Galuega a le ʻAuaposetolo 28:1-31
28 Ina ua matou taunuu saogalemu, ona matou iloa ai lea o le igoa o le motu o Melita.+
2 Na matuā agalelei mai iā i matou nei tagata e ese le gagana e tautatala ai.* Na latou tafu se afi ma talileleia i matou, ona o timuga ma le mālūlū.
3 Ae ina ua faaputuputu e Paulo ni fafie ma tuu i le afi, ona sau ai lea o se gata feʻai ona o le vevela, ma ū lona lima.
4 Ina ua vāai atu tagata o le motu o tautau le gata feʻai i lona lima, ona faapea ane lea o le tasi i le isi: “E mautinoa lava o ia o se fasioti tagata, ma e ui lava ua sao mai o ia mai i le sami, ae e lē tuua o ia e Faamasino* ina ia ola pea.”
5 Peitaʻi, ua ia liaʻiese le meaola i le afi, ma e leʻi afāina ai o ia.
6 Ua faatalitali i latou pe e fulafula lona tino pe oti faafuaseʻi. Ua fai sina umi o latou faatalitali, ae vāai atu lava e lē o afāina o ia, ona suia lea o o latou manatu ma faapea ane o ia o se atua.
7 E iai le alii sili o le motu e igoa iā Popilio, ma e iai ni ona fanua e lata ane i lea nofoaga. Ua ia talileleia i matou ma talimālō mo aso e tolu.
8 Peitaʻi, na faataotolia le tamā o Popilio ona o le fiva ma le matuā tigā o le manava.* Ona alu atu lea o Paulo, ua tatalo, ma faaee atu ona lima iā te ia, ma ua faamālōlōina ai o ia.+
9 Ina ua uma lenā mea, ona ō mai ai lea iā te ia o isi tagata mamaʻi uma o le motu, ina ia faamālōlōina i latou.+
10 Na latou aumaia foʻi le tele o meaalofa, o ni faaaloaloga iā i matou. A o matou sauni le folauga, ua latou laʻu i le vaa so o se mea na matou manaʻomia.
11 Ua mavae masina e tolu, ona matou folau atu lea i se vaa o loo iai le faailoga o “Atalii o Seu.” O lenei vaa e mai i Alesania, ma sa taula i le motu i le tau mālūlū.
12 Ua matou taula i le uafu i Surakusa, ma nonofo ai i inā mo aso e tolu;
13 ona matou folau atu lea ma taunuu i Rekiu. Ina ua mavae le aso e tasi, ona agi mai lea o le matagi mai i saute, ma ua matou taunuu ai i Puteoli i le aso na sosoo ai.
14 Ua matou maua uso i inā ma na latou ʻaiʻoi mai ina ia matou nonofo mo ni aso se fitu; ina ua uma, ona matou ō ai lea i Roma.
15 Ina ua logotala uso i inā iā i matou, ona latou ō mai ai lea e faafetaui i matou i le Maketi o Apio ma Faletalimālō e Tolu. Ina ua iloa atu i latou e Paulo, ona faafetai ai lea i le Atua ma ua lototele ai.+
16 Ina ua matou taunuu i Roma, ona faataga lea o Paulo e nofo na o ia, e leoleoina e se fitafita.
17 Ae ina ua mavae aso e tolu, ona ia talosagaina lea o alii sili o Iutaia ina ia faapotopoto ane. Ina ua latou ō ane, ona ia fai atu lea iā i latou: “Alii e, ma uso e, e ui lava ou te leʻi faia se mea sesē i tagata pe solia aganuu a o tatou augātamā,+ ae na tuuina atu aʻu i lima o tagata Roma,+ o se pagota mai i Ierusalema.
18 Ona latou suʻesuʻeina lea o aʻu,+ ma mananaʻo ai e faasaʻoloto aʻu, auā e leai se mea na ou faia e tatau i ai le oti.+
19 Peitaʻi, ina ua tetee mai pea tagata Iutaia, ona avatu lea o laʻu tagi iā Kaisara,+ ae e lē faapea ai ua iai se mea ou te tuuaʻia ai loʻu nuu.
20 O le mea lea na ou talosaga atu ai ina ia tatou feiloaʻi ma talanoa atu iā te outou, auā ua saisaitia aʻu i lenei filifili ona o le faamoemoe o Isaraelu.”+
21 Ua latou faapea mai iā te ia: “Matou te leʻi mauaina ni tusi mai i Iutaia e uiga iā te oe, e leai foʻi se tasi o le ʻauuso na sau mai i inā ua fai se tala leaga e uiga iā te oe.
22 Ae ua matou manatu, e lelei ona faalogo atu pea iā te oe i sou manatu, auā ua matou iloa ua salalau solo tala lē lelei+ e faatatau i lenei lotu.”+
23 Ona latou fuafuaina lea o se aso e feiloaʻi ai ma ia, ma ua ō mai le toʻatele o i latou iā te ia i le mea o loo nofo ai. E amata mai i le taeao seʻia oo i le pō, ua ia faamatala atu ai le mataupu iā i latou, e ala i le avatu o se molimau māeʻaeʻa e faatatau i le Malo o le Atua, ina ia faatalitonu ai i latou iā Iesu,+ mai i le Tulafono a Mose+ ma le ʻau Perofeta.+
24 Ona talitonu lea o nisi tagata, ae e leʻi talitonu isi tagata.
25 O lea, talu ai na feeseeseaʻi i latou, ona latou ō eseese ai lea, ma ua fai atu e Paulo lenei faamatalaga:
“E moni le mea na taʻu atu e le agaga paia e ala iā Isaia le perofeta i o outou augātamā,
26 e faapea: ‘Inā alu atu ia, ma fai atu i nei tagata: “Tou te faalogo ae lē malamalama, ma e tou te vāai ae lē iloa.+
27 Auā ua maaa loto o nei tagata, ua faalogo o latou taliga ae e lē tali mai, ma ua moeiini o latou mata, ina neʻi vāai o latou mata, ma faalogo o latou taliga, ma malamalama o latou loto ma liliu mai, ma ou faamālōlōina ai i latou.”’+
28 O lea la, ia outou iloa lenei mea, ua auina atu i nuu ese lenei faaolataga mai i le Atua;+ e latou te faalogo lava i ai.”+
29 *——
30 Ona nofo lea o ia mo le lua tausaga i lona fale mautotogi,+ ma talileleia i latou uma ua ō mai iā te ia,
31 ua talaʻi atu le Malo o le Atua iā i latou, ma aʻoaʻo atu mea e faatatau i le Alii o Iesu Keriso ma saʻoloto e tautala atu,*+ e aunoa ma le faatalatū.
Faamatalaga Pito i Lalo
^ Po o “tagata o le motu.”
^ O le upu Eleni, o le Di′ke. Atonu e faasino atu i se atua fafine e faia le faamasinogatonu.
^ Po o le “sanatoto.”
^ Po o le “ma le matuā lototele.”
