Ieremia 36:1-32
36 I le tausaga lona fā o le nofoaiga a Ioakima+ le atalii o Iosia, o le tupu o Iuta, na oo mai ai lenei afioga a Ieova iā Ieremia, e faapea:
2 “Ia e ave se tusi tāʻai* ma tusia ai upu uma na ou fai atu ai iā te oe faasaga iā Isaraelu, o Iuta,+ ma atunuu uma,+ talu mai le aso muamua na ou tautala atu ai iā te oe i aso o Iosia e oo mai i le aso nei.+
3 Atonu pe a faalogo i ai i latou o le aiga o Iuta i mala uma ua ou manatu e faaoo iā i latou, ona latou liliuese lea mai i o latou ala leaga, ina ia ou faamagaloina a latou mea sesē ma la latou agasala.”+
4 Ona valaau lea e Ieremia o Paruka+ le atalii o Neria, ma na faalau atu e Ieremia upu uma na fetalai mai ai Ieova iā te ia, ma na tusia e Paruka i le tusi tāʻai.*+
5 Ona poloaʻi atu lea o Ieremia iā Paruka: “Ua taofia aʻu ma ua lē mafai ona ou ulu atu i le fale o Ieova.
6 O lea, o oe e tatau ona e ulu atu i ai ma faitau leotele afioga a Ieova mai i le tusi tāʻai na e tusia a o oʻu faalauina atu. Ia e faitau atu a o faalogo le nuu i le fale o Ieova i le aso e anapopogi ai; e te faitauina atu i tagata uma o Iuta o loo ō mai mai i o latou aai.
7 Atonu e faafofoga mai Ieova i la latou talosaga atu mo lona finagalo malie, ona liliuese lea o i latou, e taʻitasi mai i lona ala leaga, auā ua matuā tele le toʻasā ma le toʻatamaʻi o Ieova, ua fetalai mai ai i lenei nuu.”
8 O lea, na faia e Paruka le atalii o Neria, o mea uma na poloaʻi atu ai le perofeta o Ieremia iā te ia; na ia faitau leotele mai i le tusi tāʻai* afioga a Ieova i le fale o Ieova.+
9 I le tausaga lona lima o le nofoaiga a Ioakima+ le atalii o Iosia, o le tupu o Iuta, i le masina lona iva, na talaʻi atu ai e le nuu uma i Ierusalema ma tagata uma na ō mai mai aai o Iuta e ō atu i Ierusalema, se anapogi i luma o Ieova.+
10 Ona faitau leotele lea e Paruka mai i le tusi tāʻai* o upu a Ieremia i le fale o Ieova, i le potu* o Kimaria+ le atalii o Safana+ le tusiupu, i le lotoā i luga, i le mea e ulu atu ai i le faitotoʻa fou o le fale o Ieova,+ a o faalogo le nuu uma.
11 Ina ua faalogo i ai Mekaio le atalii o Kimaria le atalii o Safana i afioga uma a Ieova mai i le tusi tāʻai,*
12 ona alu ifo lea o ia i le fale o le tupu, i le potu o le failautusi. O loo nonofo mai ai perenise* uma: o Elisama+ le failautusi, o Talaia le atalii o Semaia, o Elenatana+ le atalii o Akapora,+ o Kimaria le atalii o Safana, o Setekaia le atalii o Hanania, ma isi perenise uma.
13 Ona taʻu atu lea e Mekaio iā i latou o upu uma na ia faalogo i ai, ina ua faitau e Paruka le tusi tāʻai* a o faalogo i ai le nuu.
14 Ona auina atu lea e perenise uma iā Paruka o Ieuti le atalii o Netanaia le atalii o Selemia le atalii o Kusi, ua faapea atu: “Ia e sau ma aumai le tusi tāʻai lea na e faitauina atu a o faalogo i ai le nuu.” Ona ave lea e Paruka le atalii o Neria o le tusi tāʻai i lona lima, ma alu atu iā i latou.
15 Ua latou fai mai iā te ia: “Seʻi e nofo i lalo faamolemole ma faitau leotele mai iā i matou.” Ona faitau atu lea e Paruka iā i latou.
16 Ina ua latou faalogo i nei upu uma, ona tepa atu lea o le tasi i le isi ma le matataʻu, ma ua latou faapea mai iā Paruka: “E tatau lava ona matou taʻu atu i le tupu nei upu uma.”
17 Ua latou fesili mai iā Paruka: “Seʻi taʻu mai faamolemole iā i matou pe na faapefea ona e tusia nei upu uma. Pe na ia faalauina atu?”
