Ieremia 11:1-23
11 O le afioga lenei a Ieova na oo mai iā Ieremia e faapea:
2 “Inā faalogo mai ia outou i upu o lenei feagaiga!
“Ia e taʻu atu i tagata o Iuta ma ē o loo nonofo i Ierusalema
3 ma ia e fai atu iā i latou, ‘O le mea lenei ua fetalai mai ai Ieova le Atua o Isaraelu: “E malaia le tagata e lē usita‘i i upu o lenei feagaiga,+
4 na ou poloaʻi atu ai i o outou augātamā i le aso na ou aumaia ai i latou mai i le nuu o Aikupito,+ mai i le ogaumu e tunu ai uʻamea,+ ia faapea atu, ‘Ia faalogo mai i loʻu leo, ma ia outou faia mea uma ua ou poloaʻi atu ai iā te outou; ona avea ai lea o outou ma oʻu nuu, e avea foʻi aʻu ma o outou Atua,+
5 ina ia ou faataunuu ai le tautoga na ou tautō ai i o outou augātamā, e avatu iā i latou le laueleele e tafe ai le suāsusu ma le meli,+ e pei ona iai i le aso nei.’”’”
Ona ou tali atu lea: “Amene,* Ieova e.”
6 Ona fetalai mai lea o Ieova iā te aʻu: “Ia e folafola atu nei upu uma i aai o Iuta ma auala o Ierusalema: ‘Inā faalogo mai ia i upu o lenei feagaiga, ma ia outou faia lava.
7 Auā na ou matuā apoapoaʻi atu i o outou augātamā i le aso na ou aumaia ai i latou mai i le nuu o Aikupito ma e oo mai lava i lenei aso, na ou apoapoaʻi atu pea lava pea iā i latou:* “Ia outou faalogo mai i loʻu leo.”+
8 Ae ua latou lē faalogo pe uaʻi mai o latou taliga; nai lo o lea, ua taʻitasi i latou ma savavali pea e tusa ma le maaa o o latou lava loto ua leaga.+ Ona ou faaoo atu lea i luga iā i latou o upu uma o lenei feagaiga na ou poloaʻi atu ai iā i latou e faia, ae e latou te leʻi faia lava.’”
9 Ona fetalai mai lea o Ieova iā te aʻu: “Ua iai le fouvalega ua faia e tagata o Iuta ma ē o loo nonofo i Ierusalema.
10 Ua latou toe liliu atu i mea sesē na faia e o latou augātamā mai anamua, o ē na mumusu e usiusitaʻi i aʻu upu.+ Na latou mulimuli atu foʻi i isi atua ma auauna iā i latou.+ Ua solia e le aiga o Isaraelu ma le aiga o Iuta laʻu feagaiga na ou osia ma o latou augātamā.+
11 O le mea lenei ua fetalai mai ai Ieova, ‘Ou te faaoo atu iā i latou le malaia+ e lē mafai ona latou sao mai ai. Pe a latou valaau mai iā te aʻu mo se fesoasoani, ou te lē faalogo atu iā i latou.+
12 Ona ō ai lea o aai o Iuta ma ē o loo nonofo i Ierusalema i atua na latou faia ai taulaga,* ma valaau atu i ai mo se fesoasoani,+ ae e lē faaolaina ai lava i latou i le taimi o lo latou malaia.
13 Auā o le aofaʻi o o outou atua ua tutusa ma le aofaʻi o ou aai, Iuta e, ua outou faatūina foʻi le tele o fata faitaulaga mo le mea e māsiasi ai* e pei o le tele o auala o Ierusalema, o fata faitaulaga e faia ai taulaga iā Paala.’+
14 “A o oe,* aua neʻi e tatalo mai mo lenei nuu. Aua e te ʻaiʻoi mai pe tatalo mo i latou,+ auā ou te lē faalogo atu pe a latou valaau mai iā te aʻu ona o lo latou malaia.
15 Aiseā ua iai pea loʻu nuu pele i loʻu faleA o le toʻatele o i latou o loo faia faufauga leaga?
Pe e mafai ea e aano paia* ona latou liliuese ai le mala pe a oo mai iā te oe?*
Pe e te fiafia ea i lenā taimi?
16 Na faaigoa oe e Ieova o le laau olive lauolaola,E matagofie ma mananaia ona fua.
Ua lagona le gapāpā tele ina ua ia susunuina o ia i le afi,Ma ua latou gauia ona lālā.
17 “Ua folafola mai e Ieova o ʻau, o Lē na totōina oe,+ le mala o le a oo iā te oe, ona o mea leaga na faia e le aiga o Isaraelu ma le aiga o Iuta, o ē na faatigā mai iā te aʻu e ala i le faia o taulaga iā Paala.”+
18 Ua faailoa mai e Ieova iā te aʻu ina ia ou iloaina ai;I lenā taimi, ua e faavaai aʻu i a latou mea na fai.
19 Ua pei aʻu o se tamaʻi mamoe, o se fagafao ua aumaia ina ia fasia.
Ou te leʻi iloa ua latou fafauina ni mea leaga e faasaga iā te aʻu:+
“Seʻi o tatou faaumatia le laau ma ona fua,Ma seʻi o tatou vavaeeseina o ia mai i le nuu o tagata ola,Ina ia lē toe manatua ai lona igoa.”
20 A o Ieova o ʻau, o loo faamasino o ia ma le amiotonu;O loo suʻesuʻe e ia manatunatuga loloto* ma le loto.+
Se‘i o‘u vaai i lau tauimasui iā i latou,Auā ua ou tuuina atu iā te oe laʻu faamasinoga.
21 O le mea lenei ua fetalai mai ai Ieova i tagata o Anatota,+ o ē o loo saʻili e fasioti iā te oe ma faapea ane: “Aua e te vavalo i le suafa o Ieova,+ ina neʻi e oti i o matou lima”;
22 o le mea lea ua fetalai mai ai Ieova o ʻau: “O lenei, ou te faasalaina i latou. E feoti tauleleʻa i le pelu,+ ma e feoti o latou atalii ma o latou afafine i le oge.+
23 E leai lava nisi o i latou e totoe, auā ou te faaoo atu le malaia i tagata o Anatota+ i le tausaga ou te faasalaina ai i latou.”
Faamatalaga Pito i Lalo
^ Po o le “O lea lava.”
^ Epe., “ou te alapō ma apoapoaʻi atu.”
^ Po o le “faamū ai taulaga.”
^ Po o “le atua e māsiasi ai.”
^ E faasino atu iā Ieremia.
^ E faasino atu i taulaga na faia i le malumalu.
^ E faasino atu iā Iuta.
^ Epe., “fatugaʻo.”
