Ieremia 50:1-46
50 O le afioga na fetalai mai ai Ieova e ala i le perofeta o Ieremia, e faatatau iā Papelonia+ ma le nuu o tagata Kaletaia:
2 “Ia folafola atu i atunuu ma faalauiloa atu.
Ia faatū se faailoilo* ma faalauiloa atu.
Aua neʻi natia se mea!
Ia fai atu foʻi, ‘Ua faatoʻilaloina Papelonia.+
Ua faamāina Pele.+
Ua mataʻu Merota.
Ua faamāina ona faatusa.
Ua matataʻu foʻi ona tupua inosia.’*
3 Auā e alu aʻe mai i le itu i mātū se atunuu e tau ma ia.+
E na te faia lona laueleele ma mea e fefefe ai;E leai se isi e nofo ai.
Ua sosola uma tagata ma manu;Ua ō ese i latou.”
4 “I na aso ma i lenā foʻi taimi,” ua fetalai mai ai Ieova, “e ō mai faatasi ai le fanauga a Isaraelu ma le fanauga a Iuta.+ E fetagisi i latou a o savavali,+ ma e latou te saʻili faatasi iā Ieova lo latou Atua.+
5 E latou te fesili atu mo le auala i Siona, a o faasasaga o latou mata i lenā itulagi,+ ma faapea, ‘Inā ō mai ia, seʻi o tatou faatasi atu iā Ieova, ma osia se feagaiga e faavavau e lē mafai ona galo.’+
6 Ua avea loʻu nuu o se lafu mamoe ua sē.+ Ua taʻitaʻi sesē i latou e o latou lava leoleo mamoe.+ Ua latou taʻitaʻiina ese i latou i mauga, ma ua feoaʻi mai i lea mauga i lea aʻega. Ua galo foʻi iā i latou le mea e latou te mālōlō ai.
7 Ua ʻaina i latou e ē uma na maua i latou,+ ua faapea ane foʻi o latou fili, ‘E matou te lē nofosala, talu ai ua latou agasala iā Ieova, o le mea e mau ai o lē e amiotonu ma o le faamoemoe o o latou augātamā, o Ieova.’”
8 “Inā sosola ese ia mai i totonu o Papelonia,Ma ō atu mai i le laueleele o tagata Kaletaia,+Ia avea foʻi outou e pei o ni manu o loo taʻimua i luma o le lafu.
9 Auā ou te faaoso ma ave aʻe e tau ma PapeloniaSe faapotopotoga o atunuu tetele mai i le nuu o le itu i mātū.+
E latou te ō mai iā te ia e pei o se ʻautau;E puʻeina ai o ia i inā.
O a latou aū ua pei o aū a se toa,E faapogaia ai le faavauvau ona o tamaiti;+E lē foʻi fua mai.
10 E fai Kaletaia ma vete.+
E faamalieina atoatoa i latou uma e vetea o ia,”+ ua fetalai mai ai Ieova.
11 “Auā ua olioli pea outou,+ ua fiafia pea foʻi outouIna ua faoa loʻu tofi.+
Auā ua outou osooso solo pea e pei o se tamaʻi povi fafine i le vao,Ma ua outou fetagisi pea e pei o ni solofanua malolosi.
12 Ua faalumaina lo outou tinā.+
Ua faanoanoa o lē na fanaua outou.
Faauta! o ia lava e aupito faatauvaa i atunuu,O se laufanua naumati ma o se toafa.+
13 Ona o le toʻatamaʻi o Ieova ua lē ʻainā ai o ia;+E avea foʻi o ia ma mea ua matuā faatafunaina.+
O so o se tasi e ui ane i Papelonia, e pulatoʻa atu ma le fefeMa tuufaaili ona o ona mala uma.+
14 Inā ō mai ia iā Papelonia e pei o se ʻautau i itu uma,O outou uma o ē e lolo‘u* le ʻaufana.
Inā fana atu ia iā te ia, aua neʻi tuua se aū,+Auā ua ia agasala iā Ieova.+
15 Inā alaga ia i le alaga o le taua faasaga iā te ia i itu uma.
Ua siilima o ia.*
Ua paʻuʻū ona poutū, ua lepetia ona pā,+Auā o le tauimasui lea a Ieova.+
Ia outou taui atu iā te ia.
