Ieremia 5:1-31
5 Inā feoaʻi solo ia i auala o Ierusalema.
Ia vaavaai ma mātau.
Ia saʻili i ona nofoaga faitele ina ia iloaPe e mafai ona outou maua ai se tagata e faia le faamasinogatonu,+O se tasi o saʻili ina ia faamaoni,Ona ou faamagaloina lea o ia.
2 E tusa pe e latou te faapea mai: “E matou te tautō iā Ieova le Atua soifua!”
Ae e latou te tautō pepelo lava.+
3 Ieova e, pe e lē silasila ea ou fofoga i ē e faamaoni?+
Ua e taia i latou, ae e leʻi aafia ai i latou.*
Ua e faaumatia i latou, ae ua latou lē talia le aʻoaʻiga.+
Ua faamaaa o latou mata e sili atu ona malō nai lo o le papa,+Ma ua lē mananaʻo i latou e toe foʻi mai.+
4 Ae na ou faapea ifo: “E moni lava o i latou o tagata e leʻi aʻoaʻoina.
Ua latou gaoioi ma le vālea, auā ua latou lē iloa le ala o Ieova,O le faamasinoga a lo latou Atua.
5 Ou te alu atu lava i alii sili ma tautala atu iā i latou,Auā ua tatau ona latou iloa le ala o Ieova,O le faamasinoga a lo latou Atua.+
Peitaʻi, ua gauia e i latou uma le amoMa motusia noanoataga.”
6 O le mea lea ua osofaʻia ai i latou e se leona mai i le vaomatua,Ua faaumatia pea foʻi i latou e se luko o fanua laugatasi o le toafa,Ua lamalama se nameri i o latou aai.
O i latou uma e ō ese mai iā i latou, e saeia lava.
Auā ua tele a latou solitulafono;Ua matuā tele foʻi a latou gaoioiga lē faamaoni.+
7 E faapefea ona ou faamagaloina oe i lenei mea?
Ua tuulafoaʻia aʻu e lau fanau,Ma ua latou tautō i mea e lē o ni atua.+
Na ou faamalieina o latou manaʻoga,Ae na latou mulilulua pea,Ma na latou lolofi atu i le fale o se fafine talitane.
8 Ua pei i latou o ni solofanua poʻa ua matuā naunau i feusuaʻiga,Ua taʻitasi i latou ma tagi e pei o se solofanua i le avā a le isi tamāloa.+
9 “Po ou te lē faasalaina ea i latou ona o nei mea?” ua fetalai mai ai Ieova.
“Po ou te lē taui atu ea foʻi i se atunuu faapenei?”+
10 “Inā ō aʻe ia i ona laina vine ma faaleagaina,Ae aua tou te faaumatiaina atoatoa.+
Ia aveese ona tātupu lauolaola,Auā e lē o Ieova e ona ia.
11 Auā ua matuā faaʻoleʻole mai iā te aʻuLe aiga o Isaraelu ma le aiga o Iuta,” ua fetalai mai ai Ieova.+
12 “Ua latou faafitia Ieova ma ua latou fai atu pea,‘E na te lē faia se mea.*+
E lē oo mai iā i matou se puapuaga;E matou te lē vāai foʻi i se pelu po o se oge.’+
13 Ua avea perofeta e pei o se matagi,Ma e lē o iā i latou le afioga.*
Ia faapea lava ona faia iā i latou!”
14 O le mea lea ua fetalai mai ai Ieova le Atua o ʻau:
“Ona ua fai mai nei tagata i lenei mea,O le mea lea ou te faia ai aʻu upu ma afi i lou gutu,+E avea lenei nuu ma fafie,Ma e susunuina ai lava i latou.”+
15 Ua fetalai mai Ieova, “Le aiga o Isaraelu e, ou te aumaia iā te outou se atunuu mai i le mea mamao.+
O se atunuu e matuā tumau.
O se atunuu mai anamua,O se atunuu e tou te lē iloa lana gagana,E tou te lē malamalama foʻi i a latou tala.+
16 O la latou taga e tuu ai aū ua pei o se tuugamau ua faamaga;O i latou uma foʻi o tagata totoa.
17 E latou te ʻaina lau seleselega ma au meaʻai.+
E latou te faaumatia ou atalii ma ou afafine.
