Ieremia 40:1-16
40 O le afioga na oo mai iā Ieremia mai iā Ieova, ina ua uma ona faasaʻoloto o ia mai i Rama+ e Nepusatana+ le taʻitaʻi o leoleo a le tupu. Na ia ave o ia i inā a o fusifusia i mea e loka ai lima, faatasi ma tagata uma o Ierusalema ma Iuta na ave faapagota, o ē na ave faapagota i Papelonia.
2 Ona ave lea o Ieremia e le taʻitaʻi o leoleo, ua faapea mai iā te ia: “Na valoia e Ieova lou Atua lenei mala e oo i lenei mea,
3 ma ua faaoo mai e Ieova e pei ona ia fetalai mai ai, auā ua outou agasala iā Ieova ma lē faalogo i lona siʻufofoga. O le mea lenā ua tupu ai lenei mea iā te outou.+
4 O lenei, ua ou tatalaina oe mai i mea na loka ai ou lima. Afai e lelei iā te oe ona ta ō i Papelonia, inā sau ia, ma ou te vaaia lelei oe. Ae afai e te lē manaʻo e ta te ō i Papelonia, aua e te sau. Faauta! O loo i ou luma le nuu uma. O fea lava e te fia alu i ai, inā alu ia i ai.”+
5 A o leʻi filifili Ieremia e toe foʻi atu, ua fai mai Nepusatana: “Inā toe foʻi atu ia iā Ketalia+ le atalii o Aikamo+ o le atalii o Safana,+ o lē na tofia e le tupu o Papelonia e pule i aai o Iuta, ma lua nonofo ma ia faatasi ma le nuu; po o fea foʻi e te fia alu i ai, inā alu ia i ai.”
Ona foaʻi mai lea e le taʻitaʻi o leoleo iā te ia o meaʻai ma se meaalofa, ma tuu atu o ia e alu.
6 Ona alu lea o Ieremia iā Ketalia le atalii o Aikamo i Mesepa,+ ua nonofo ma ia faatasi ma tagata o ē na totoe i le nuu.
7 Mulimuli ane, na faalogo i ai taʻitaʻi uma o ʻautau o ē na i le fanua ma a latou fitafita, ua tofia e le tupu o Papelonia Ketalia le atalii o Aikamo e pule i le nuu, ma ua ia tofia foʻi o ia e pule i tane, o fafine, ma tamaiti mai i ē e matitiva o le nuu, o ē e leʻi aveina faapagota i Papelonia.+
8 Ona latou ō mai loa lea iā Ketalia i Mesepa.+ O i latou nei o Isamaeli+ le atalii o Netanaia, o Ioanano+ ma Ionatana o atalii ia o Karea, o Seraia le atalii o Tanumeta, o atalii o Efai le tagata Netopa, ma Iaasenaia+ le atalii o le tagata Maakati, o i latou ma o latou tagata.
9 Ona tautō lea o Ketalia le atalii o Aikamo le atalii o Safana iā i latou ma o latou tagata, e faapea: “Aua le fefefe e auauna i le ʻau Kaletaia. Ia nonofo i le nuu ma auauna i le tupu o Papelonia, ona manuia ai lea o outou.+
10 A o aʻu, ou te nofo i Mesepa ina ia fai ma o outou sui i* le ʻau Kaletaia e ō mai iā i tatou. Ae e ao ona outou aoaoina le uaina, o fualaau ʻaina o le tau māfanafana, ma suāuu, ma tuu i totonu o a outou fagu ma nonofo i aai ua outou maua.”+
11 O tagata Iutaia uma foʻi sa i Moapi, Amoni, ma Etoma, faapea i latou sa iai i isi nuu uma, ua latou faalogo foʻi ua tuua e le tupu o Papelonia o ē na totoe o Iuta, ma ua ia tofia Ketalia le atalii o Aikamo le atalii o Safana e pule iā i latou.
12 Ona toe foʻi mai lea o tagata Iutaia uma mai i nofoaga uma na faataapeape i ai i latou, ua latou ō mai i le nuu o Iuta iā Ketalia i Mesepa. Ua latou aoaoina le uaina ma fualaau ʻaina o le tau māfanafana e matuā tele lava.
13 A o Ioanano le atalii o Karea ma taʻitaʻi uma o ʻautau o ē sa i le fanua, ua latou ō mai iā Ketalia i Mesepa.
14 Ua latou fai mai iā te ia: “Pe e te lē iloa ea ua auina mai e Paaliso le tupu o le fanauga a Amoni,+ o Isamaeli le atalii o Netanaia e fasioti iā te oe?”+ Ae e leʻi talitonu Ketalia le atalii o Aikamo iā i latou.
15 Ona fai mai faalilolilo lea o Ioanano le atalii o Karea iā Ketalia i Mesepa: “Ua ou fia alu e fasioti Isamaeli le atalii o Netanaia, ma e leai se isi e na te iloaina. Aiseā o le a ia fasioti ai iā te oe, aiseā foʻi o le a faataapeape ai i latou uma o Iuta o loo faapotopoto faatasi iā te oe, ma faaumatia ē o totoe o Iuta?”
16 Ae ua fai atu Ketalia+ le atalii o Aikamo iā Ioanano le atalii o Karea: “Aua e te faia lenei mea, auā e pepelo le mea ua e fai mai ai e faatatau iā Isamaeli.”
Faamatalaga Pito i Lalo
^ Epe., “ina ia tū i luma o.”
