O le Tusi a Iakopo 3:1-18
3 Oʻu uso e, e lē tatau ona toʻatele outou e fai ma aʻoaʻo, i le iloaina o le a sili atu ai ona mamafa lo tatou faamasinoga.+
2 Auā e sesē* i tatou uma i le tele o taimi.+ Afai e lē sesē se tasi i lana tautala, o le tagata lea ua lelei atoatoa, auā ua mafai ona ia pulea lona tino atoa.
3 Afai e tatou te tuu faagutu i gutu o solofanua ina ia usiusitaʻi ai iā i tatou, ua mafai foʻi la ona tatou faatonutonuina solofanua.
4 Seʻi manatu foʻi i vaa: E ui ina tetelē ma felafoa‘iina e matagi malolosi, ae e faatautaia e se foeuli e matuā laʻitiiti i so o se itulagi e manaʻo i ai lē o loo uliina le vaa.
5 E faapea foʻi le laulaufaiva, o se itutino itiiti ae tautala i upu faasausili. Faauta! O le afi itiiti e mafai ona mū ai le togāvao telē!
6 O le laulaufaiva o le afi lea.+ E ese mai i isi itutino uma o le tino, o le laulaufaiva ua tumu i mea leaga, auā e faaleagaina ai le tino atoa+ ma faamūina ai le olaga atoa o se tasi, e pei ona faia e le afi i Kena.*
7 E mafai ona faalata ma ua uma foʻi ona faalataina e tagata ituaiga o manufeʻai eseese, o manufelelei, o mea fetolofi, ma meaola o le sami.
8 Ae e lē mafai e se tagata ona pulea lona laulaufaiva. O le mea leaga lea e lē mafai ona taofiofia, e tumu i mea oona e oti ai.+
9 E tatou te vivii atu iā Ieova* le Tamā i o tatou laulaufaiva, ae ua tatou toe faamalaia ai foʻi i tagata ua faia “i le faatusa o le Atua.”+
10 O le gutu lava e tasi e faamanuia atu ai ma toe faamalaia ai.
Oʻu uso e, e lē talafeagai ona faia lenā mea.+
11 Pe e mafai ea e se vaipuna e tasi, ona puna mai ai le vai magalo* ma le vai oona?
12 Oʻu uso e, pe e mafai ea e le mati ona fua mai ai le olive, po o le vine foʻi ona fua mai ai le mati?+ E lē mafai foʻi e le vai oona ona puna mai ai vai magalo.
13 O ai se isi o outou ua atamai ma ua malamalama? Inā faailoa mai ia e ala i lana amiolelei, e faaalia ia i ana galuega e faia ma le agamalu lea e maua mai i le atamai.
14 Ae afai ua iā te outou le lotoleaga+ ma le faamisa*+ i o outou loto, ia aua le gugutu+ ma pepelo e faatatau i le upu moni.
15 E lē o le atamai lenei ua alu ifo mai i lugā; a o le atamai o le lalolagi,+ e faaletino* ma e faatemoni ia.
16 Auā o so o se mea e iai le lotoleaga ma le faamisa,* e iai foʻi le vevesi ma mea leaga uma.+
17 A o le atamai mai i lugā, e muamua ona mamā,+ e filemu,+ e magafagafa,+ e gaua‘igofie, e tumu i le alofa mutimutivale ma fua lelei,+ e lē faailoga tagata,+ e lē faatagāfai.+
18 E fua mai foʻi le amiotonu pe a lūlūina i se siʻomaga filemu,+ mo i latou* ua faatupuina le filemu.+
Faamatalaga Pito i Lalo
^ Ele., “paʻuʻū.”
^ Tagaʻi i le Uiga o Upu.
^ Ele., “suamalie.”
^ Pe atonu “ma faanaunauga manatu faapito.”
^ Po o le “e amio faamanu.”
^ Pe atonu “ma faanaunauga manatu faapito.”
^ Pe atonu “e i latou.”
