Ieremia 44:1-30
44 O le upu na oo mai iā Ieremia mo tagata Iutaia uma na nonofo i le nuu o Aikupito,+ o ē na nonofo i Mekatala,+ o Tapenesa,+ o Nafi,*+ ma le nuu o Patoro,+ e faapea:
2 “O le mea lenei ua fetalai mai ai Ieova o ʻau, o le Atua o Isaraelu, ‘Ua outou vaaia le mala uma na ou aumaia i luga o Ierusalema+ ma luga o aai uma o Iuta, ma ua avea o se mea ua faatafunaina i le aso nei, ua leai foʻi se isi e nofo ai.+
3 Ona o mea leaga na latou faia e faatigā mai ai iā te aʻu, i le ō atu ma faia taulaga+ ma auauna atu i isi atua o ē e latou te leʻi iloa, e leʻi iloa foʻi e outou po o o outou augātamā.+
4 Na ou aauina atu pea iā te outou aʻu auauna uma o le ʻauperofeta, na ou aauina atu pea lava pea* i latou, ua faapea atu: “Faamolemole, aua lava neʻi o outou faia lenei mea inosia ou te ʻinoʻino i ai.”+
5 Ae e latou te leʻi faalogo mai pe uaʻi mai o latou taliga ina ia liliuese mai i a latou mea leaga, i le lē faia o taulaga i isi atua.+
6 O lea, ua liligi atu ai loʻu toʻasā ma loʻu ita, ma ua mū ai aai o Iuta ma auala o Ierusalema, ma ua avea o se mea ua faatafunaina ma faagaogaoina, e pei ona iai i le aso nei.’+
7 “O le mea lea ua fetalai mai ai Ieova, o le Atua o ʻau, o le Atua o Isaraelu, ‘Aiseā ua outou faatupu ai lenei mala tele iā te outou lava, ina ia faaumatia ai tane ma fafine uma, o tamaiti ma tamameamea mai i Iuta, ma leai ai sē e totoe mai iā te outou?
8 Aiseā e tou te faatigā mai ai iā te aʻu i galuega a o outou lima i le faia o taulaga i isi atua i le nuu o Aikupito, lea ua outou ō atu e nonofo ai? O le a fano outou ma avea ma malaia, ma mea e faalumaina ai i atunuu uma o le lalolagi.+
9 Po ua galo ea iā te outou amioga leaga a o outou augātamā, o amioga leaga a tupu o Iuta,+ o amioga leaga a a latou avā,+ faapea foʻi a outou lava amioga leaga, ma amioga leaga a a outou avā,+ na faia i le nuu o Iuta ma auala o Ierusalema?
10 E oo mai lava i le aso nei, e latou te leʻi faamaulalo iā i latou lava,* e leʻi matataʻu+ i latou pe savavali foʻi i laʻu tulafono ma aʻu faatonuga, na ou tuuina atu i o outou luma ma luma o o outou augātamā.’+
11 “O le mea lea ua fetalai mai ai Ieova o ʻau, o le Atua o Isaraelu, ‘Ua ou maumauaʻi e faaoo atu le malaia iā te outou, ina ia faaumatia ai Iuta uma.
12 Ou te ave ē o loo totoe o Iuta ua maumauaʻi e ō atu i le nuu o Aikupito e nonofo ai, ma e fano i latou uma i le nuu o Aikupito.+ E paʻuʻū i latou i le pelu ma e fano i latou i le oge; e mai i ē e faatauvaa e oo i ē e sili, e feoti i latou i le pelu ma le oge. E avea i latou ma mala, o se mea e fefefe ai, o le malaia, ma o se mea e faalumaina ai.+
13 Ou te faasala i latou o loo nonofo i le nuu o Aikupito e pei ona ou faasala o Ierusalema i le pelu, o le oge, ma le faamaʻi.+
14 E leai se isi o ē o loo totoe o Iuta ua ō atu e nonofo i le nuu o Aikupito, e sola ese pe e faasaoina e toe foʻi atu i le nuu o Iuta. E latou te naunau e toe foʻi e nonofo ai i inā, ae e latou te lē toe foʻi, seʻi vaganā ai nisi e sosola ese.’”
15 Ona tali mai lea iā Ieremia o tane uma o ē na iloa ua faia e a latou avā taulaga i isi atua, o avā uma o ē na tutū o se faapotopotoga tele, ma tagata uma o ē sa nonofo i le nuu o Aikupito+ i Patoro,+ e faapea:
16 “E matou te lē faalogo atu i le upu ua e tautala mai ai iā i matou i le suafa o Ieova.
17 Nai lo o lea, e matou te faia lava upu uma ua matou fai atu ai, ina ia faia taulaga i le Tupu Fafine o le Lagi* ma sasaa atu iā te ia taulaga i meainu,+ e pei ona faia e i matou, o o matou augātamā, o o matou tupu, ma o matou perenise, i aai o Iuta ma auala o Ierusalema, a o matou maoona i meaʻai ma manuia ai, e matou te leʻi iloa lava foʻi se mala.
