Galuega a le ʻAuaposetolo 2:1-47
2 A o faagasolo le aso o le Tausamiga o le Penetekoso,+ ua faatasitasi i latou uma i le nofoaga e tasi.
2 Ona faafuaseʻi mai lea o le taalili mai i le lagi e pei o le agi o se matagi malosi, ma ua tumu ai le fale atoa lea o loo latou nonofo ai.+
3 Ona latou vaaia ai lea o ni laulaufaiva e pei o le afi, ua salalau atu ma nofo i luga o i latou taʻitoʻatasi,
4 ona faatutumuina ai lea o i latou uma i le agaga paia,+ ma amata ai ona tautatala i gagana eseese, e pei ona faapogaia e le agaga i latou e tautatala ai.+
5 I lenā taimi, sa nonofo i Ierusalema tagata Iutaia e matataʻu i le Atua mai i atunuu uma i lalo o le lagi.+
6 Ina ua faalogoina lenei taalili tele, ona faapotopoto mai ai lea o le motu o tagata e toʻatele ma ua matuā taufaiofo, auā ua taʻitasi ma faalogo atu iā i latou o tautala i lana lava gagana.
7 O le mea moni, ua matuā taufaiofo i latou ma faapea ane: “Seʻi vaai, pe e lē o tagata Kalilaia+ ea i latou uma o loo talanoa mai?
8 E faapefea la ona taʻitasi i tatou ma faalogo atu i lana lava gagana?*
9 O tagata Patia, o tagata Metai,+ o tagata Elama,+ o tagata o loo nonofo i Mesopotamia, i Iutaia ma Kapatokia, i Pono ma le itumalo o Asia,+
10 i Ferukia ma Pafulia, i Aikupito ma vaega o Lipua lea e latalata i Kurene; o tagata Iutaia ma tagata liulotu+ na malaga mai i Roma,
11 o tagata Kereta ma tagata Arapi; ua tatou faalogo atu ua latou tautatala mai i a tatou lava gagana, e uiga i mea matagofie a le Atua.”
12 Ioe, ua matuā ofo i latou uma, ma ua fenuminumiaʻi ma faapea ane le tasi i le isi: “O le ā le uiga o lenei mea?”
13 Peitaʻi, ua tauemu nisi iā i latou ma faapea ane: “Ua onanā i latou i le uaina suamalie.”*
14 Ua tū i luga Peteru faatasi ma le toʻa 11+ ma fai atu iā i latou ma le leotele: “Tagata Iutaia e, ma outou uma o ē o nonofo i Ierusalema, ia outou iloa lenei mea, ma ia faalogologo lelei mai i aʻu upu.
15 O le mea moni, e lē o onanā nei tagata e pei ona outou manatu ai, auā o le itula e tolu lenei o le aso.*
16 Ae o le mea lenei na fai mai ai e ala i le perofeta o Ioelu:
17 ‘Ua fetalai mai le Atua: “O aso e gata ai, ou te liligi ifo ai loʻu agaga i luga o ituaiga uma o tagata, ona fai ai lea e o outou atalii ma o outou afafine o valoaga, e iloa e o outou tauleleʻa faaaliga, e fai foʻi miti a o outou toeaina.+
18 E oo lava foʻi i aʻu tane pologa ma fafine pologa, ou te liligi ifo ai loʻu agaga i na aso, ona latou faia lea o valoaga.+
19 Ou te faia foʻi mea ofoofogia* i le lagi i lugā, ma faailoga i le lalolagi nei, o le toto ma le afi, ma le asu faaniutū.
20 O le a liua le lā i le pōuliuli, e liua foʻi le masina i le toto a o leʻi oo mai le aso tele ma le mataʻina o Ieova.*
21 E faaolaina foʻi i latou uma o ē e valaau i le suafa o Ieova.”’*+
22 “Tagata o Isaraelu e, ia faalogo mai ia i upu nei: O Iesu le Nasareta, o le tagata na faailoa mai e le Atua iā te outou e ala i galuega mamana ma mea ofoofogia,* ma faailoga na faia e le Atua iā te outou e ala iā te ia,+ e pei foʻi ona outou iloa.
23 Na tuuina mai lenei tagata e tusa ma le finagalo malie o* le Atua ma le muaʻi silafia e le Atua o mea,+ ae ua outou tutuʻiina o ia i luga o le laau, ma fasiotia e lima o tagata solitulafono.+
24 Ae ua toe faatūina o ia e le Atua+ e ala i le faasaʻoloto o ia mai i le oti,* auā e lē mafai ona noanoatia pea o ia e le oti.+
25 Auā ua faapea mai Tavita e uiga iā te ia, ‘Ou te tuu Ieova* i oʻu luma e lē aunoa, ou te lē tautevateva foʻi auā o loo iai o ia i loʻu itu taumatau.