18 Ona tali atu lea o Paruka iā i latou: “Na ia faalauina mai nei upu uma iā te aʻu, ona ou tusia lea i se vaitusi i lenei tusi tāʻai.”*
19 Ua fai mai perenise iā Paruka: “Inā ō ia ma oulua lalafi, o oe ma Ieremia, ma aua neʻi iloa e se tasi le mea o loo oulua iai.”+
20 Ona latou ō atu lea i le tupu i le lotoā, ma tuu le tusi tāʻai i le potu o Elisama le failautusi, ma ua latou taʻu atu i le tupu o mea uma na latou faalogo ai.
21 Ona auina atu lea e le tupu o Ieuti+ ina ia aumai le tusi tāʻai, ma ua ia aumai le tusi mai i le potu o Elisama le failautusi. Ua faitau e Ieuti le tusi tāʻai a o faalogo i ai le tupu, ma perenise uma o loo tutū i tafatafa o le tupu.
22 Sa nofo le tupu i le fale mo le tau mālūlū, i le masina lona iva,* ma sa mumū foʻi le taʻinafi i ona luma.
23 Ina ua uma ona faitau e Ieuti ni vaega se tolu pe fā o le tusi tāʻai, ona tipi ese ai lea e le tupu o lenā vaega i le naifi a le failautusi, ma lafo i le afi o loo mumū, seʻia oo ina mū atoa le tusi tāʻai i le afi.
24 E leʻi fefefe i latou; e leʻi saeia foʻi e le tupu ma ana auauna uma o latou ofu, o ē na faalogo i nei upu uma.
25 E ui na ʻaiʻoi atu Elenatana,+ o Talaia,+ ma Kimaria+ i le tupu e aua le susunuina le tusi tāʻai, ae e leʻi faalogo o ia iā i latou.
26 Na poloaʻia foʻi e le tupu Ieramaelu le atalii o le tupu, o Seraia le atalii o Aserielu, ma Selemia le atalii o Apitelu, ina ia pupuʻe mai Paruka le failautusi ma le perofeta o Ieremia, peitaʻi, na natia pea i laʻua e Ieova.+
27 Ona toe oo mai lea o le afioga a Ieova iā Ieremia, ina ua uma ona susunu e le tupu le tusi tāʻai na iai upu na tusia e Paruka ia na faalauina atu e Ieremia,+ e faapea:
28 “Ia e toe ave se isi tusi tāʻai, ma tusia ai upu uma ia sa i le tusi tāʻai muamua, lea na susunu e Ioakima le tupu o Iuta.+
29 Ia e fai atu iā Ioakima le tupu o Iuta, ‘O le mea lenei ua fetalai mai ai Ieova: “Ua e susunu lenei tusi tāʻai ma e faapea mai, ‘Aiseā na e tusia ai i le tusi tāʻai: “E sau lava le tupu o Papelonia ma faaumatia lenei nuu, ma aveesea ai tagata ma manu o loo iai”?’+
30 O lea, o le mea lenei ua fetalai mai ai Ieova faasaga iā Ioakima le tupu o Iuta, ‘E leai se tasi mai iā te ia e nofo i le nofoālii o Tavita,+ e tuulafoaʻiina foʻi lona tino oti i le vevela o le ao ma le mālūlū o le pō.+
31 Ou te taui atu foʻi iā te ia, o ē e tupuga mai iā te ia, ma ana auauna ona o a latou mea sesē, ou te faaoo atu foʻi iā i latou, o ē o loo nonofo i Ierusalema, ma tagata o Iuta, o mala uma na ou fai atu ai e oo iā i latou,+ ae ua latou lē faalogo mai lava.’”’”+
32 Ona ave lea e Ieremia o le isi tusi tāʻai ma tuuina atu iā Paruka le atalii o Neria, o le failautusi,+ ma ua ia tusia ai a o faalauina atu e Ieremia, o upu uma o le tusi tāʻai* lea na susunu i le afi e Ioakima le tupu o Iuta.+ Ua faaopoopo atu foʻi i ai le tele o isi upu faapena.
Faamatalaga Pito i Lalo
^ Epe., “se tusi tāʻai o le tusi.”
^ Epe., “le tusi tāʻai o le tusi.”
^ Po o le “tusi.”
^ Po o le “tusi.”
^ Po o le “potu ʻai.”
^ Po o le “tusi.”
^ Po o “tagata aloaʻia.”
^ Po o le “tusi.”
^ Po o le “tusi.”
^ Po o le “tusi.”
