Ieremia 16:1-21
16 Na toe oo mai foʻi le afioga a Ieova iā te aʻu e faapea:
2 “Aua neʻi faia sau avā, aua foʻi neʻi iai ni ou atalii ma ni ou afafine i lenei mea.
3 Auā o le mea lenei ua fetalai mai ai Ieova e faatatau i atalii ma afafine ua fananau mai i lenei mea, ma o latou tinā o ē na fanaua i latou, atoa foʻi ma o latou tamā o ē na pogai ai ona latou fananau mai i lenei nuu:
4 ‘E feoti i latou i faamaʻi e oti ai,+ ae e leai nisi e tagiauē iā i latou pe tanuina foʻi i latou; e avea i latou ma otaota i luga o le laueleele.+ E faaumatia i latou i le pelu ma le oge,+ ma e fai o latou tino oti ma meaʻai a manufelelei o le lagi ma manu o le fanua.’
5 Auā o le mea lenei ua fetalai mai ai Ieova,‘Aua e te ulu atu i se fale o fai ai se tausamiga a tagata faanoanoa,Ma aua e te alu atu e tagiauē pe faamaise iā i latou.’+
Ua fetalai mai Ieova, ‘Auā ua ou aveesea loʻu filemu mai i lenei nuu,O lo‘u alofa faamaoni foʻi ma le alofa mutimutivale.+
6 E feoti o ē e sili ma ē e faatauvaa i lenei nuu.
E lē tanuina i latou,E leai nisi e faavauvau iā i latou,Po o se isi e selei iā te ia lava, pe sele mamā lona ulu ona o i latou.*
7 E leai se tasi e saunia meaʻai mo ē e faavauvau,E faamāfanafana ai i latou ona o lē ua oti;Po o se tasi e avatua iā i latou le ipu o le faamāfanafanagaE feinu ai ona o le feoti o lo latou tamā po o lo latou tinā.
8 Aua fo‘i e te ulu atu i se fale o fai ai se faigaʻai,E nonofo faatasi ma i latou e aai ma feinu ai.’
9 “Auā o le mea lenei ua fetalai mai ai Ieova o ʻau, o le Atua o Isaraelu, ‘Ou te faaiʻuina le leo o le fiafia ma le leo o le olioli, o le leo o le alii faaipoipo ma le leo o le tamaʻitaʻi faaipoipo+ mai i lenei mea i o outou luma ma i o outou aso.’
10 “Pe a e taʻu atu i lenei nuu o nei upu uma, o le a latou fesili mai iā te oe, ‘Aiseā ua fetalai mai ai Ieova iā i matou i lenei malaia tele? O le ā la matou mea sesē ma la matou agasala ua faia iā Ieova lo matou Atua?’+
11 Ona e tali atu lea iā i latou: ‘Ua fetalai mai Ieova, “Talu ai ua tuulafoa‘ia aʻu e o outou augātamā,+ ma ua latou mulimuli atu pea i isi atua,+ ua auauna ma ifo i ai. Ae ua latou tuulafoa‘ia aʻu, ma ua latou lē tausia foʻi laʻu tulafono.+
12 Ae ua sili atu ona leaga mea ua outou faia nai lo o o outou augātamā,+ ma ua taʻitasi outou ma savavali e tusa ma le maaa o lona loto ua leaga, nai lo o le usiusitaʻi mai iā te aʻu.+
13 O lea, ou te lafoaʻi ese outou mai i lenei laueleele i se nuu e tou te lē iloa,+ e lē iloa foʻi e o outou augātamā, ma e tou te auauna ai i inā i isi atua i le ao ma le pō,+ auā ou te lē alofa mutimutivale iā te outou.”’
14 “‘Peitaʻi, e oo mai aso,’ ua fetalai mai ai Ieova, ‘e latou te lē toe faapea ane ai: “E matou te tautō iā Ieova le Atua soifua o lē na aumaia le fanauga a Isaraelu mai i le nuu o Aikupito!”+
15 ae o le a faapea ane: “E matou te tautō iā Ieova le Atua soifua o lē na aumaia le fanauga a Isaraelu mai i le nuu o le itu i mātū, ma nuu uma na ia faataapeape i ai i latou!” ma ou te toe aumaia i latou i lo latou laueleele, na ou foaʻiina atu i o latou augātamā.’+
16 ‘O lenei, ou te aauina atu tagata faifaiva e toʻatele,’ ua fetalai mai ai Ieova,‘E latou te fagotaina i latou.
Mulimuli ane, ona ou aauina atu lea o tagata tuli manu e toʻatele,Ma e latou te tutuli e saʻili i latou i mauga uma, o aʻega uma,Ma vaipapa uma.
17 Auā ua vaai atu oʻu mata i mea uma e latou te faia.*
E leʻi natia na mea i oʻu luma,E leʻi lilo foʻi o latou sesē i laʻu vaai.
18 Muamua, ou te toe taui atu le aofaʻiga atoa o a latou mea sesē ma la latou agasala,+Auā ua latou faaleagaina loʻu nuu i a latou tupua inosia e leai ni olaMa ua latou faatumu loʻu tofi i a latou mea inosia.’”+
19 Ieova e, o loʻu malosi ma loʻu lafitaga,O le mea ou te sola i ai i le aso o le puapuaga,+E ō mai iā te oe o atunuu mai i tuluʻiga o le lalolagi,Ma e latou te faapea atu: “Ua fai ma tofi o o matou augātamā le pepelo,O mea faatauvaa, ma mea e leai ni aogā.”+
20 Pe e mafai ea e se tagata ona ia faia mo ia lava ni atua,Ae e lē o i latou moni o ni atua?+
21 “O lea, ou te faailoa atu iā i latou,O le taimi lea, ou te faailoa atu ai iā i latou loʻu mana ma loʻu malosi,Ma e latou te iloa ai o loʻu igoa o Ieova.”
Faamatalaga Pito i Lalo
^ O ni tū faapaupau i taimi e faavauvau ai e foliga mai na faia e tagata Isaraelu na fulitua i le tapuaʻiga moni.
^ Epe., “i o latou ala uma.”