Iutaia ma tagata Eleni o loo nonofo i Efeso; ona matataʻu ai lea o i latou uma, ma ua faamamaluina ai le suafa o le Alii o Iesu.
18 Ona ō mai lea o le toʻatele o ē ua talitonu, ma taʻutino mai a latou agasala, ma faailoa mai a latou mea sesē.
19 O le mea moni, e toʻatele i latou o ē na faia faiga faaagaga, ua faaputuputu faatasi a latou tusi ma susunu i le afi i luma o tagata uma.+ Ua latou faitauina foʻi le tau ma iloa ai, e tusa ma le 50,000 tupe siliva.
20 O lea, ua matuā tupu tele ai le afioga a Ieova,* ma ua manumalo.+
21 Ua mavae nei mea, ona manatu lea o Paulo, pe a uma ona ui atu i Maketonia+ ma Akaia, ona malaga atu loa lea o ia i Ierusalema.+ Ua ia faapea ifo: “Pe a ou oo i inā, e tatau foʻi ona ou alu i Roma.”+
22 Ona ia aauina atu lea i Maketonia o ni tagata se toʻalua o loo fesoasoani iā te ia, o Timoteo+ ma Erato,+ ae ua nofo pea o ia mo sina taimi i le itumalo o Asia.
23 I lenā taimi, ua tupu ai se vevesi tele+ ona o Le Ala.+
24 Auā ua iai se tagata e igoa iā Temetiu, o lē e faia mea siliva, ua ia faia ni tamaʻi malumalu siliva o Atemisa,* ma ua tele tupe a tufuga ua maua mai ai.+
25 Ua ia faapotopoto i latou ma ē ua galulue i mea faapena, ma faapea atu: “Alii e, ua outou iloa lelei o le pisinisi lenei ua tatou manuia ai.
26 Ae ua outou vāai ma faalogo, ua faatalitonuina e Paulo le toʻatele o tagata i Efeso+ ma toetoe lava o le itumalo atoa o Asia, ma faaliliuina i latou i se isi talitonuga, e ala i le faapea mai e lē o ni atua+ mea ua faia e lima.
27 Ua iai foʻi le lamatiaga auā o le a faaleagaina la tatou galuega, ma faalēaogāina foʻi le malumalu o le atua fafine sili o Atemisa. O le a faalēaogāina lona mamalu, lea o loo tapuaʻia e le itumalo atoa o Asia ma le lalolagi atoa.”
28 Ina ua latou faalogo i lenei mea, ona latou matuā feita ai lea ma alalaga atu: “E silisili lava Atemisa o Efeso!”
29 Ona vevesi ai lea o le aai, ma ua nanati faatasi atu tagata uma i le fale mataaga, ua latou ave faamalosi Kaio ma Aritako+ mai i Maketonia, o ē na femalagaaʻi faatasi ma Paulo.
30 Ua naunau lava Paulo e alu atu i totonu i tagata, ae ua vavao o ia e le ʻausoo.
31 E oo lava i nisi o tagata e faauluulu i ai faafiafiaga ma taaloga, o ē ua fiafia iā te ia, ua latou avatu le feʻau iā te ia e ʻaiʻoi atu ai e aua neʻi alu i le fale mataaga, auā e lamatia ai lona ola.
32 O le mea moni, ua alalaga atu isi i le tasi mea, ae alalaga mai isi i se isi mea; auā ua lē mautonu tagata ua potopoto, ma o le toʻatele o i latou e leʻi iloa le māfuaaga ua latou faapotopoto ai.
33 Ona latou aumaia lea o Alesana mai i le motu o tagata, ma ua tūlei atu o ia i luma e tagata Iutaia, ona talo atu lea o le lima o Alesana e manaʻo e fai atu sana faamatalaga i tagata.
34 Ae ina ua latou iloa o ia o le Iutaia, ona latou alalaga uma mai lea pe e tusa ma le lua itula: “E silisili lava Atemisa o Efeso!”
35 Mulimuli ane, ua faatoʻafilemu e le pulenuu le motu o tagata, ona ia faapea atu lea: “Tagata e, o Efeso, o ai ea se tagata na te lē iloa o le aai o Efeso e leoleoina le malumalu o Atemisa le sili, ma le faatusa na paʻū mai i le lagi?
36 Talu ai e iloa e tagata uma lenei mea, ua tatau ai la ona outou fifilemu ma aua le mateletele.
37 Auā ua outou aumaia nei tagata, e lē o ni faomea o malumalu, ma e lē o ni ē e upuleaga i lo tatou atua fafine.
38 O lea la, afai e iai se tagi a Temetiu+ ma tufuga o loo faatasi ma ia, e iai aso e faia ai faamasinoga ma o loo iai foʻi suikonesula;* ia tuu ai i latou ina ia molia e le tasi le isi.
39 Peitaʻi, afai e ese se mataupu o loo outou saʻilia, ia ave i fono e masani ona fai, e latou te faia le faaiʻuga.
40 Auā ua matuā lamatia i tatou i le ono molia i le fouvale, ona o mea ua tutupu i lenei aso, ma e leai sa tatou faamolemolega e mafai ona fai atu mo nei tagata pisapisaō.”
41 Ina ua uma ona ia fai atu nei mea, ona ia tuu atu lea o tagata e ō.
Faamatalaga Pito i Lalo
^ Po o le “ua lotomaaa pea nisi ma lē talitonu.”
^ Ele., “talieleele.”
^ Po o “Tiana.”
^ O le suikonesula e faasino atu i le kovana a Roma i se itumalo. Tagaʻi i le Uiga o Upu.
