Ieremia 46:1-28
46 O le afioga lenei a Ieova na oo mai i le perofeta o Ieremia e faatatau i nuu ese:+
2 Mo Aikupito,+ e faatatau i le ʻautau a Farao Neko+ le tupu o Aikupito, o lē sa i tafatafa o le vaitafe o Eufirate ma na faatoʻilaloina i Karekimisa e Nepukanesa le tupu o Papelonia, i le tausaga lona fā o le nofoaiga a Ioakima+ le atalii o Iosia, le tupu o Iuta:
3 “Inā sauni ia a outou talita* ma talipupuni tetele,Ma agaʻi atu i le taua.
4 O outou tagata tiʻetiʻe solofanua, inā nonoa ia solofanua ma tiʻetiʻe ai.
Ia sauni ma fai o outou puloutau.
Ia faaiila tao ma oofu i o outou ofutau uʻamea.
5 ‘Aiseā ea ua ou iloa atu ai i latou ua matataʻu?
Ua solomuli i latou ma ua tuʻimomomoina o latou tagata totoa.
Ua sosola i latou i le fefefe, e leʻi toe liliu mai o latou tagata totoa.
Ua iai foʻi le mataʻu i itu uma,’ ua fetalai mai ai Ieova.
6 ‘Ua lē mafai ona sosola ese tagata televavave, ua lē mafai foʻi ona sao tagata totoa.
Ua tautevateva ma paʻuʻū i latouI le itu i mātū i tafatafa o le auvai o le vaitafe o Eufirate.’+
7 O ai lenei ua alu aʻe e pei o le vaitafe o le Naila,E pei o vaitafe ua fesouaʻiina ona vai?
8 Ua alu aʻe Aikupito e pei o le vaitafe o le Naila,+E pei o vaitafe ua fesouaʻiina ona vai,Ua faapea foʻi o ia, ‘Ou te alu aʻe ma ufitia le lalolagi.
Ou te faaumatia le aai ma i latou o loo nonofo ai.’
9 O outou solofanua e, inā ō aʻe ia!
O outou kariota e, ia ō atu saoasaoa!
Ia ō atu foʻi i luma tagata totoa,O tagata Kuso ma Futu, o ē o loo aveina le talipupuni,+Ma tagata Luti,+ o ē o loo aveina ma loloʻu* le ʻaufana.+
10 “O le aso lea o Ieova o ʻau, o le Alii Pule Silisili Ese, o le aso o le tauimasui e taui atu ai i ona fili. E ʻai le pelu ma maʻona ai, e inu ai foʻi seʻia malie i o latou toto, auā ua faia e Ieova o ʻau, o le Alii Pule Silisili Ese le taulaga* i le nuu o le itu i mātū i tafatafa o le vaitafe o Eufirate.+
11 Le tama teine taupou e, a Aikupito,Inā alu aʻe ia i Kiliata e aumai ni pasama.+
Ua e faateleina au mea e faamālōlō ai, ae e lē aogā,Auā e leai se togafiti mo oe.+
12 Ua lagona mai e atunuu lou māsiasi,+Ma ua faatumulia foʻi le nuu i lau alaga.
Auā ua sulu le isi tagata toa i le isi tagata toa,Ma paʻuʻū faatasi i laʻua uma.”
13 O le afioga lenei a Ieova na fetalai mai ai i le perofeta o Ieremia, e faatatau i le sau o Nepukanesa le tupu o Papelonia e taia le nuu o Aikupito:+
14 “Ia folafola atu i Aikupito, ia faalauiloa atu i Mekatala.+
Ia faalauiloa atu i Nafi* ma Tapenesa.+
Ia faapea atu, ‘Inā tutū ia ma sauniuni outou,Auā o le a faaumatia e le pelu o outou itu uma.
15 Aiseā ea ua tafiesea ai ou tagata malolosi?
E leʻi tutū pea i latou,Auā ua tūleia i latou e Ieova.
16 E matuā toʻatele i latou ua tautevateva ma paʻuʻū.
Ua latou fai atu o le tasi i le isi:
“Inā tulaʻi ia! Seʻi o tatou toe foʻi atu i o tatou tagata ma lo tatou nuuOna o le sauā o le pelu.”’
