Ieremia 43:1-13
43 Ina ua uma ona tautala atu Ieremia i le nuu uma i afioga uma a Ieova lo latou Atua, o upu uma lava na auina mai o ia e Ieova lo latou Atua e taʻu atu iā i latou,
2 ona fai mai lea o Asaraia le atalii o Hosaia, o Ioanano+ le atalii o Karea, ma tagata faamaualuluga uma iā Ieremia: “E pepelo le mea ua e fai mai ai! E leʻi auina mai oe e Ieova lo tatou Atua e faapea mai, ‘Aua tou te ō atu i Aikupito e nonofo ai.’
3 Ae ua faaoso oe e Paruka+ le atalii o Neria e tautala mai faapenei iā i matou, ina ia tuuina atu i matou i le ʻau Kaletaia, e fasiotia ai i matou pe ave faapagota i Papelonia.”+
4 O lea, e leʻi faalogo Ioanano le atalii o Karea, o taʻitaʻi uma o ʻautau, ma le nuu uma i le siʻufofoga o Ieova, ina ia nonofo pea i le nuu o Iuta.
5 Nai lo o lea, ua ave e Ioanano le atalii o Karea ma taʻitaʻi uma o ʻautau, o ē uma na totoe o Iuta na toe foʻi mai i atunuu uma na faataapeape i ai e nonofo i le nuu o Iuta.+
6 Ua latou ave tane, o fafine, o tamaiti, o afafine o le tupu, ma tagata uma na tuua e Nepusatana+ le taʻitaʻi o leoleo e nonofo faatasi ma Ketalia+ le atalii o Aikamo+ le atalii o Safana,+ faapea le perofeta o Ieremia, ma Paruka le atalii o Neria.
7 Ua latou ō atu i le nuu o Aikupito, auā e latou te leʻi faalogo i le siʻufofoga o Ieova, ma na latou ō e oo atu lava i Tapenesa.+
8 Ona oo mai lea o le afioga a Ieova iā Ieremia i Tapenesa, ua faapea mai:
9 “Ia e ave i lou lima ni maa tetele, ma e natia ai i le paluga o simā i le mea o loo iai piliki, o loo i le mea e ui atu ai i le fale o Farao i Tapenesa, a o vaavaai atu tagata Iutaia.
10 Ia e fai atu iā i latou, ‘O le mea lenei ua fetalai mai ai Ieova o ʻau, o le Atua o Isaraelu: “Ou te aami iā Nepukanesa le tupu o Papelonia, o laʻu auauna,+ ma ou tuu lona nofoālii i luga tonu o maa na ou natia, e na te fofola atu ai lona faleʻie matagofie i luga o na maa.+
11 E sau o ia ma taia le nuu o Aikupito.+ O ai lava e tatau ona oti i le mala, o le a oti i le mala, o ai lava e tatau ona ave faapagota, o le a ave faapagota, ma o ai lava e tatau ona oti i le pelu, o le a oti i le pelu.+
12 Ou te faamūina i le afi fale* o atua o Aikupito,+ ma e na te susunuina i latou ma taʻitaʻi i latou e ave faapagota. E na te tāʻaia o ia lava i le nuu o Aikupito, e pei ona tāʻaia e le leoleo mamoe o ia lava i ona ofu, ma e alu ese atu mai i lea mea ma le filemu.*
13 E na te tuʻininiia poutū* o Pete-semesa* i le nuu o Aikupito, ma e na te susunuina i le afi fale* o atua o Aikupito.”’”
Faamatalaga Pito i Lalo
^ Po o “malumalu.”
^ Po o le “e aunoa ma le afāina.”
^ Po o “maa faamanatu.”
^ Po o le “Fale (Malumalu) o le Lā,” e faasino atu iā Eliopoli.
^ Po o “malumalu.”