Galuega a le ʻAuaposetolo 22:1-30
22 “Alii e, uso ma tamā, ia outou faafofoga mai i laʻu tali atu iā te outou.”+
2 O lea, ina ua latou faalogo o loo tautala atu o ia i le gagana Eperu, ona atili fifilemu ai lea o i latou, ma ua ia faapea atu:
3 “O aʻu o le Iutaia,+ na ou fanau i Taso i Kilikia,+ ae na aʻoaʻoina aʻu e Kamalielu+ i le aai lenei, ina ia matuā tausi i le Tulafono a o tatou augātamā,+ ma ua ou maelega foʻi i galuega a le Atua e pei lava o outou uma i lenei aso.+
4 Na ou faasauā i ē na mulimuli i lenei Ala, tuuina atu i latou ina ia fasiotia, ma na ou saisaia tane ma fafine ma tuuina atu i le falepuipui,+
5 e pei lava ona molimau i ai le ositaulaga sili ma toeaina uma o le fono. Na ou maua mai foʻi iā i latou tusi ina ia mafai ai ona saisaia uso i Tamaseko, ma na ou alu atu foʻi e puʻe i latou o loo iai i inā ma aumai i Ierusalema ina ia faasalaina ai.
6 “Peitaʻi, a o oʻu malaga atu e latalata i Tamaseko pe tusa o le tutonu o le lā, ona faafuaseʻi lea ona susulu mai o se malamalama tele mai i le lagi iā te aʻu,+
7 ona ou paʻū lea i le eleele ma faalogoina se leo ua faapea mai iā te aʻu: ‘Saulo, Saulo e, aiseā ua e faasauā mai ai iā te aʻu?’
8 Ona ou tali atu lea: ‘O ai ea oe le Alii e?’ Ua ia faapea mai iā te aʻu: ‘O aʻu o Iesu le Nasareta, o lē ua e faasauā i ai.’
9 E leʻi lagona e tamāloloa na matou faatasi le leo o lē ua tautala mai iā te aʻu, ae e na o le malamalama ua latou vaaia.
10 Ona ou faapea atu lea: ‘O le ā se mea ou te faia le Alii e?’ Ua fetalai mai le Alii iā te aʻu: ‘Tū ia i luga ma alu atu i Tamaseko, e faailoa atu iā te oe i inā mea uma e tatau ona e faia.’+
11 Talu ai ua ou lē iloa se mea ona o le susulu malosi o le malamalama, o lea, na ou taunuu i Tamaseko e ala i le taʻitaʻiina o aʻu e i latou o ē sa matou faatasi.
12 “Ua iai se tagata e igoa iā Anania, e mataʻu i le Atua ma tausi i le Tulafono, ua taʻuleleia o ia e tagata Iutaia uma o loo nonofo ai i inā,
13 ua sau o ia iā te aʻu ma tū i oʻu tafatafa, ua faapea mai: ‘Loʻu uso e, Saulo, ia e toe vaai!’ I lenā lava taimi, ua ou tepa aʻe ai ma ou iloa atu o ia.+
14 Ua ia faapea mai: ‘Ua filifilia oe e le Atua o o tatou augātamā, ina ia e iloa lona finagalo ma vaai i lē e amiotonu,+ ma faalogo i lona siʻufofoga,
15 auā e fai oe ma molimau iā te ia i tagata uma lava, e faatatau i mea ua e vaai ma faalogo i ai.+
16 O lenei, aiseā e te faatuai ai? Inā tū ia i luga, ma ia papatisoina oe, ma ia faamamā ese au agasala+ i lou valaau i lona suafa.’+
17 “Ae ina ua ou toe foʻi i Ierusalema+ ma tatalo i le malumalu, na ou vaaia ai se faaaliga
18 ma iloa atu le Alii o loo fetalai mai iā te aʻu: ‘Ia e alu ese faatopetope mai i Ierusalema, auā e latou te lē talia lau molimau iā te aʻu.’+
19 Ona ou fai atu lea: ‘Le Alii e, ua latou iloa lelei sa masani ona ou tuuina atu ē ua talitonu iā te oe i falepuipui, ma sasa i latou i lea sunako ma lea sunako;+
20 ma ina ua faamasaaina le toto o Setefano lau molimau, na ou tū ai i inā ma sa ou ioe foʻi i ai. Na ou leoleoina ofu o i latou na fasiotia o ia.’+
21 Ae ua fetalai mai o ia iā te aʻu: ‘Inā alu ia, auā ou te auina atu oe i nuu mamao.’”+
22 Ua latou faalogo atu pea iā te ia seʻia oo ina ia faia o lenei upu. Ona latou alalaga lea ma faapea mai: “Inā fasioti ia lenei tagata, auā e lē tatau ona ola o ia!”
23 Talu ai ua latou feʻei ma lafo solo o latou ofu tele, ma asu aʻe i luga le pefu,+
24 ona faatonu atu lea e le alii e pule i ʻau, e aumai Paulo i nofoaga o fitafita, ma faapea atu ia sasaina i le taimi e suʻesuʻe ai o ia, ina ia iloa lelei ai le māfuaaga ua feʻei ai faapenei tagata iā te ia.
25 Ae ina ua latou saisaia o ia o le a sasa, ona fai atu lea o Paulo i le taʻitaʻiʻau o loo tū ai i inā: “Pe tusa ma le tulafono, lo outou sasaina o se tagata Roma* ae e leai sana sala?”*+
26 Ina ua faalogo i ai le taʻitaʻiʻau, ona alu atu lea o ia i le alii e pule i ʻau ma faapea atu: “O le ā le mea e te manaʻo e fai? Auā o lenei tagata o se tagata Roma.”
27 Ona sau lea o le alii e pule i ʻau ma faapea mai iā te ia: “Seʻi e taʻu mai iā te aʻu po o oe o se tagata Roma?” Ua tali atu o ia: “O lea lava.”
28 Ona fai mai lea o le alii e pule i ʻau: “E tele aʻu tupe na alu e faatau mai ai loʻu sitiseni.” Ae ua fai atu Paulo: “Ae o aʻu, na ou fanau mai ai.”+
29 Ona ō ese loa lea o tagata na tuu e suʻesuʻeina ma le sauā o ia; ma ua fefe foʻi le alii e pule i ʻau ina ua iloa, o Paulo o se tagata Roma ae ua ia saisaia o ia i filifili.+
30 O lea, i le aso na sosoo ai, na ia tatalaina ai o ia ma faatonuina le ʻaufaitaulaga sili ma le Faamasinoga Sili e faapotopoto faatasi, ona o lona fia iloa o le māfuaaga tonu ua molia ai o ia e tagata Iutaia. Ona ia ave ifo lea o Paulo ma faatū o ia i o latou luma.+
