Hosea 11:1-12
11 “A o tamaitiiti Isaraelu, na ou alofa iā te ia,+Ma na ou valaauina loʻu atalii mai i Aikupito.+
2 O le tele na latou* valaau ai iā i latou,O le tele foʻi lenā o lo latou ō ese mai iā i latou.+
Na latou faia pea taulaga i tupua o Paala,+Ma faia taulaga i tupua ua tā.+
3 A o aʻu na aʻoaʻoina Efaraima ina ia iloa savali,+ ma sii i latou i oʻu lima;+Ma e latou te leʻi amanaʻia o aʻu na faamālōlōina i latou.
4 Na ou tosina mai pea i latou i maea a tagata,* i manoa o le alofa;+Ma na pei ai aʻu iā i latou o lē e sii ese le amo mai i o latou auvae,Ma avatu mālie meaʻai iā i latou taʻitoʻatasi.
5 O le a lē toe foʻi i latou i le laueleele o Aikupito, ae o le a avea Asuria ma o latou tupu,+Auā ua latou mumusu e toe foʻi mai iā te aʻu.+
6 E feliuliuaʻi le pelu i ona aai+Ma lepetia ona pou faalava, ma faaumatia i latou ona o a latou faufauga.+
7 Ua maumauaʻi loʻu nuu ia lē faamaoni iā te aʻu.+
E ui ua latou valaau atu iā i latou e toe foʻi i lē ua sili,* ae e leai lava se tasi e tulaʻi atu.
8 “Efaraima e, e faapefea ona ou tuua oe?+
Isaraelu e, e faapefea ona ou tuuina atu oe?
E faapefea ona ou feutagaʻi ma oe e pei o Atama?
E faapefea ona ou faia iā te oe e pei o Sepoiima?+
Ua suia loʻu loto e faatatau iā te oe;Ma ua faagaeetia* oʻu lagona alofa mutimutivale i lea lava taimi.+
9 Ou te lē faaoo atu loʻu ita tele.
Ou te lē toe faaumatia Efaraima,+Auā o aʻu o le Atua ae e lē o se tagata,O Lē e Paia o loo iā te outou;Ma ou te lē alu atu iā te outou ma le toʻatamaʻi.
10 E latou te mulimuli atu iā Ieova, ma e tagi leotele o ia e pei o se leona;+Pe a tagi leotele o ia, e ō mai foʻi ma le gatete lana fanau mai i le itu i sisifo.+
11 E latou te gatete e pei o se manulele pe a ō ese mai i Aikupito,E pei foʻi o se lupe mai i le atunuu o Asuria;+Ma o le a ou faanonofo i latou i o latou fale,” ua fetalai mai ai Ieova.+
12 “Ua siʻomia aʻu e Efaraima i le pepelo,Ua siʻomia foʻi aʻu e Isaraelu i le taufaasesē.+
Ae ua feoaʻi solo* pea Iuta ma le Atua,Ma e faamaoni o ia i Lē e Sili ona Paia.”+
Faamatalaga Pito i Lalo
^ E faasino atu i perofeta ma isi na aauina atu e aʻoaʻo Isaraelu.
^ Po o “maea o le agalelei,” e pei o maea a se matua.
^ Epe., “e ō aʻe,” e faasino atu i le tapuaʻiga moni, lea e sili ona maualuga.
^ Epe., “faasolo ina māfanafana.”
^ Po o le “savavali.”
