Galuega a le ʻAuaposetolo 4:1-37
4 A o la talanoa atu i tagata, ua ō mai iā i laʻua le ʻauositaulaga, o le taʻitaʻi o leoleo o le malumalu, ma le ʻau Satukaio.+
2 Ua feita i latou ona ua aʻoaʻoina e aposetolo tagata ma faailoa atu i le lautele le toetū mai o Iesu.*+
3 Ona latou puʻea lea o i laʻua ma tuu i le falepuipui+ seʻia oo i le isi aso, auā ua leva le afiafi.
4 Peitaʻi, ua talitonu le toʻatele o i latou na faalogo i le lauga, ma o le aofaʻiga o tane e tusa ma le 5,000.+
5 I le aso na sosoo ai, ua faapotopoto faatasi ai i Ierusalema o latou taʻitaʻi, o toeaina, ma le ʻautusiupu,
6 atoa foʻi ma Ana+ le faitaulaga sili, o Kaiafa,+ o Ioane, o Alesana, ma i latou uma e aiga i le faitaulaga sili.
7 Ua latou faatutū Peteru ma Ioane i o latou luma ma fesili mai: “O le pule a ai, ma o le igoa o ai ua oulua faia ai lenei mea?”
8 Ona faapea atu lea o Peteru o lē ua tumu i le agaga paia+ iā i latou:
“Taʻitaʻi e, o le nuu ma toeaina,
9 afai ua suʻesuʻeina i maʻua i le asō ona o le mea lelei ua faia i le tagata pipili,+ ma ona e tou te fia iloa po o ai ua malosi ai lenei tagata,
10 ia iloa e outou uma faapea foʻi ma tagata uma o Isaraelu, o le suafa o Iesu Keriso le Nasareta,+ o lē na outou tutuʻia i luga o le laau+ ae ua toe faatūina e le Atua mai i le oti,+ o ia lea ua malosi ai lenei tagata ua tū atu i o outou luma.
11 O le ‘maa lenei na faalēaogā e outou tufuga, ae ua avea ma maa tulimanu sili.’+
12 E leai foʻi se isi e mafai ona maua ai le faaolataga, auā e leai se isi igoa+ i lalo o le lagi ua tuuina mai e le Atua i tagata, e tatau ona faaolaina ai i tatou.”+
13 O lea, ina ua vāai i latou i le lototetele o Peteru ma Ioane e tautatala atu, ma ua latou iloa o i laʻua o ni tagata e leʻi aʻoaʻoina* ma e faatauvaa,+ ona latou taufaiofo ai lea. Ua latou iloa foʻi sa masani ona faatasi i laʻua ma Iesu.+
14 A o latou vāai atu i le tamāloa na faamālōlōina o loo tutū faatasi ma i laʻua,+ ona lē mautali ai lea o i latou.+
15 Ona latou faatonu lea o i laʻua ina ia ō i fafo mai i le potu o le Faamasinoga Sili, ma ua latou talatalanoa
16 e faapea: “O le ā sa tatou mea o le a fai i nei tagata?+ Auā o le mea moni, ua faia e i laʻua se faailoga mataʻina lea ua iloa e tagata uma i Ierusalema,+ e lē mafai foʻi ona tatou faafitia.
17 Ae ina neʻi atili salalau atu i tagata lenei tala, seʻi o tatou faafefe i laʻua ma faatonu ua sā ona toe tautatala atu i se tagata i lenā igoa.”+
18 Ona latou aami lea o i laʻua ma fai atu i ai, ua matuā sā lava ona toe taʻua pe aʻoaʻo atu i le igoa o Iesu.
19 Ae ua tali atu Peteru ma Ioane iā i latou: “E pule outou pe e tonu i le silafaga a le Atua ona ma faalogo iā te outou nai lo o le Atua.
20 A o i maʻua, e lē mafai ona ma lē taʻu atu mea ua ma vāai ma faalogo i ai.”+
21 O lea, ina ua uma ona latou faafefe atili i laʻua, ona latou tatala lea o i laʻua, auā e latou te leʻi maua se mea e faasala ai i laʻua. Ua latou faia foʻi faapea ona o tagata,+ auā ua latou faamamaluina uma le Atua ona o le mea ua tupu.