E latou te ʻaina au lafu mamoe ma au lafu povi.
E latou te ʻaina au vine ma au laau o le mati.
E latou te faaumatia foʻi i le pelu ou aai malupuipuia o loo e faatuatua i ai.”
18 Ua fetalai mai Ieova: “Ae e oo foʻi i na aso, ou te lē faaumatia atoatoa outou.+
19 Pe a latou fesili mai, ‘Aiseā ua faia ai e Ieova lo tatou Atua nei mea uma iā i tatou?’ ona e tali atu lea iā i latou, ‘E pei ona outou tuulafoa‘ia aʻu ina ia auauna ai i se atua ese i lo outou nuu, e faapena foʻi ona outou auauna i tagata ese i le nuu e lē o so outou nuu.’”+
20 Ia outou folafola atu lenei mea i le aiga o Iakopo,Ma faalauiloa atu i Iuta, e faapea:
21 “Inā faalogologo mai ia i lenei mea, o outou le nuu vālea ma leai ni mafaufau:*+
E fai o latou mata ae e lē vāai;+E fai o latou taliga ae e lē faalogo.+
22 ‘Pe e tou te lē matataʻu ea iā te aʻu?’ ua fetalai mai ai Ieova,‘Pe e tou te lē gatete ea foʻi i o‘u luma?
O a‘u na tuuina le oneone e fai ma tuaoi mo le sami,O se tulafono e tumau pea e lē mafai lava ona sopoʻiaina.
E ui ina fefatiaʻi ona galu, ae e lē mafai lava;E ui ina taalili mai, ae e lē mafai lava ona latou sopoʻia atu.+
23 A o lenei nuu, ua maaa ma ua fouvale o latou loto;Ua latou liliuese ma ō i o latou lava ala.+
24 Ua latou lē fai ifo i o latou loto:
“Seʻi o tatou matataʻu ia iā Ieova lo tatou Atua,O Lē ua foaʻiina mai timuga i ona lava tau,O timuga i le tau e afu ai mea ma timuga i le tau e totogo ai mea,O Lē foʻi e leoleoina mo i tatou o vaiaso ua atofaina o le seleselega.”+
25 O o outou sesē ua taofia ai le oo mai o nei mea;O a outou agasala ua taofia ai mea lelei mai iā te outou.+
26 Auā ua iai tagata leaga i loʻu nuu.
Ua latou tilotilo atu pea, e pei ona faapuga o ē e puʻe manulele.
Ua latou tuu se mailei mataʻutia.
E latou te puʻea ai tagata.
27 E pei o se pā ua tumu i manufelelei,Ua faapea foʻi ona tumu o latou fale i le taufaa‘ole‘ole.+
O le mea lea ua faasilisiliina ai i latou ma mauʻoa ai.
28 Ua puputa ma lamolemole i latou;Ua taumasuasua i latou i mea leaga.
Ua lē finau i latou mo le faamasinoga o le tamaitiiti ua leai sona tamā,+Ina ia manuia ai i latou;Ua latou lē faia foʻi le faamasinogatonu o ē e matitiva.’”+
29 “Po ou te lē faasalaina ea i latou ona o nei mea?” ua fetalai mai ai Ieova.
“Po ou te lē taui atu ea foʻi i se atunuu faapenei?
30 E iai se mea matuā leaga ma mataʻutia ua tupu i le nuu:
31 Ua vavalo perofeta i mea pepelo,+Ma ua pule malosi ositaulaga e tusa ma la latou lava pule.
Ma ua fiafia i ai loʻu nuu.+
Ae o le ā se mea e tou te faia pe a faaiʻuina nei mea?”
Faamatalaga Pito i Lalo
^ Epe., “e leʻi vaivai ai i latou.”
^ Pe atonu “E lē o iai o ia.”
^ E faasino atu i le afioga a le Atua.
^ Epe., “o outou le nuu vālea e leai ni fatu.”
