Ieremia 26:1-24
26 I le amataga o le nofoaiga a Ioakima+ le atalii o Iosia, o le tupu o Iuta, na oo mai ai le afioga lenei a Ieova:
2 “O le mea lenei ua fetalai mai ai Ieova, ‘Ia e tū i le lotoā o le fale o Ieova, ma ia e tautala atu e faatatau i tagata* uma o aai o Iuta, o ē ua ō mai e tapua‘i* i le fale o Ieova. Ia ta‘u atu iā i latou upu uma ou te poloaʻi atu ai iā te oe; aua lava neʻi tuua se upu e tasi.
3 Atonu e latou te faalogo i ai, ona taʻitasi lea ma liliuese mai i lona ala leaga, ona sui ai lea o loʻu manatu* i le malaia na ou mafaufau e faaoo atu iā i latou, ona o le leaga o a latou mea na fai.+
4 Ia e fai atu iā i latou: “O le mea lenei ua fetalai mai ai Ieova, ‘Afai e tou te lē faalogo mai iā te aʻu i le savavali i laʻu tulafono* ua ou tuuina atu i o outou luma,
5 ma outou faalogo i upu a aʻu auauna le ʻauperofeta, o ē na ou aauina atu pea lava pea* iā te outou, ae e tou te leʻi faalogo i ai,+
6 ona ou faia lea o lenei fale e pei ona ou faia i Sailo,+ ou te faaumatia fo‘i lenei aai ma e ta‘ua e atunuu uma o le lalolagi pe a faia a latou faamalaia.’”’”+
7 Ona faalogo lea o ositaulaga, o le ʻauperofeta, ma le nuu uma iā Ieremia o loo fai atu nei upu i le fale o Ieova.+
8 Ina ua uma ona fai atu e Ieremia o mea uma na poloaʻi mai ai Ieova iā te ia e fai atu ai i le nuu uma, ona puʻea lea o ia e ositaulaga, o le ʻauperofeta, ma le nuu uma, ma faapea atu: “E te oti lava.
9 Aiseā ua e vavalo mai ai i le suafa o Ieova, e faapea, ‘E pei ona faia i Sailo e faapena foʻi ona faia i lenei fale, ma e faatafunaina lenei aai ina ia leai se tasi e toe nofo ai’?” Ua faapotopoto mai le nuu uma iā Ieremia i le fale o Ieova.
10 Ina ua faalogo perenise o Iuta i ia upu, ona latou ō aʻe lea mai i le fale o le tupu i le fale o Ieova, ma nonofo ai i le mea e ulu atu ai i le faitotoʻa fou o Ieova.+
11 Ona faapea atu lea o ositaulaga ma le ʻauperofeta i perenise ma le nuu uma: “E tatau ona faasala i le oti lenei tagata,+ auā ua faia e ia valoaga e faatatau i lenei aai e pei ona outou faalogo atu i ai.”+
12 Ona fai atu lea o Ieremia i perenise uma ma le nuu uma: “O Ieova na auina mai aʻu e vavalo atu e faatatau i lenei fale, ma e faatatau foʻi i lenei aai i upu uma ua outou faalogo i ai.+
13 O lenei, ia suia o outou ala ma a outou amio, ma ia faalogo i le siʻufofoga o Ieova lo outou Atua, ona toe sui ai lea o le manatu* o Ieova i le mala na ia fetalai ai e oo mai iā te outou.+
14 A o a‘u nei ua i o outou lima. Ia faia iā te aʻu e tusa ma le mea e lelei ma tonu iā te outou.
15 Ae tau lava ina outou iloa, afai tou te fasiotia aʻu, ua outou faaee i o outou luga, o luga o lenei aai ma luga o ē o loo nonofo ai, le toto o lē ua lē sala, auā e moni na auina mai aʻu e Ieova iā te outou, e fai atu upu uma ua outou faalogo mai i ai.”
16 Ona fai atu lea o perenise ma le nuu uma i ositaulaga ma le ʻauperofeta: “E lē tatau ona faasala i le oti lenei tagata, auā na tautala mai o ia iā i tatou i le suafa o Ieova lo tatou Atua.”
17 E lē gata i lea, ua tutulaʻi nisi o toeaina o le nuu, ma faapea atu i le faapotopotoga uma o le nuu:
18 “Na faia valoaga e Mika+ le Morese i aso o Esekia+ le tupu o Iuta, ma na ia faapea mai i le nuu uma o Iuta, ‘O le mea lenei ua fetalai mai ai Ieova o ʻau:
“O le a suatia ai Siona e pei o se fanua,E avea fo‘i Ierusalema ma faaputuga o mea ua faatafunaina,+Ma e avea le mauga o le Fale* e pei o mea maualuluga i se vaomatua.”’+
19 “Pe na fasiotia ea o ia e Esekia le tupu o Iuta ma i latou uma o Iuta? Pe e leʻi mataʻu ea o ia iā Ieova ma ‘ai‘oi atu mo le finagalo malie o Ieova, ma suia ai le manatu o* Ieova i le mala na ia fetalai ai e oo iā i latou?+ O le mea lea, o le a tatou faaoo mai se mala tele iā i tatou lava.
20 “Sa iai foʻi se isi tagata na vavalo mai i le suafa o Ieova, o Uria le atalii o Semaia mai i Kiriata-iarima,+ o lē na vavalo i mea leaga e oo i lenei aai ma lenei nuu, e pei o upu a Ieremia.
21 Ina ua faalogo i ai le tupu o Ioakima,+ o ona tagata malolosi uma, ma perenise uma i nei upu, ona saʻili lea o le tupu e fasioti iā te ia.+ Ina ua faalogo i ai Uria, ona fefe ai lea o ia ma sola atu i Aikupito.
22 Ona aauina atu lea e le tupu o Ioakima o Elenatana+ le atalii o Akapora, ma isi tagata faatasi ma ia i Aikupito.
23 Ua latou aumaia Uria mai i Aikupito ma avatu o ia i le tupu o Ioakima, ona ia fasia lea o ia i le pelu+ ma lafo lona tino oti i le tuugamau o tagatānuu.”
24 Peitaʻi, na puipuia Ieremia e Aikamo+ le atalii o Safana,+ ina ia lē tuuina atu o ia i lima o le nuu e fasioti iā te ia.+
Faamatalaga Pito i Lalo
^ Po o le “tautala atu i tagata.”
^ Po o le “ifo.”
^ Po o le “ona ou faanoanoa lea.”
^ Po o le “faatonuga.”
^ Epe., “alapō ma aauina atu.”
^ Po o le “ona faanoanoa ai lea.”
^ Po o le “mauga o le malumalu.”
^ Po o le “ma faanoanoa ai.”