17 O i inā ua latou faalauiloa atu ai,‘O Farao le tupu o Aikupito, ua na o se tagata gugutu,O lē ua faamutaina le taimi o tausamiga.’*+
18 ‘Ou te tautō iā te aʻu lava,’ ua fetalai mai ai le Atua soifua, o le Tupu, o lona suafa o Ieova o ʻau,‘E sau o ia* e pei o Tapora+ i mauga,Ma e pei foʻi o Karamelu+ i tafatafa o le sami.
19 O oe lenā le tama fafine o loo nofo i Aikupito,Ia e saunia sau ato mo le aveina faapagota o oe.
Auā e avea Nafi* ma mea e fefefe ai;E susunuina i le afi* ma e leai se tasi e nofo ai.+
20 O Aikupito e pei o se tamaʻi povi fafine e matuā tino lelei,Ae e ō mai lago taufeū mai i le itu i mātū e faasagatau iā te ia.
21 E oo lava i ona fitafita totogi o loo iā te ia, ua pei o ni tamaʻi povi pepeti,Ae ua solomuli foʻi i latou ma ua sosola faatasi.
E leʻi mafai ona tutū pea i latou,+Auā ua oo mai i o latou luga le aso o lo latou malaia,O le taimi lea o lo latou faasalaga.’
22 ‘O lona leo e pei o le leo o se gata ua sosolo atu,Auā e latou te ō mai ma le malosi iā te ia ma toʻi,E pei o ni tagata o loo tātuu i laau.*
23 E latou te tātuu i lalo lona vaomatua,’ ua fetalai mai ai Ieova, ‘e ui e lē mafai ona uia e se tasi.
Auā e sili atu ona toʻatele i latou nai lo o sē akerise, e lē mafaitaulia lava.
24 E māsiasi le tama fafine a Aikupito.
E tuuina atu o ia i le nuu o le itu i mātū.’+
25 “Ua fetalai mai Ieova o ʻau, o le Atua o Isaraelu, ‘Ou te taui atu iā Amone+ o le aai o No,*+ o Farao, o Aikupito, o ona atua+ ma ona tupu, ioe, o Farao ma i latou uma e faatuatua iā te ia.’+
26 “‘Ou te tuuina atu i latou i ē o loo saʻili e fasiotia i latou, o Nepukanesa le tupu o Papelonia+ ma ana auauna. Ae mulimuli ane, e toe nofoia o ia e pei o aso anamua,’ ua fetalai mai ai Ieova.+
27 ‘A o oe, Iakopo e, laʻu auauna, aua e te fefe,Isaraelu e, aua e te mataʻu.+
Auā ou te faaola iā te oe mai i le mea mamao,Ma lau fanau mai i le nuu na ave faapagota i ai i latou.+
E toe foʻi mai Iakopo, e lē toe atuatuvale ae o le a toʻafilemu,E lē toe iai foʻi se tasi e faamataʻu mai iā i latou.+
28 Iakopo e, laʻu auauna, aua e te fefe,’ ua fetalai mai ai Ieova, ‘auā ou te faatasi ma oe.
Ou te faaumatia atunuu uma na ou faataapeape i ai oe,+Ae ou te lē faaumatiaina oe.+
Ou te aʻoaʻi faatatau iā te oe,*+Ae ou te lē tuua lava oe e aunoa ma le faasalaina.’”
Faamatalaga Pito i Lalo
^ O se talita laʻitiiti, e masani ona tauaveina e tagata fanafana ū.
^ Epe., “solia.”
^ Po o “le fasiga.”
^ Po o “Mafi.”
^ Epe., “taimi atofaina.”
^ E faasino atu i lē e faatoʻilaloina Aikupito.
^ Po o “Mafi.”
^ Pe atonu “O le a tuufua.”
^ Po o le “o loo fai fafie.”
^ E faasino atu iā Tese.
^ Po o le “Ou te faasaʻo oe i se auala talafeagai.”