Ieremia 41:1-18
41 I le masina lona fitu, na ō mai ai iā Ketalia le atalii o Aikamo i Mesepa,+ o Isamaeli+ le atalii o Netanaia le atalii o Elisama, o lē na tupuga mai i le aigātupu, ma o se tagata faamoemoeina a le tupu, faatasi ai ma isi tagata e toʻasefulu. A o latou aai faatasi i Mesepa,
2 ona tulaʻi lea o Isamaeli le atalii o Netanaia ma tagata e toʻasefulu na iā te ia, ma fasiotia Ketalia le atalii o Aikamo le atalii o Safana i le pelu. Ua ia fasiotia lē na tofia e le tupu o Papelonia e pule i le nuu.
3 Ua fasiotia foʻi e Isamaeli tagata Iutaia uma o ē na faatasi ma Ketalia i Mesepa, atoa ma fitafita Kaletaia na iai i inā.
4 I le aso lona lua talu ona fasiotia o Ketalia, a o leʻi iloaina e se tasi,
5 na ō mai ai tagata e toʻa 80 mai i Sekema,+ mai i Sailo,+ ma Samaria.+ Ua sele a latou ʻava, ua saeia o latou ofu, ua selei o latou tino,+ ma na latou aumaia i o latou lima taulaga i meaʻai ma lipano+ i le fale o Ieova.
6 Ona alu atu lea o Isamaeli le atalii o Netanaia mai i Mesepa e faafeiloaʻi i latou, ua tagi o ia a o savali atu. Ina ua ia fetaiaʻi ma i latou, ona ia faapea atu lea iā i latou: “Inā ō mai ia iā Ketalia le atalii o Aikamo.”
7 Ae ina ua latou oo mai i totonu o le aai, ona fasiotia ai lea o i latou e Isamaeli le atalii o Netanaia ma tagata sa iā te ia, ma lafo o latou tino i totonu o le vaieli.
8 Ae e toʻasefulu tagata sa iā i latou, o ē na faapea atu iā Isamaeli: “Aua neʻi fasiotia i matou, auā e iai mea ua matou natia i le fanua, o saito, o karite, o suāuu, ma le meli.” Ona ia lē faaoo lea o le oti iā i latou faatasi ma o latou uso.
9 Ua lafo e Isamaeli o tino oti uma o tagata na ia fasiotia i se vaieli e matuā telē lava, lea na faia e le tupu o Asa ona o Paasa le tupu o Isaraelu.+ O le vaieli lea na faatumu e Isamaeli le atalii o Netanaia i tino oti o i latou na fasiotia.
10 Ua ave faapagota e Isamaeli o ē uma na totoe o le nuu sa i Mesepa,+ e aofia ai afafine o le tupu ma le nuu uma na totoe i Mesepa, o ē na tuuina atu e Nepusatana le taʻitaʻi o leoleo i le vaavaaiga a Ketalia+ le atalii o Aikamo. Ona aveina faapagota lea o i latou e Isamaeli le atalii o Netanaia, ma ō atu e sopo atu i le fanauga a Amoni.+
11 Ina ua faalogo Ioanano+ le atalii o Karea ma taʻitaʻi uma o ʻautau na faatasi ma ia, i mea leaga uma na faia e Isamaeli le atalii o Netanaia,
12 ona latou ave lea o tagata uma ma ō atu e tau faasaga iā Isamaeli le atalii o Netanaia, ua latou maua o ia e lata ane i le vai tele* i Kipeona.
13 Ua fiafia le nuu uma sa faatasi ma Isamaeli, ina ua latou iloa atu Ioanano le atalii o Karea ma taʻitaʻi uma o ʻautau na faatasi ma ia.
14 Ona liliu mai lea o tagata uma na ave faapagota e Isamaeli mai i Mesepa,+ ma toe foʻi ma Ioanano le atalii o Karea.
15 Ae ua sosola Isamaeli le atalii o Netanaia ma tagata e toʻavalu sa faatasi ma ia mai iā Ioanano, ma ō atu i le fanauga a Amoni.
16 Ua ave e Ioanano le atalii o Karea ma taʻitaʻi uma o ʻautau sa faatasi ma ia, o ē uma na totoe o le nuu mai i Mesepa, o ē na latou laveaʻia mai iā Isamaeli le atalii o Netanaia, ina ua uma ona ia fasiotia o Ketalaia+ le atalii o Aikamo. Ua latou toe aumaia o tane, o fitafita, o fafine, o tamaiti, ma tagata aloaʻia mai i Kipeona.
17 Ona latou ō lea ma nonofo i le mea e api ai i Kimeama i tala ane o Peteleema,+ ina ia latou ō atu ai i Aikupito+
18 ona o le ʻau Kaletaia. Auā ua latou fefefe iā i latou, ona ua fasiotia e Isamaeli le atalii o Netanaia o Ketalaia le atalii o Aikamo, o lē na tofia e le tupu o Papelonia e pule i le nuu.+
Faamatalaga Pito i Lalo
^ Pe atonu “le vai tāʻele telē.”