26 O le mea lea, ua fiafia ai loʻu loto ma ua olioli tele ai loʻu laulaufaiva. Ou te faatalitali foʻi ma le faamoemoe;
27 auā e te lē tuua aʻu i le Tuugamau,* e te lē tuua foʻi lē ua faamaoni iā te oe ia oo i ai le pala.+
28 Ua e faailoa mai iā te aʻu le ala e tau i le ola; e te faatumuina aʻu i le matuā fiafia i ou luma.’*+
29 “Le ʻauuso e, e taga le saʻoloto e tautala atu iā te outou e faatatau iā Tavita le ulu o le aiga, ua maliu o ia ma ua tanuina,+ o loo iai foʻi lona tuugamau iā i tatou e oo mai lava i le aso nei.
30 Talu ai o ia o se perofeta, ma na ia iloa na tautō le Atua iā te ia i se tautoga e faapea, o le a ia faanofo se tasi o lana fanau* i lona nofoālii,+
31 na ia muaʻi iloa ma faapea mai e faatatau i le toetū o le Keriso, e lē tuua o ia i le Tuugamau,* e lē oo foʻi le pala i lona tino.+
32 O Iesu lenei na toe faatūina e le Atua, o le mea foʻi lea na matou molimau uma i ai.+
33 O lea la, talu ai ua faaeaina o ia i le itu taumatau o le Atua,+ ma maua le agaga paia na folafolaina mai e le Tamā,+ ua ia liligi ifo ai lenei mea ua outou vāai ma faalogo i ai.
34 Auā e leʻi alu aʻe Tavita i le lagi, ae na faapea mai o ia, ‘Ua fetalai ane Ieova* i loʻu Alii: “Ia e nofo i loʻu itu taumatau,
35 seʻia ou faia ou fili ma mea e tū ai ou vae.”’+
36 O le mea lea, ia iloa lelei e le aiga uma o Isaraelu, ua faia o ia e le Atua e avea ma Alii+ ma Keriso, o Iesu lenei na outou tutuʻia i luga o le laau.”+
37 Ina ua latou faalogo i lenei mea, ona tuia lea o o latou loto, ma fai mai iā Peteru ma isi aposetolo: “Le ʻauuso e, o le ā se mea e ao ona matou faia?”
38 Ua fai atu Peteru iā i latou: “Inā salamō+ ia ma ia taʻitasi ma papatisoina+ outou i le suafa o Iesu Keriso mo le faamagaloina o a outou agasala,+ ona outou maua lea o le meaalofa foaʻifua o le agaga paia.
39 Auā o le folafolaga+ e mo outou ma a outou fanau, atoa ma i latou uma o i nuu mamao, o ē uma ua valaaulia e Ieova* lo tatou Atua iā te ia.”+
40 E tele foʻi isi upu na ia molimau māeʻaeʻa atu ai ma apoapoaʻi atu pea iā i latou e faapea: “Ia faaolaina outou mai i lenei tupulaga faapiʻopiʻo.”+
41 O lea, ua papatisoina+ ai i latou uma na talia ma le fiafia lana upu, ma i lenā aso, pe tusa ma le 3,000 tagata ua faaopoopo atu.+
42 Ua faaauau ona latou uaʻi atu i aʻoaʻoga a le ʻauaposetolo, faifaimea faatasi,* aai faatasi+ ma tatalo.+
43 O le mea moni, ua amata ona matataʻu tagata uma, ma ua tutupu foʻi le tele o mea ofoofogia* ma faailoga e ala mai i aposetolo.+
44 Ona faapotopoto faatasi lea o na soo fou uma, ma fetufaa‘i mea uma na iai iā i latou,
45 ma ua faatau atu a latou meatotino,+ ma fanua, ma tufatufa atu le tau o nei mea i tagata uma, e tusa ai ma manaʻoga o tagata taʻitoʻatasi.+
46 Ua iai pea i latou ma le lotogatasi i le malumalu i lea aso ma lea aso, ma ua latou ave a latou meaʻai i fale o aiga eseese, ma fetufaa‘i a latou meaʻai ma le olioli tele ma le lotomamā,
47 ua vivii i le Atua ma ua alofagia i latou e tagata uma. I le taimi lava e tasi, ua faaopoopo atu pea e Ieova* iā i latou i aso taʻitasi o ē ua faaolaina.+
Faamatalaga Pito i Lalo
^ Po o le “gagana na fanau mai ai?”
^ Po o le “uaina fou.”
^ E faasino atu i le pe ā o le 9 i le taeao.
^ Po o “vavega.”
^ Po o “vavega.”
^ Po o le “tusa ma le faaiʻuga a.”
^ Ele., “mai i tigā o le oti.” Pe atonu “mai i noanoataga o le oti.”
^ Po o “i Heitisi.” Tagaʻi i le Uiga o Upu.
^ Po o le “i luma o ou fofoga.”
^ Ele., “se tasi o lana fanau mai i lona manava.”
^ Po o “i Heitisi.” Tagaʻi i le Uiga o Upu.
^ Po o le “fetufaaʻi a latou mea.”
^ Po o “vavega.”
