Ieremia 38:1-28
38 Ua faalogo Sefatia le atalii o Matana, o Ketalia le atalii o Pasura, o Iukali+ le atalii o Selemia, ma Pasura+ le atalii o Malakia i upu na tautala atu ai Ieremia i le nuu uma, e faapea:
2 “O le mea lenei ua fetalai mai ai Ieova, ‘O lē e nofo pea i lenei aai, e oti i le pelu, i le oge, ma le faamaʻi.+ A o lē e tuuina atu o ia* i le ʻau Kaletaia, e ola pea o ia, ma e avea foʻi lona ola ma ona taui* ma ola ai.’+
3 O le mea lenei ua fetalai mai ai Ieova, ‘E tuuina atu lava lenei aai i le ʻautau a le tupu o Papelonia, ma e na te faatoʻilaloina.’”+
4 Ua faapea atu perenise i le tupu: “Faamolemole, ia fasiotia lenei tagata,+ auā ua ia faavaivaia loto* o fitafita o ē o totoe i lenei aai, faapea foʻi loto o le nuu uma, e ala i le tautala atu iā i latou i nei upu. Auā e lē o saʻili lenei tagata i le filemu o lenei nuu, a o lo latou malaia.”
5 Ona tali mai lea o le tupu o Setekaia: “Faauta! Ua i o outou lima o ia, auā e leai se mea e mafai ona faia e le tupu e taofia ai outou.”
6 Ona latou ave lea o Ieremia ma lafo o ia i le vaieli o Malakia le atalii o le tupu, sa i le Lotoā o le Leoleo.+ Na latou tuu ifo Ieremia i lalo i maea. E leai se vai i le vaieli, ae e na o le palapala, ma ua magoto ifo Ieremia i le palapala.
7 Ua faalogo Epete-meleka+ le Aitiope, o se eunuka* i le fale o le tupu, ua latou tuu Ieremia i totonu o le vaieli. O loo nofo le tupu i le Faitotoʻa o Peniamina,+
8 ona alu atu ai lea o Epete-meleka mai i le fale o le tupu, ma tautala atu i le tupu e faapea:
9 “Loʻu alii e le tupu, ua faia e nei tagata se mea leaga i le perofeta o Ieremia! Ua latou lafo o ia i totonu o le vaieli, ma e oti ai lava o ia i inā ona o le oge, auā ua leai se meaʻai ua totoe i le aai.”+
10 Ona poloaʻi atu lea o le tupu iā Epete-meleka le Aitiope: “Ia e ave ni tagata se toʻa 30 mai i lenei mea, ma ia ave aʻe le perofeta o Ieremia mai i le vaieli a o leʻi oti o ia.”
11 Ona ave lea e Epete-meleka o ia tagata, ma ō atu i le fale o le tupu i lalo ifo o le mea e teu ai oloa,+ ma aumai ai i inā ni ʻieʻie tuai masaesae ma fasi ʻie tuai masaesae, ma tuutuu ifo i lalo i le vaieli iā Ieremia e ala i maea.
12 Ua faapea atu Epete-meleka le Aitiope iā Ieremia: “Faamolemole, ia e tuu ʻieʻie masaesae ma fasi ʻie i lalo o ou ʻaoʻao e afei ai maea.” Ona faapea lea ona faia e Ieremia,
13 ma ua latou sisi aʻe Ieremia i maea ma aveese o ia mai i le vaieli. Ona nofo ai pea lea o Ieremia i le Lotoā o le Leoleo.+
14 Ua feʻau e le tupu o Setekaia le perofeta o Ieremia e sau iā te ia i le faitotoʻa lona tolu i le fale o Ieova, ona fai atu lea o le tupu iā Ieremia: “E iai se mea ou te fia fesili atu ai iā te oe. Aua neʻi e natia se mea mai iā te aʻu.”
15 Ona fai mai lea o Ieremia iā Setekaia: “Afai ou te taʻuina atu iā te oe, e te fasiotia lava aʻu. Afai foʻi ou te fautua atu iā te oe, e te lē faalogo mai iā te aʻu.”
