Galuega a le ʻAuaposetolo 9:1-43
9 Ae ua faamataʻu atu pea Saulo i soo o le Alii ma matuā naunau e fasiotia i latou,+ ua alu atu o ia i le ositaulaga sili,
2 ma talosaga atu mo ni tusi e avatu i sunako i Tamaseko, ina ia mafai ona ia saisaia tane ma fafine uma e maua ua ʻau i Le Ala,+ ma avatu i latou i Ierusalema.
3 A o malaga atu o ia ma ua latalata i Tamaseko, ona faafuaseʻi lea ona suluia faataaliʻoliʻo o ia i le malamalama mai i le lagi;+
4 ua paʻū o ia i le eleele ma faalogoina se leo o faapea mai iā te ia: “Saulo, Saulo e, aiseā ua e faasauā mai ai iā te aʻu?”
5 Ua fesili atu o ia: “O ai ea oe le Alii e?” Ua ia faapea mai: “O aʻu o Iesu,+ o lē ua e faasauā i ai.+
6 E ui i lea, tū ia i luga ma alu atu i le aai, o le a faamatala atu ai iā te oe le mea e tatau ona e faia.”
7 Ua tutū tamāloloa o loo malaga faatasi ma ia, ua lē magagana ina ua faalogo i le leo, ae e leʻi vāai atu i se tagata.+
8 Ona tū lea i luga o Saulo, ma e ui ina pupula ona mata, ae ua lē iloa e ia se mea. O lea, ua latou fetagofi atu ai i ona lima ma taʻitaʻi atu o ia i Tamaseko.
9 E tolu aso e na te leʻi iloa ai se mea,+ e leʻi ʻai foʻi pe inu.
10 E iai se soo e igoa iā Anania+ i Tamaseko, ma ua fetalai mai le Alii iā te ia i se faaaliga: “Anania e!” Ua ia faapea atu: “O aʻu lenei le Alii e.”
11 Ua faapea mai le Alii iā te ia: “Inā tū ia i luga ma alu i le auala e taʻua o Saʻo, i le fale o Iuta ma saʻili ai le tagata e igoa iā Saulo mai i Taso.+ Auā faauta! o loo tatalo o ia
12 ma ua ia vaaia i se faaaliga le tagata e igoa iā Anania, ua sau ma faaee ona lima iā te ia ina ia toe lelei ai lana vaai.”+
13 Ae ua tali atu Anania: “Le Alii e, na ou faalogo i le toʻatele e uiga i lenā tagata, i le tele o mea leaga ua ia faia i ou tagata paia i Ierusalema.
14 Ua iā te ia foʻi le pule mai i le ʻaufaitaulaga sili e puʻea* ai i latou uma e valaau i lou suafa.”+
15 Ae ua fetalai mai le Alii iā te ia: “Inā alu ia! auā o lenei tagata o le ipu ua filifilia mo aʻu,+ e talaʻi atu loʻu igoa i nuu ese+ faapea foʻi ma tupu,+ ma le fanauga a Isaraelu.
16 Ou te faailoa manino atu foʻi iā te ia le tele o mea e tatau ona ia mafatia ai ona o loʻu igoa.”+
17 Ona alu lea o Anania ma ulufale atu i le fale, ma faaee ona lima iā te ia ma faapea atu: “Loʻu uso e, Saulo, ua auina mai aʻu e le Alii o Iesu, lea na faaali atu iā te oe i le auala na e sau ai, ina ia e toe vaai ma faatumuina oe i le agaga paia.”+
18 Ona paʻuʻū ese loa lea o mea e pei o ni una mai i ona mata, ma ua ia toe vaai ai. Ua tulaʻi o ia ma ua papatisoina,
19 ua ʻai ma ua toe maua lona malosi.
Ua nofo foʻi o ia faatasi ma le ʻausoo i Tamaseko+ mo ni nai aso,
20 ma ua amata loa ona ia talaʻi e uiga iā Iesu i le sunako e faapea, o ia lenei o le Alo o le Atua.
21 Ae ua matuā maofa i latou uma ua faalogo iā te ia, ma faapea ane: “Pe e lē o le tagata ea lenei na soona faasauā iā i latou na valaau i lenā suafa i Ierusalema?+ Pe e lē o le mea foʻi lea ua sau ai o ia i inei, ina ia puʻea i latou ma avatu* i le ʻaufaitaulaga sili?”+
22 Ae ua faateleina pea le maelega o Saulo, ma ua maofa tagata Iutaia o loo nonofo i Tamaseko, a o ia faailoa manino atu iā i latou, o le Keriso lava lenei.+
23 Ua mavae aso e tele, ona taupulepule ai lea o tagata Iutaia e fasioti iā te ia.+
24 Peitaʻi, ua iloa e Saulo la latou faufauga. Ua latou lamalama foʻi i faitotoʻa i le ao ma le pō ina ia fasiotia o ia.
25 Ona ave lea o ia e ona soo, ma tuutuu ifo iā te ia i le pō i se ato mai i se faamalama i le pā o le aai.+
26 Ina ua taunuu i Ierusalema,+ ona ia taumafai lea e aufaatasi atu i soo, ae ua latou fefefe uma iā te ia, auā e latou te leʻi talitonu o ia o se soo.
