Ieremia 42:1-22
42 Ona faalatalata mai lea o taʻitaʻi uma o ʻautau, o Ioanano+ le atalii o Karea, o Iaasenaia le atalii o Hosaia, ma le nuu uma, e mai i ē e faatauvaa e oo i ē e sili,
2 ua faapea mai i le perofeta o Ieremia: “Seʻi faafofoga mai i la matou talosaga faamolemole, ma ia e tatalo atu iā Ieova lou Atua mo i matou, e fai ma sui o i matou uma o totoe, auā e toʻaitiiti i matou ua totoe+ mai i le toʻatele, e pei ona e vaai mai ai.
3 Tau ina ia faailoa mai e Ieova lou Atua iā i matou le auala e ao ona matou savavali ai, ma le mea e ao ona matou faia.”
4 Ona tali atu lea o le perofeta o Ieremia iā i latou: “Ua ou faalogo atu, ma ou te tatalo atu iā Ieova lo outou Atua e tusa ma la outou talosaga; ma o afioga uma e tali mai ai Ieova iā te outou, ou te taʻuina atu iā te outou. Ou te lē natia lava se upu mai iā te outou.”
5 Ona latou tali mai lea iā Ieremia: “Tau ina ia fai Ieova ma molimau moni ma le faamaoni iā i tatou, pe afai e matou te lē faia e tusa ma upu uma na poloaʻiina ai i matou e Ieova lou Atua e ala mai iā te oe.
6 Pe e lelei pe e leaga, ae e matou te faalogo lava i le siʻufofoga o Ieova lo tatou Atua o lē ua matou auina atu ai oe, ina ia manuia ai i matou pe a matou faalogo i le siʻufofoga o Ieova lo tatou Atua.”
7 Ina ua mavae aso e sefulu, ona oo mai ai lea o le afioga a Ieova iā Ieremia.
8 Ona ia valaau lea iā Ioanano le atalii o Karea, o taʻitaʻi uma o ʻautau o ē sa faatasi ma ia, ma le nuu uma, e mai i ē e faatauvaa e oo i ē e sili.+
9 Ua ia faapea atu iā i latou: “O le mea lenei ua fetalai mai ai Ieova le Atua o Isaraelu, o lē na outou auina i ai aʻu e faaoo atu i ona luma la outou talosaga mo lona finagalo malie:
10 ‘Afai e tou te nonofo pea i lenei nuu, ou te atiaʻe outou ma ou te lē lepetia outou, ou te totōina foʻi outou ma ou te lē liaʻiina outou, auā ua ou faanoanoa ona o le malaia ua ou faaoo atu iā te outou.+
11 Aua le fefefe i le tupu o Papelonia o lē ua outou matataʻu i ai.’+
“‘Aua tou te fefefe iā te ia,’ ua fetalai mai ai Ieova, ‘auā ou te faatasi ma outou, ina ia faaolaina outou ma laveaʻi iā te outou mai i lona lima.
12 Ou te alofa mutimutivale atu iā te outou,+ e alofa mutimutivale foʻi o ia iā te outou, ma toe faafoʻisia outou i lo outou laueleele.
13 “‘Ae afai e tou te faapea mai, “E leai, e matou te lē nonofo i lenei nuu!” ma outou lē faalogo i le siʻufofoga o Ieova lo outou Atua
14 e ala i le faapea mai, “E leai, e matou te ō i le nuu o Aikupito,+ i le mea e matou te lē vāai ai i se taua, pe faalogo i le leo o le pū, pe oge ai foʻi i meaʻai; o i inā e matou te nonofo ai,”
15 o lea, inā faalogo mai ia i le afioga a Ieova, o outou o ē o loo totoe o Iuta. O le mea lenei ua fetalai mai ai Ieova o ʻau, o le Atua o Isaraelu: “Afai e tou te maumauaʻi e ō i Aikupito, ma outou ō atu e aumau ai i inā,*
16 ona maua ai lea o outou e le pelu ua outou fefefe ai i le nuu o Aikupito, e mulimulituʻi foʻi iā te outou le oge ua outou matataʻu ai i Aikupito, ma o i inā e tou te feoti ai.+
17 O tagata uma foʻi e maumauaʻi e ō atu i Aikupito e aumau ai, e feoti i latou i le pelu, o le oge, ma le faamaʻi. E leai se isi o i latou e faasaoina pe sola ese mai i le mala ou te faaoo atu iā i latou.”’
18 “Auā o le mea lenei ua fetalai mai ai Ieova o ʻau, o le Atua o Isaraelu: ‘E pei ona ou liligi ifo o loʻu ita ma loʻu toʻasā i luga o ē o loo nonofo i Ierusalema,+ e faapea foʻi ona liligi ifo loʻu toʻasā iā te outou pe a outou ō atu i Aikupito, ma e faamalaiaina outou, e avea o se mea e fefefe ai, o le malaia, ma e faalumaina ai,+ e tou te lē toe vāai lava i lenei laueleele.’
19 “Ua fetalai mai Ieova faasaga iā te outou, o outou o ē ua totoe o Iuta. Aua tou te ō atu i Aikupito. Ia outou iloa lelei, ua ou lapataʻia outou i le aso nei
20 o le a fano o outou ola ona o a outou mea sesē. Auā na outou auina atu aʻu iā Ieova lo outou Atua, ma faapea mai, ‘Inā tatalo ia iā Ieova lo tatou Atua mo i matou, ma ia taʻu mai iā i matou mea uma ua fetalai mai ai Ieova lo tatou Atua, ma e matou te faia lava.’+
21 Ua ou taʻu atu iā te outou i le aso nei, ae e tou te lē faalogo mai i le siʻufofoga o Ieova lo outou Atua, pe faia se mea ua ia auina mai aʻu e faailoa atu iā te outou.+
22 O lenei, ia outou iloa lelei, o le a feoti outou i le pelu, o le oge, ma le faamaʻi, i le mea ua outou mananaʻo e ō atu ma aumau ai.”+
Faamatalaga Pito i Lalo
^ Po o le “aumau ai i inā mo sina taimi.”
