Ieremia 34:1-22
34 O le afioga a Ieova na oo mai iā Ieremia, a o tau Nepukanesa le tupu o Papelonia, o ana ʻautau uma, o malo uma o le lalolagi, o ē o loo ia pule ai, ma nuu uma, faasaga iā Ierusalema ma ona aai uma,+ ua faapea mai:
2 “O le mea lenei ua fetalai mai ai Ieova le Atua o Isaraelu, ‘Inā alu ia ma fai atu iā Setekaia+ le tupu o Iuta, ia e faapea atu iā te ia: “O le mea lenei ua fetalai mai ai Ieova, ‘Ou te tuuina atu lenei aai i le lima o le tupu o Papelonia, ma e susunuina e ia i le afi.+
3 Ae e te lē sao mai i lona lima, auā e puʻea lava oe ma tuuina atu iā te ia.+ E faafesagaʻi lava ou mata ma mata o le tupu o Papelonia, e lua te talanoa faafesagaʻi foʻi, ma e te alu atu lava i Papelonia.’+
4 Peitaʻi, ia e faalogo mai i le afioga a Ieova, Setekaia e, le tupu o Iuta, ‘O le mea lenei ua fetalai mai ai Ieova e faatatau iā te oe: “E te lē oti i le pelu.
5 Ae e te oti ma le filemu,+ ma e latou te faamūina mea manogi pe a tanuina oe e pei ona latou faia mo ou tamā, o tupu anamua o ē na muamua atu iā te oe, ma e latou te faavauvau mo oe e faapea, ‘Auē! le matai e!’ auā ‘ua ou fai atu lenei upu,’ ua fetalai mai ai Ieova.”’”’”
6 Ona fai atu lea e le perofeta o Ieremia iā Setekaia le tupu o Iuta o nei upu uma i Ierusalema,
7 a o tau ʻautau a le tupu o Papelonia ma Ierusalema, o aai uma o Iuta na totoe,+ ma Lakisa+ ma Aseka;+ auā e na o le pau ia o aai malupuipuia na totoe i aai o Iuta.
8 O le afioga a Ieova na oo mai iā Ieremia, ina ua mavae ona osia e le tupu o Setekaia se feagaiga ma le nuu uma o ē na i Ierusalema, e folafola atu iā i latou le saʻolotoga,+
9 ina ia faasaʻoloto e tagata uma a latou pologa Eperu, o le tane ma le fafine, ina ia lē toe faia e se tasi sona uso Iutaia ma ana pologa.
10 O lea, ua usiusitaʻi perenise uma ma le nuu uma. Na latou mulimuli i le feagaiga, ina ia faasaʻoloto e tagata uma a latou tane ma fafine pologa, ma lē toe faia i latou ma pologa. Ona latou usiusitaʻi lea ma tuu atu i latou e ō.
11 Ae mulimuli ane, na latou toe aumaia tane ma fafine pologa o ē na latou faasaʻolotoina, ma toe faamalosia i latou e fai ma pologa.
12 Ona oo mai lea o le afioga a Ieova iā Ieremia mai iā Ieova, ua faapea mai:
13 “O le mea lenei ua fetalai mai ai Ieova le Atua o Isaraelu, ‘Na ou osia le feagaiga ma o outou augātamā,+ i le aso na ou aumaia ai i latou mai i le nuu o Aikupito, mai i le mea na latou nofo pologa ai,+ e faapea:
14 “I le iʻuga o tausaga e fitu, ia taʻitasi outou ma faasaʻoloto lona uso Eperu, o lē na faatauina atu iā te oe ma o lē foʻi na auauna iā te oe i tausaga e ono; ia e faasaʻolotoina o ia.”+ Ae e leʻi faalogo mai o outou augātamā pe uaʻi mai foʻi o latou taliga iā te aʻu.
15 Ae talu ai nei,* ua outou liliu mai ma faia le mea e tonu i oʻu luma, e ala i le folafola atu o le saʻolotoga i o outou uso a tagata, ma outou osia se feagaiga i oʻu luma i le fale ua taʻua ai loʻu igoa.
16 Ae ua outou liliuese ma faaleaga loʻu igoa,+ e ala i le toe aumaia o a outou tane ma fafine pologa, o ē na outou faasaʻolotoina e tusa ma la latou lava faitalia, ma outou toe faamalosia i latou e fai ma pologa.’
17 “O le mea lea ua fetalai mai ai Ieova: ‘Ua outou lē usiusitaʻi iā te aʻu i le folafola atu o le saʻolotoga, e taʻitasi i lona uso ma lana aumea.+ O lea, ou te folafola atu iā te outou le saʻolotoga,’ ua fetalai mai ai Ieova, ‘i le pelu, i le faamaʻi, ma le oge,+ ma ou te faia outou ma mea e fefefe ai malo uma o le lalolagi.+
18 O le mea lenei e tupu i tagata ua solia laʻu feagaiga, e ala i le lē tausisia o upu o laʻu feagaiga na latou faia i oʻu luma, ina ua latou isiluaina le tamaʻi povi ma ui ane i le vā o mea na isiluaina,+
19 o perenise o Iuta, o perenise o Ierusalema, o tagata aloaʻia, o ositaulaga, ma tagata uma o le nuu, o ē na ui ane i le vā o le tamaʻi povi na isiluaina:
20 Ou te tuuina atu i latou i o latou fili ma ē o loo saʻili e fasioti i latou, e avea foʻi o latou tino oti ma meaʻai a manufelelei o le lagi ma manu o le fanua.+
21 Ou te tuuina atu foʻi Setekaia le tupu o Iuta ma ona perenise, i lima o o latou fili ma lima o ē o loo saʻili e fasiotia i latou, ma lima o ‘autau a le tupu o Papelonia+ o ē ua solomuli mai iā te outou.’+
22 “‘O le a ou poloaʻi atu,’ ua fetalai mai ai Ieova, ‘ma ou te toe faafoʻisia mai i latou i lenei aai, e latou te tau ai ma puʻea ma susunu i le afi;+ ou te faia foʻi aai o Iuta e avea ma mea tuufua, e leai se tasi e nofo ai.’”+
Faamatalaga Pito i Lalo
^ Epe., “i le aso nei.”