27 O lea, ua fesoasoani atu ai Panapa+ iā te ia ma avatu i aposetolo. Ua faamatala atu foʻi e Panapa iā i latou mea uma e faapea, na ia vaaia le Alii+ i le auala, ma na ia fetalai atu iā te ia, faapea ma lona molimau atu ma le lototele i Tamaseko e faatatau i le suafa o Iesu.+
28 Ua ia faatasi pea ma i latou, ma faia mea masani o le olaga i Ierusalema, ma talaʻi atu ma le lototele le suafa o le Alii.
29 Ua talanoa atu foʻi o ia ma fefinauaʻi ma tagata Iutaia e tautatala i le gagana Eleni, ae ua taumafai i latou nei e fasioti iā te ia.+
30 Ina ua iloa e le ʻauuso lenei mea, ona latou ave ifo lea o ia i Kaisareia ma auina atu i Taso.+
31 O le mea moni, ua nonofo filemu le faapotopotoga i Iutaia atoa ma Kalilaia ma Samaria,+ ua faamalosia foʻi i latou; ua faatoʻateleina pea i latou ona o le faamāfanafana mai o le agaga paia,+ a o savavali ma le matataʻu iā Ieova.*
32 A o malaga atu Peteru i le vaipanoa atoa, ona alu ifo foʻi lea o ia i le ʻaupaia o loo nonofo i Lita.+
33 Ua ia iloa ai i inā se tagata e igoa iā Ainea, o lē ua valu tausaga o taoto i lona moega auā ua pē lona tino.
34 Ua fai atu Peteru iā te ia: “Ainea e, ua faamālōlōina oe e Iesu Keriso.+ Inā tū ia i luga ma teu lou moega.”+ Ona ia tū loa lea i luga.
35 Ina ua vāai iā te ia i latou uma o loo nonofo i Lita ma le fanua laugatasi o Sarona, ona latou liliu ai lea i le Alii.
36 E iai se soo fafine i Iopa e igoa iā Tapita, o lona uiga pe a faaliliuina, o “Toreka.”* Ua ia faia le tele o galuega lelei ma foaʻi atu meaalofa.
37 Ae i na aso, ua maʻi o ia ma oti ai. Ona latou faatāʻele lea o ia ma faataoto i le potu i luga.
38 Talu ai e felataʻi Lita ma Iopa, ma ina ua faalogo soo o loo iai Peteru i lenā aai, ona latou aauina atu lea o ni tamāloloa se toʻalua ina ia ʻaiʻoi atu iā te ia: “Faamolemole, ia e vave sau iā i matou.”
39 Ona tulaʻi lea o Peteru ua ō faatasi ma i laʻua. Ina ua taunuu atu, ona latou ave lea o ia i le potu i luga. Ua ō mai foʻi iā te ia fafine uma ua oti a latou tane, o loo fetagisi ma faaali mai le tele o ofu ma ofu talaloa* sa faia e Toreka, a o iai o ia ma i latou.
40 Ua tuu atu e Peteru tagata uma e ō i fafo,+ ae ua tootuli ma tatalo. Ua ia liliu atu i le tino ma faapea atu: “Tapita e, inā tulaʻi ia!” Ua pupula ona mata ma ina ua vaai mai iā Peteru, ona nofo lea o ia i luga.+
41 Ua tago atu o ia i lona lima ma faatū o ia i luga, ona valaau atu lea i le ʻaupaia ma fafine ua oti a latou tane, ma tuu atu o ia iā i latou, ua ola.+
42 Ua lauiloa lenei mea i Iopa uma, ma ua talitonu ai le toʻatele i le Alii.+
43 Ua nofo pea o ia i Iopa mo ni nai aso faatasi ma se tagata e igoa iā Simona, o lē e galue e saunia paʻu o manu.+
Faamatalaga Pito i Lalo
^ Ele., “saisaia.”
^ Ele., “ina ia saisaia i latou ma taʻitaʻi atu.”
^ O le igoa Eleni o Toreka, ma le igoa Arama o Tapita, e uiga atu i le “Sevi.”
^ Po o “ofu tetele.”
