Ieremia 24:1-10
-
Mati lelei ma mati leaga (1-10)
24 Ona faaali mai lea e Ieova iā te aʻu o ato mati e lua ua tuuina i luma o le malumalu o Ieova, ina ua uma ona ave faapagota e Nepukanesa le tupu o Papelonia o Iekonia*+ le atalii o Ioakima+ o le tupu o Iuta, faatasi ma perenise o Iuta, o tufuga ma ē e faia uʻamea,* ua ia ave i latou mai i Ierusalema aga‘i i Papelonia.+
2 O le tasi ato ua iai mati e matuā lelei lava, e pei o mati ua muaʻi pula, ae o le isi ato ua iai mati e matuā leaga lava, e lē mafai ona ʻaina ona o le leaga.
3 Ona fesili mai lea o Ieova iā te aʻu: “Ieremia e, o le ā se mea o e vaai atu i ai?” Ona ou fai atu lea: “O mati, o mati e matuā lelei lava ma mati e matuā leaga lava, e lē mafai ona ʻaina ona o le leaga.”+
4 Ona oo mai ai lea o le afioga a Ieova iā te aʻu, ua faapea mai:
5 “O le mea lenei ua fetalai mai ai Ieova le Atua o Isaraelu, ‘E pei o nei mati lelei, e faapea ona ou manatu i se auala lelei i ē ua ave faapagota o Iuta, o ē ua ou aauina ese atu mai i lenei mea i le nuu o Kaletaia.
6 E faasaga atu oʻu mata iā i latou mo lo latou lelei, ma ou te faafoʻisia foʻi i latou i lenei nuu.+ Ou te atiaʻe i latou, ma ou te lē lepetiaina; ou te totōina foʻi i latou, ma ou te lē liaʻiina lava.+
7 Ou te foaʻiina atu iā i latou se loto ina ia iloa ai aʻu, o aʻu o Ieova.+ E avea i latou ma oʻu nuu, e avea foʻi aʻu ma o latou Atua,+ auā e toe foʻi mai i latou iā te aʻu ma o latou lotoatoa.+
8 “‘Ae o mati leaga e lē mafai ona ʻaina ona o le leaga,+ o le mea lenei ua fetalai mai ai Ieova: “E faapea ona ou manatu iā Setekaia+ le tupu o Iuta, o ona perenise, o ē o totoe o Ierusalema o loo totoe i lenei nuu, ma i latou o loo nonofo i le nuu o Aikupito.+
9 Ou te faia i latou ma mea e fefefe ai ma puapuagatia ai malo uma o le lalolagi,+ e avea foʻi i latou ma luma, o upu faatusa, ma tauemuga, ma malaia,+ i mea uma ou te faataapeape i ai i latou.+
10 Ou te aauina atu iā i latou le pelu,+ o le oge, ma le faamaʻi,+ seʻia faaumatia i latou mai i le laueleele na ou tuuina atu iā i latou ma o latou augātamā.”’”
