Ieremia 35:1-19
-
Faaalia e tagata Rakapa le usiusitaʻi (1-19)
35 O le afioga a Ieova na oo mai iā Ieremia i aso o Ioakima+ le atalii o Iosia, o le tupu o Iuta, e faapea:
2 “Ia e alu i le aiga o tagata Rakapa,+ ia e tautala atu iā i latou ma aumaia i latou i le fale o Ieova i se tasi o potu ʻai;* ona e avatu lea iā i latou o le uaina e feinu ai.”
3 Ona ou ave ai lea o Iaasenaia le atalii o Ieremia le atalii o Havasinia, o ona uso, o ona atalii uma, ma le aiga uma o tagata Rakapa
4 i le fale o Ieova. Na ou aumaia i latou i le potu ʻai o atalii o Hanana le atalii o Iketalia, o le tagata o le Atua moni, sa i tafatafa o le potu ʻai o perenise lea sa i luga aʻe o le potu ʻai o Maaseia le atalii o Saluma, o le leoleo faitotoʻa.
5 Ona ou tuuina atu lea i luma o le fanauga o le aiga o tagata Rakapa o ipu faaofuofu ma ipu e inu ai ua tutumu i le uaina, ma faapea atu iā i latou: “Inā feinu ia i le uaina.”
6 Ae ua latou faapea mai: “E matou te lē feinu i le uaina, auā na tuuina mai e Ionatapa+ le atalii o Rakapa, o lo matou augātamā lenei poloaʻiga iā i matou, ‘Aua lava neʻi outou feinu i le uaina, o outou ma a outou fanau.
7 Aua tou te fausia se fale, pe lūlūina se fatu, pe totōina se togāvine pe fai foʻi mo outou. Nai lo o lea, ia outou nonofo pea i faleʻie, ina ia ola ai pea outou i aso e tele i luga o le laueleele o loo outou nonofo ai o ni tagata ese.’
8 O lea, ua matou usiusitaʻi pea i le upu a Ionatapa le atalii o Rakapa lo matou augātamā, i mea uma na poloaʻi mai ai o ia iā i matou, e ala i le lē inuina lava o se uaina, o i matou, o a matou avā, o o matou atalii, ma o matou afafine.
9 E matou te lē fausia ni fale e nonofo ai, e leai foʻi ni o matou togāvine, o fanua, po o ni fatu.
10 O loo matou nonofo pea i faleʻie ma usiusitaʻi i mea uma na poloaʻi mai ai Ionatapa lo matou augātamā iā i matou.
11 Ae ina ua sau Nepukanesa le tupu o Papelonia e tau faasaga i le nuu,+ ona matou faapea ane lea, ‘Inā ō mai ia, seʻi o tatou ō atu i Ierusalema e sosola ese ai mai i le ʻautau a tagata Kaletaia ma tagata Suria,’ ma o lenei ua matou nonofo ai i Ierusalema.”
12 Ona oo mai lea o le afioga a Ieova iā Ieremia, ua faapea mai:
13 “O le mea lenei ua fetalai mai ai Ieova o ʻau, o le Atua o Isaraelu, ‘Inā alu ia ma fai atu i tagata o Iuta ma ē o loo nonofo i Ierusalema: “Pe e leʻi faalaeiauina pea outou ina ia usiusitaʻi mai i aʻu upu?”+ ua fetalai mai ai Ieova.
14 “Na poloaʻi mai Ionatapa le atalii o Rakapa i ē na tupuga mai iā te ia e aua le feinu i se uaina, ma ua latou mulimuli i ana upu i le lē feinu ai lava e oo mai i le aso nei, o lea, ua latou usiusitaʻi ai i le poloaʻiga a lo latou augātamā.+ Peitaʻi, na ou tautala atu pea lava pea* iā te outou, ae e tou te leʻi usiusitaʻi mai iā te aʻu.+
15 Na ou aauina atu pea iā te outou o aʻu auauna uma o le ʻauperofeta, na ou aauina atu pea lava pea* i latou, + ua faapea atu, ‘Faamolemole, inā taʻitasi ia outou ma liliuese mai i lona ala leaga,+ ma fai le mea saʻo! Aua le mulimuli atu i isi atua ma auauna iā i latou. Ona outou nonofo pea lea i le laueleele na ou tuuina atu iā te outou ma o outou augātamā.’+ Ae e leʻi uaʻi mai o outou taliga pe faalogo mai foʻi iā te aʻu.
16 Ua faia e ē na tupuga mai iā Ionatapa le atalii o Rakapa le poloaʻiga na tuuina atu e lo latou augātamā iā i latou,+ ae o lenei nuu, ua lē faalogo mai iā te aʻu.”’”
17 “O lea, o le mea lenei ua fetalai mai ai Ieova, o le Atua o ʻau, o le Atua o Isaraelu: ‘Ou te aumaia i luga o Iuta ma luga o ē uma o loo nonofo i Ierusalema, le mala uma na ou lapataʻia ai i latou,+ auā na ou tautala atu iā i latou, ae ua latou lē faalogo mai, ma na ou valaau atu pea iā i latou, ae ua latou lē tali mai.’”+
18 Ua fai atu foʻi Ieremia i le aiga o tagata Rakapa: “O le mea lenei ua fetalai mai ai Ieova o ʻau, o le Atua o Isaraelu, ‘Ona ua outou usiusitaʻi i le poloaʻiga a Ionatapa lo outou augātamā, ma tausia pea ana poloaʻiga uma ma faia e tusa ma mea uma na ia faatonuina ai outou,
19 o le mea lea ua fetalai mai ai Ieova o ʻau, o le Atua o Isaraelu: “E lē motu ona iai mai i ē e tupuga mai iā Ionatapa le atalii o Rakapa, o se tagata e auauna i oʻu luma.”’”
Faamatalaga Pito i Lalo
^ Po o “i se tasi o potu.”
^ Epe., “alapō ma tautala atu.”
^ Epe., “alapō ma aauina atu.”