16 Ona tautō faalilolilo lea o le tupu o Setekaia iā Ieremia e faapea: “Ou te tautō iā Ieova le Atua soifua, o lē na foaʻiina mai iā i taʻua le ola, ou te lē fasiotia oe, ou te lē tuuina atu foʻi oe i nei tagata o loo saʻili e fasiotia oe.”
17 Ona fai mai lea o Ieremia iā Setekaia: “O le mea lenei ua fetalai mai ai Ieova le Atua o ʻau, o le Atua o Isaraelu, ‘Afai e te tuuina atu oe* i perenise a le tupu o Papelonia, o le a faasaoina lou ola, ma e lē susunuina foʻi lenei aai i le afi, ma e faasaoina oe ma lou aiga.+
18 Ae afai e te lē tuuina atu oe* i perenise a le tupu o Papelonia, e tuuina atu lenei aai i le ʻau Kaletaia, ma e latou te susunuina i le afi,+ e te lē sao foʻi mai i o latou lima.’”+
19 Ona fai atu lea o le tupu o Setekaia iā Ieremia: “Ou te fefe i tagata Iutaia o ē na sosola atu i le ʻau Kaletaia, auā afai e tuuina atu aʻu iā i latou, e latou te faileagaina aʻu.”
20 Ae ua fai mai Ieremia: “E lē tuuina atu oe iā i latou. Ia e faalogo faamolemole i le siʻufofoga o Ieova i mea ua ou fai atu ai iā te oe, ona manuia ai lea o oe ma e ola ai pea.
21 Ae afai e te musu e te alu, o le mea lenei ua faailoa mai e Ieova iā te aʻu:
22 Faauta! O fafine uma na totoe i le fale o le tupu o Iuta, ua taʻitaʻiina atu i perenise a le tupu o Papelonia,+ ma ua latou faapea atu,‘O tagata na e maufaatuatuaina,* ua latou faasesēina oe ma manumalo iā te oe.+
Ua latou faapogaia lou vae ia goto ifo i le palapala.
O lenei, ua tuumuli i latou.’
23 E latou te avatua i le ʻau Kaletaia au avā uma ma au fanau, e lē sao foʻi oe mai i o latou lima, ae e puʻea oe e le tupu o Papelonia,+ ma e susunuina foʻi lenei aai i le afi ona o oe.”+
24 Ua fai atu Setekaia iā Ieremia: “Aua neʻi iloa e se isi nei mea, ona e lē oti ai lea.
25 Afai foʻi e faalogo perenise na ou talanoa atu iā te oe, ma latou ō mai iā te oe ma faapea mai, ‘Faamolemole, ia taʻu mai iā i matou le mea na e talanoa ai i le tupu. Aua neʻi e natia se mea mai iā i matou, ona matou lē fasiotia ai lea o oe.+ O le ā le tala a le tupu na fai atu iā te oe?’
26 ia e tali atu iā i latou, ‘na ou talosaga atu i le tupu, e aua neʻi toe auina atu aʻu i le fale o Ionatana, neʻi oʻu oti ai i inā.’”+
27 Ona ō mai ai lea o perenise uma iā Ieremia ma tuufesili iā te ia. Ua ia taʻu atu iā i latou upu uma na poloaʻi atu ai le tupu. Ona latou lē toe fai mai lea o se tala iā te ia, auā e leai se tasi na faalogo i le talanoaga.
28 Ua nofo pea Ieremia i le Lotoā o le Leoleo+ seʻia oo i le aso na faatoʻilaloina ai Ierusalema; na iai pea o ia i inā ina ua faatoʻilaloina Ierusalema.+
Faamatalaga Pito i Lalo
^ Epe., “e alu atu.”
^ Epe., “ma vete.”
^ Epe., “lima.”
^ Po o “se tagata aloaʻia.”
^ Epe., “alu atu.”
^ Epe., “alu atu.”
^ Epe., “O tagata o loo tausia le filemu ma oe.”
