Galuega a le ʻAuaposetolo 26:1-32
26 Ua fai mai Akeripa+ iā Paulo: “E tuu atu lava iā te oe e te tautala mai mo oe.” Ona faaloaloa atu lea o le lima o Paulo, ma tali atu:
2 “Akeripa e le tupu, ua ou matuā fiafia ona o loo oʻu tali atu i ou luma i lenei aso, e tusa ma mea ua molia ai aʻu e tagata Iutaia,+
3 aemaise lava ua e silafia lelei tū ma aganuu a tagata Iutaia, ma mataupu e fefinauaʻi ai. O le mea lea, ou te ʻaiʻoi atu ai ina ia e faafofoga mai iā te aʻu, ma ia e lava papale mai.
4 “O le mea moni, ua iloa lelei e tagata Iutaia uma loʻu olaga mai lava a o oʻu talavou,+ a o ou nofo i loʻu nuu ma Ierusalema.
5 Na latou masani iā te aʻu i aso ua mavae, ma afai e latou te mananaʻo ai, e mafai ona latou molimau atu, sa avea aʻu o se Faresaio,+ o le lotu e sili ona faigatā.+
6 Peitaʻi, ua faamasinoina aʻu i le asō, ona o le faamoemoe i le folafolaga na faia e le Atua i o tatou augātamā;+
7 o le folafolaga lava lenei o loo faamoemoe o tatou ituaiga e 12 e vāai i lona faataunuuga, e ala i lo latou filigā i le auaunaga paia iā te ia i le ao ma le pō. Le tupu e, o le faamoemoe lea ua molia ai aʻu e tagata Iutaia.+
8 “Aiseā e faigatā ai ona outou talitonu ua faatūina e le Atua tagata mai i le oti?
9 Na ou talitonu foʻi e tatau ona ou faia le tele o mea e tetee atu ai i le igoa o Iesu le Nasareta.
10 O le mea tonu lava lenā sa ou faia i Ierusalema, ma na ou lokaina le toʻatele o le ʻaupaia i falepuipui,+ ina ua ou maua le pule mai i le ʻaufaitaulaga sili,+ ma sa ou lagolagoina foʻi le faasalaina o i latou i le oti.
11 Na ou taumafai e faamalosia i latou ia lafoaʻia lo latou faatuatua, e ala i le faasalaina e lē aunoa o i latou i sunako uma. O loʻu ita tele foʻi iā i latou, na ou alu atu ai ma faasauā iā i latou e oo lava i isi aai.
12 “A o oʻu faia nei mea, i le taimi na ou malaga atu ai i Tamaseko ma le pule ma le faatonuga mai i le ʻaufaitaulaga sili,
13 le tupu e, na ou vaaia ai i le auala, i le tutonu o le lā, le susulu mai o le malamalama mai i le lagi, ua sili atu i le pupula o le lā, ma faataaliʻoliʻo iā te aʻu ma i latou na matou malaga faatasi.+
14 Ina ua matou paʻuʻū i le eleele, ona ou faalogoina lea o se leo ua faapea mai iā te aʻu i le gagana Eperu: ‘Saulo, Saulo e, aiseā ua e faasauā mai ai iā te aʻu? O lou aa pea i tui,* e te tigāina ai.’
15 Ona ou fai atu lea: ‘O ai ea oe le Alii e?’ Ae ua fetalai mai le Alii: ‘O aʻu o Iesu, o lē ua e faasauā i ai.
16 Ae inā e tū ia i luga. O le mea lea ua ou faaali atu ai iā te oe, ina ia filifilia oe e fai ma auauna ma molimau i mea ua e vaai i ai, ma mea o le a ou faailoa atu iā te oe e uiga iā te aʻu.+
17 O le a ou laveaʻiina oe mai i nei tagata, faapea ma tagata o nuu ese, o ē ou te auina atu i ai oe+
18 ina ia faapupula o latou mata,+ ia faaliliuina i latou mai i le pōuliuli+ i le malamalama,+ ma ia liliu mai foʻi i latou mai i le pule a Satani+ i le Atua. Ona latou maua ai lea o le faamagaloina o agasala,+ ma se tofi faatasi ma i latou ua faapaiaina, e ala i lo latou faatuatua mai iā te aʻu.’
19 “O lea la, Akeripa e le tupu, na ou usiusitaʻi i le faaaliga mai i le lagi,
20 ma na ou muaʻi talaʻi i tagata i Tamaseko,+ ona sosoo ai lea o Ierusalema,+ o le atunuu atoa o Iutaia, ma tagata foʻi o nuu ese, ma taʻu atu le feʻau e faapea, e tatau ona latou salamō ma liliu atu i le Atua, i le faia lea o galuega ua tatau mo le salamō.+
21 O le mea lenei na māfua ai ona puʻe aʻu e tagata Iutaia i le malumalu, ma taumafai e fasioti aʻu.+
22 Peitaʻi, ona ua ou maua le fesoasoani mai i le Atua, ua faaauau ai ona ou molimau atu e oo mai i lenei aso, i tagata lautele ma tagata aloaʻia. Ae ou te talaʻia na o mea na tusia e le ʻau Perofeta ma Mose o le a taunuu.+ Ua taʻua i na tusitusiga
23 o le a tigāina le Keriso,+ ma o le a muamua toetū o ia mai i le oti,+ e folafola mai foʻi e ia le malamalama i lenei nuu faapea ma nuu ese.”+
24 A o fai atu Paulo i nei mea e tali atu ai, ona faapea mai lea o Feso ma le leotele: “Paulo, ua e valea! O le tele o lou suʻesuʻe ua e valea ai!”
25 Ae ua fai atu Paulo: “Lau afioga e, Feso, ou te lē valea, ae ua ou tautala i le upu moni ma le mafaufau lelei.
26 O le mea moni, o loo silafia lelei nei mea e le tupu, o lē o loo oʻu saʻoloto e tautala atu i ai; ua ou talitonu e leai se mea o nei mea e na te lē o silafia, auā e leʻi faia faalilolilo.+
27 Akeripa e le tupu, pe e te talitonu i le ʻau Perofeta? Ou te iloa e te talitonu i ai.”
28 Ae ua faapea mai Akeripa iā Paulo: “Ua e manatu e mafai ona e faaliliuina aʻu e avea ma Kerisiano i se taimi puupuu.”
29 Ona faapea atu lea o Paulo: “Ou te ʻaiʻoi atu i le Atua, e tusa pe puupuu se taimi pe umi foʻi, ae ia avea oe faapea i latou uma o loo faalogologo mai iā te aʻu i le aso nei, e pei o aʻu, ae aunoa ma le saisaitia.”
30 Ona tulaʻi lea o le tupu, faapea foʻi le kovana, ma Perenike, ma tagata na nonofo faatasi ma i latou.
31 A o latou savavali ese, ua faapea ane le tasi i le isi: “E leʻi faia e lenei tagata se mea e tatau i ai le oti po o le saisaitia i le falepuipui.”+
32 Ona fai atu lea o Akeripa iā Feso: “Pe ana lē tagi atu lenei tagata iā Kaisara, semanū ua faasaʻoloto o ia.”+
Faamatalaga Pito i Lalo
^ O se laau e maʻai lona mata, e faaaogā e faatonutonu ai se manu.
