Ieremia 39:1-18
39 O le tausaga lona iva o le nofoaiga a Setekaia le tupu o Iuta, i le masina lona sefulu, na ō mai ai Nepukanesa le tupu o Papelonia ma lana ʻautau uma i Ierusalema, ma siʻomia ai.+
2 I le tausaga lona 11 o le nofoaiga a Setekaia, i le masina lona fā, i le aso lona iva o le masina, na latou faaleaga ai le pā o le aai.+
3 Ona ō mai ai lea o perenise uma a le tupu o Papelonia ma nonofo i le Faitotoʻa Tutotonu,+ o Nekala-saresa le Samaga, o Nepo-sarekima le Ravesarisa,* o Nekala-saresa le Ravemaka,* ma isi perenise uma a le tupu o Papelonia.
4 Ina ua iloa atu i latou e Setekaia le tupu o Iuta ma fitafita uma, ona latou sosola lea+ mai i le aai i le pō, e ui atu i le auala o le togālaau a le tupu, i le faitotoʻa i le vā o pā e lua, ma ua latou ō atu pea i le ala i Arapa.*+
5 Ae ua tuliloa i latou e le ʻautau a Kaletaia, ma na latou maua atu Setekaia i fanua laugatasi o le toafa o Ieriko.+ Na latou puʻea o ia ma ave aʻe iā Nepukanesa le tupu o Papelonia i Ripelu,+ i le nuu o Hamato,+ ina ia faamasinoina ai e ia o ia.
6 Ua fasiotia atalii o Setekaia i ona luma i Ripelu e tusa ai ma le poloaʻiga a le tupu o Papelonia, ma ua fasiotia foʻi tamālii uma o Iuta e tusa ai ma le poloaʻiga a le tupu o Papelonia.+
7 Ua ia faatauaso iā Setekaia, ona ia fusifusia lea o ia i faamau ʻapamemea, ina ia ave o ia i Papelonia.+
8 Ua susunuina foʻi e le ʻau Kaletaia le fale o le tupu ma fale o le nuu,+ ua latou soloia foʻi i lalo pā o Ierusalema.+
9 Na ave faapagota e Nepusatana+ le taʻitaʻi o leoleo i Papelonia tagata uma na totoe i le aai, o ē na sosola atu iā te ia, ma so o se tasi na totoe.
10 Ae na tuu pea e Nepusatana le taʻitaʻi o leoleo i le nuu o Iuta o nisi e sili ona matitiva o le nuu, o ē ua leai lava ni a latou mea. Na ia tuuina atu foʻi iā i latou togāvine ma fanua e galulue ai*+ i lea lava aso.
11 Na avatu foʻi e Nepukanesa le tupu o Papelonia iā Nepusatana le taʻitaʻi o leoleo o nei poloaʻiga e faatatau iā Ieremia:
12 “Ia e ave o ia ma vaai faalelei o ia; aua neʻi faia se mea leaga iā te ia, ma ia faia so o se mea e talosaga atu ai iā te oe.”+
13 Ona aauina atu lea o nisi e Nepusatana le taʻitaʻi o leoleo, o Nepusapana le Ravesarisa,* o Nekala-saresa le Ravemaka,* ma alii sili uma a le tupu o Papelonia
14 ma aveese Ieremia mai i le Lotoā o le Leoleo,+ ma tuu atu o ia iā Ketalia+ le atalii o Aikamo+ le atalii o Safana,+ ina ia aumai o ia i lona fale. Ona nofo ai lea o ia faatasi ma le nuu.
15 A o taofia Ieremia i le Lotoā o le Leoleo,+ na oo mai le afioga a Ieova iā te ia e faapea:
16 “Inā alu ia, ma e fai atu iā Epete-meleka+ le Aitiope, ‘O le mea lenei ua fetalai mai ai Ieova o ʻau, o le Atua o Isaraelu: “Ou te faataunuu lava aʻu upu i lenei aai, ia malaia ae e lē manuia, ma o le a e vaai i le faataunuuga i lenā lava aso.”’
17 “‘Ae ou te laveaʻi iā te oe i lenā aso,’ ua fetalai mai ai Ieova, ‘e lē tuuina atu foʻi oe i tagata o loo e fefe ai.’
18 “‘Auā ou te saunia lava se mea e te sao ai, ma e te lē paʻū i le pelu. E avea foʻi lou ola ma ou taui,*+ auā ua e faatuatua mai iā te aʻu,’+ ua fetalai mai ai Ieova.”
Faamatalaga Pito i Lalo
^ Pe e tusa ma se isi vaevaega o upu faa-Eperu, “o Nekala-saresa, o Samaga-nepo, o Sarekima, o Ravesarisa.”
^ Po o “lē e sili e faia faiga faaagaga (lē e sa‘ili faailoga i fetu).”
^ Po o “le fanua laugatasi o le toafa.”
^ Pe atonu “ma galuega mamafa.”
^ Po o “le tagata aloaʻia sili o le maota o le tupu.”
^ Po o “lē e sili e faia faiga faaagaga (lē e sa‘ili faailoga i fetu).”
^ Epe., “ma vete.”