22 Auā o le tamāloa lea na faia i ai lenei faailoga o le faamālōlōga, e sili atu i le 40 tausaga lona matua.
23 Ina ua uma ona tatala i laʻua, ona la ō atu lea i le ʻauuso, ma faamatala atu mea na fai atu ai le ʻaufaitaulaga sili ma toeaina iā i laʻua.
24 Ua faalogo i latou i lenei mea, ona latou tatalo atu lea i le Atua ma le lotogatasi ma faapea atu:
“Le Alii Pule Silisili Ese e, o oe o Lē na faia le lagi ma le lalolagi, o le sami ma mea uma o iai,+
25 ma o lē na fetalai mai e ala i le agaga paia i le fofoga o lo matou augātamā o Tavita+ lau auauna e faapea: ‘Aiseā ua vevesi ai atunuu ma mafaufau ai tagata i mea e lē aogā?
26 Ua tutū faatasi tupu o le lalolagi ma ua faapotopoto faatasi taʻitaʻi e faasagatau iā Ieova* ma lē na ia faauuina.’*+
27 Auā o le mea moni, na faapotopoto faatasi i lenei aai, o Herota ma Ponotio Pilato+ ma tagata o atunuu, faapea tagata Isaraelu, e faasagatau i lau auauna paia o Iesu o lē ua e faauuina,+
28 ina ia latou faia mea na muaʻi tofia e lou aao ma lou finagalo ia oo mai.+
29 O lenei, Ieova* e, ia e silasila mai i la latou faamataʻu, ma ia tuuina mai i au pologa le malosi e tautatala atu ai pea i lau afioga ma le lototetele,
30 a o e faaloaloa mai lou aao e faamālōlō ai ma a o tutupu faailoga ma mea ofoofogia,*+ e ala i le suafa o lau auauna paia o Iesu.”+
31 Ina ua uma la latou tatalo,* ona lūlūina lea o le nofoaga na latou faapotopoto faatasi ai; ua faatutumuina foʻi i latou uma i le agaga paia,+ ma ua taʻutaʻu atu le afioga a le Atua ma le lototetele.+
32 E lē gata i lea, ua tasi le loto ma le manatu o le motu o tagata e toʻatele o ē ua talitonu, ma e leai se tasi ua faapea mai, o mea ua iā te ia, o ana lava mea, ae ua tuufaatasi a latou mea uma.+
33 Ua faaauau foʻi ona talaʻi atu le ʻauaposetolo ma le tele o le mana, e uiga i le toetū o le Alii o Iesu,+ ma ua faamanuiaina i latou uma i le tele o le agalelei faifua.
34 O le mea moni, e leai se tasi o i latou ua mativa i se mea,+ auā o i latou uma na iai fanua po o fale, ua latou faatau atu ma aumai le tau o ia mea na faatau atu,
35 ma ua latou tuu atu i luma o le ʻauaposetolo.+ Ona tufatufaina lea i tagata taʻitoʻatasi e tusa ai ma le mea na ia manaʻomia.+
36 O lea la, o Iosefa lea na faaigoa foʻi e le ʻauaposetolo iā Panapa+ (o lona uiga pe a faaliliuina, o le “Atalii o Faamāfanafanaga”), o se sa Levī, ma e sau mai i Kuperu,
37 sa iai lona fasi fanua na faatau atu, ona aumai lea o le tupe ma tuu atu i luma o le ʻauaposetolo.+
Faamatalaga Pito i Lalo
^ Po o “le toetutū mai o ē ua oti, i le ta‘ua o le toetū o Iesu.”
^ E foliga mai e faasino atu i le lē lava o aʻoaʻoga i se aʻoga faalelotu faa-Eperu.
^ Po o “ma lana Keriso.”
^ Po o “vavega.”
^ Po o le “uma ona latou tatalo faatauanau.”