18 Talu mai le taimi na matou lē faia ai taulaga i le Tupu Fafine o le Lagi* ma sasaa atu iā te ia taulaga i meainu, na matou matitiva i mea uma ma fano i le pelu ma le oge.”
19 Ua faaopoopo mai fafine: “Ina ua matou faia foʻi taulaga i le Tupu Fafine o le Lagi* ma sasaa atu iā te ia taulaga i meainu, pe na matou faia ea e aunoa ma le faatagaga a a matou tane ni keke o taulaga e tusa ma lona faatusa, ma sasaa atu iā te ia taulaga i meainu?”
20 Ona fai atu lea o Ieremia i le nuu uma, o tane ma a latou avā, ma le nuu uma na tali mai iā te ia:
21 “O taulaga na outou faia i aai o Iuta ma auala o Ierusalema, o outou, o o outou augātamā, o o outou tupu, o o outou perenise, ma tagata o le nuu,+ ua manatua e Ieova nei mea ma ua alu aʻe i lona loto!
22 Ua iʻu ina lē mafai ona toe onosaia e Ieova a outou gaoioiga leaga ma mea inosia na outou faia, o lea ua avea ai lo outou nuu ma mea ua faatafunaina, o se mea e fefefe ai ma o se mala, ua lē toe iai se isi e nofo ai, e pei ona iai i le aso nei.+
23 Ona ua outou faia nei taulaga ma ona ua outou agasala iā Ieova, e ala i le lē faalogo i le siʻufofoga o Ieova ma savavali i lana tulafono, o ana faatonuga, ma ana faamanatuga, o le mea lea ua oo ai lenei mala iā te outou, e pei ona iai i le aso nei.”+
24 Ua fai atu pea Ieremia i le nuu uma ma fafine uma: “Inā faalogo mai ia i le afioga a Ieova, o outou Iuta uma o loo i le nuu o Aikupito.
25 O le mea lenei ua fetalai mai ai Ieova o ʻau, o le Atua o Isaraelu, ‘O outou tane ma a outou avā, o mea ua tautatala ai o outou gutu, ua faataunuuina e o outou lima, auā ua outou faapea mai: “E matou te faataunuu lava a matou tautoga e faia taulaga i le Tupu Fafine o le Lagi* ma sasaa atu iā te ia taulaga i meainu.”+ O outou fafine, e tou te faia lava a outou tautoga, ma faataunuuina a outou tautoga.’
26 “O le mea lea, inā faalogo mai ia i le afioga a Ieova, o outou Iuta uma o loo nonofo i le nuu o Aikupito, ʻ“O aʻu lava ua ou tautō i loʻu igoa sili,” ua fetalai mai ai Ieova, “e lē toe taʻua lava loʻu igoa i se tautoga a so o se tagata o Iuta+ o loo i le nuu uma o Aikupito, e faapea, ‘Ou te tautō iā Ieova le Atua soifua le Alii Pule Silisili Ese!’+
27 O aʻu lava, ua ou mataala e aumaia le malaia ae lē o le manuia;+ e fano tagata uma o Iuta o loo i le nuu o Aikupito i le pelu ma le oge, seʻia lē toe iai lava i latou.+
28 E toʻaitiiti e sosola ese mai i le pelu ma toe foʻi mai i le nuu o Aikupito i le nuu o Iuta.+ O i latou uma o ē ua totoe o Iuta ua ō mai i le nuu o Aikupito e nonofo ai, o le a latou iloa po o le upu a ai e moni, po o le upu mai iā te aʻu po o i latou!”’”
29 “‘O le faailoga lenei iā te outou,’ ua fetalai mai ai Ieova, ‘ou te faasala outou i lenei mea, ina ia outou iloa ai e taunuu lava upu na ou folafola atu i le malaia e oo iā te outou.
30 O le mea lenei ua fetalai mai ai Ieova: “Ou te tuuina atu Farao Hofero le tupu o Aikupito, i lima o ona fili ma lima o i latou o loo saʻili e fasiotia o ia, e pei lava ona ou tuuina atu Setekaia le tupu o Iuta i le lima o Nepukanesa le tupu o Papelonia, o lona fili, ma o lē na saʻili e fasiotia o ia.”’”+
Faamatalaga Pito i Lalo
^ Po o “Mafi.”
^ Epe., “alapō ma aauina atu.”
^ Po o le “e leʻi nutimomoia o latou loto.”
^ O le faalupega o se atua fafine na ifo i ai tagata Isaraelu na fulitua i le tapuaʻiga moni; atonu o se atua fafine o le fanautama.
^ O le faalupega o se atua fafine na ifo i ai tagata Isaraelu na fulitua i le tapuaʻiga moni; atonu o se atua fafine o le fanautama.
^ O le faalupega o se atua fafine na ifo i ai tagata Isaraelu na fulitua i le tapuaʻiga moni; atonu o se atua fafine o le fanautama.
^ O le faalupega o se atua fafine na ifo i ai tagata Isaraelu na fulitua i le tapuaʻiga moni; atonu o se atua fafine o le fanautama.
