Ieremia 28:1-17
-
Feteenaʻiga a Ieremia ma le perofeta pepelo o Hanania (1-17)
28 I lenā lava tausaga, i le amataga o le nofoaiga a Setekaia+ le tupu o Iuta, i le tausaga lona fā, i le masina lona lima, na faapea mai ai iā te aʻu le perofeta o Hanania le atalii o Asure mai i Kipeona,+ i le fale o Ieova i luma o ositaulaga ma le nuu uma:
2 “O le mea lenei ua fetalai mai ai Ieova o ʻau, o le Atua o Isaraelu, ‘Ou te gauia le amo a le tupu o Papelonia.+
3 A o leʻi mavae tausaga e lua, ou te toe aumaia i lenei mea o ipu uma o le fale o Ieova na ave e Nepukanesa le tupu o Papelonia mai i lenei mea, ma avatu i Papelonia.’”+
4 “‘Ou te toe faafoʻisia mai i lenei mea o Iekonia+ le atalii o Ioakima,+ le tupu o Iuta, ma ē uma na ave faapagota o Iuta na ō atu i Papelonia,’+ ua fetalai mai ai Ieova, ‘auā ou te gauia le amo a le tupu o Papelonia.’”
5 Ona fai atu lea o le perofeta o Ieremia iā Hanania le perofeta, i luma o ositaulaga ma luma o le nuu uma o ē o loo tutū i le fale o Ieova.
6 Ua fai atu le perofeta o Ieremia: “Amene!* Tau ina ia faia faapea e Ieova! Tau ina ia faataunuu e Ieova au upu ua e vavalo mai ai, i le toe aumaia o ipu o le fale o Ieova ma ē uma na ave faapagota mai i Papelonia i lenei mea!
7 Ae seʻi e faalogo mai faamolemole i lenei fe‘au ou te tautala atu ai iā te oe ma le nuu uma.
8 O perofeta foʻi na muamua atu iā te aʻu ma na muamua atu iā te oe i aso anamua, na latou vavalo atu foʻi e faatatau i le tele o nuu ma malo tetele, o taua, o mala, ma faamaʻi.
9 Pe a vavalo se perofeta i le filemu, ma pe a taunuu le upu a lea perofeta, ona iloa ai lea e moni o le perofeta lea na auina mai e Ieova.”
10 Ona tago ai lea o le perofeta o Hanania i le amo sa i le ua o le perofeta o Ieremia, ma ia gauia.+
11 Ona fai mai lea o Hanania i luma o le nuu uma: “O le mea lenei ua fetalai mai ai Ieova, ‘E faapenei ona ou gauia le amo a Nepukanesa le tupu o Papelonia mai i ua o atunuu uma, a o leʻi mavae tausaga e lua.’”+ Ona alu ai lea o le perofeta o Ieremia i lona ala.
12 Ina ua uma ona gauia e le perofeta o Hanania le amo mai i le ua o le perofeta o Ieremia, ona oo mai lea o le fe‘au lenei a Ieova iā Ieremia:
13 “Ia e alu ma fai atu iā Hanania, ‘O le mea lenei ua fetalai mai ai Ieova: “Ua e gauia amo laau,+ ae e te faia amo uʻamea e sui ai.”
14 Auā o le mea lenei ua fetalai mai ai Ieova o ʻau, o le Atua o Isaraelu: “Ou te faaee le amo uʻamea i ua o nei atunuu uma, e auauna ai iā Nepukanesa le tupu o Papelonia, ma e latou te auauna atu iā te ia.+ Ou te tuuina atu foʻi manufeʻai o le fanua iā te ia.”’”+
15 Ona fai atu lea o le perofeta o Ieremia i le perofeta o Hanania:+ “Hanania e, inā faalogo mai ia faamolemole! E leʻi auina mai oe e Ieova, ae ua e faatupuina i lenei nuu le faatuatua i upu pepelo.+
16 O le mea lea ua fetalai mai ai Ieova, ‘Faauta! ou te aveesea oe mai i luga o le fogāeleele. E te oti lava i le tausaga lenei, auā ua e uuna‘ia le nuu e fouvale iā Ieova.’”+
17 Ona oti ai lea o le perofeta o Hanania i lenā tausaga, i le masina lona fitu.
Faamatalaga Pito i Lalo
^ Po o le “O lea lava!”