Ia faia iā te ia e tusa ma mea uma na ia faia.+
16 Ia vavaeese o lē e lūlū fatu mai i Papelonia,Ma lē e uuina le selesaito i le taimi o le seleselega.+
Ona o le sauā o le pelu, ua taʻitasi i latou ma toe foʻi i lona lava nuu,Ua taʻitasi i latou ma sola atu i lona lava laueleele.+
17 “O le nuu o Isaraelu o mamoe ia ua salalau solo.+ Ua faataapeapeina i latou e leona.+ I le taimi muamua, na ʻaina i latou e le tupu o Asuria;+ ona gali lea o o latou ponaivi e Nepukanesa le tupu o Papelonia.+
18 O le mea lea ua fetalai mai ai Ieova o ʻau, o le Atua o Isaraelu: ‘O lenei, ou te faasalaina le tupu o Papelonia ma lona nuu, e pei foʻi ona ou faasalaina o le tupu o Asuria.+
19 Ou te toe faafoʻisia Isaraelu i lona laufanua,+ ma e ʻai o ia i Karamelu ma Vasana,+ e faamalieina foʻi o ia i mauga o Efaraima+ ma Kiliata.’”+
20 “I na aso ma i lenā foʻi taimi,” ua fetalai mai ai Ieova,“E saʻilia ai mea sesē a Isaraelu,Ae e leai lava,Ma e lē maua foʻi agasala a Iuta,Auā ou te faamagaloina i latou o ē ua ou faatotoeina.”+
21 “Inā alu aʻe ia e tau ma le nuu o Merataimo ma ē o loo nonofo i Pekota.+
Ia tuu atu i latou e fasiotia ma faaumatia atoatoa,” ua fetalai mai ai Ieova.
“Ia faia mea uma ua ou poloaʻi atu ai iā te oe.
22 Ua iai le leo o le taua i le nuu,O se faatamaʻiaga tele.
23 E! ua gauia ma nutililiia le samala a le lalolagi uma.+
E! ua avea Papelonia ma mea e fefefe ai atunuu.+
24 Papelonia e, na ou tuu se mailei mo oe ma ua puʻea ai oe,Ae e te leʻi iloaina.
Ua maua oe ma ua puʻea,+Auā ua e tetee iā Ieova.
25 Ua tatala e Ieova lana mea e teu ai auupega,Ma aumaia ai auupega o lona toʻatamaʻi.+
Auā e iai le galuega a le Alii Pule Silisili Ese o Ieova o ʻau,I le nuu o tagata Kaletaia.
26 Inā ō mai ia iā te ia mai i mea mamao.+
Ia tatala ona fale e tuu ai saito.+
Ia outou faafaupuʻe iā te ia e pei o faupuʻega saito.
Ia faaumatia atoatoa o ia.+
Aua neʻi iai nisi e totoe iā te ia.
27 Ia fasia ona tamaʻi povi poʻa uma;+Ia ō ifo i latou i le mea e fasi ai.
Oi talofa iā i latou, auā ua oo mai lo latou aso,O le taimi o lo latou faasalaga!
28 Ua lagona le alaga a i latou o loo sosola,O i latou ua sao mai i le nuu o Papelonia,E folafola atu i Siona le tauimasui a Ieova lo tatou Atua,O le tauimasui mo lona malumalu.+
29 Ia aami tagata fanafana aū ina ia tau ma Papelonia,O ē uma e loloʻu* le ʻaufana.+
Ia tolauapi faataamilo iā te ia; aua neʻi iai se isi e sao mai ai.
Ia taui atu iā te ia e tusa ma ana gaoioiga.+
Ia faia iā te ia e tusa ma mea uma na ia faia.+
Auā ua ia gaoioi ma le faamaualuga e faasaga iā Ieova,E faasaga i Lē e Paia o Isaraelu.+
30 O lea e paʻuʻū ai ona tauleleʻa i ona nofoaga faitele,+E fano* foʻi ona fitafita uma i lenā aso,” ua fetalai mai ai Ieova.
31 “Faauta! Ou te faasagatau iā te oe,+ o oe o lē e faatautee,”+ ua fetalai mai ai Ieova o ʻau, o le Alii Pule Silisili Ese,“Auā e oo mai lou aso, o le taimi ou te taui atu ai iā te oe.
32 O oe, o lē e faatautee, e te tautevateva ma paʻū,E leai foʻi se isi e na te faatulaʻi iā te oe.+
Ou te faamū i le afi ou aai,Ma faaumatia ai mea uma o siʻomia ai oe.”
33 O le mea lenei ua fetalai mai ai Ieova o ʻau:
“Ua sauāina le fanauga a Isaraelu ma Iuta,Ma ua taofia i latou e ē uma na aveina faapagota i latou.+
Ua mumusu i latou e tuuina atu i latou e ō.+
34 Ae e malosi Lē e toe faatauina mai i latou.+
O Ieova o ʻau lona suafa.+
E finau lava o ia mo lo latou faamasinoga,+Ina ia avatu ai le mālōlōga i le nuu,+Ma faaatuatuvale ai ē o loo nonofo i Papelonia.”+
35 “E faaumatia e le pelu le ʻau Kaletaia,” ua fetalai mai ai Ieova,“Ma ē o loo nonofo i Papelonia, o ona perenise, ma ona tagata atamamai.+
36 E faaumatia e le pelu tagata e tautatala i mea e lē aogā,* e latou te gaoioi foʻi ma le vālea.
E faaumatia e le pelu ona tagata totoa, ma e matataʻu foʻi i latou.+
37 E faaumatia e le pelu a latou solofanua ma a latou kariota o le taua,Ma tagata eseese uma o loo iai iā te ia,Ma e avea i latou e pei o ni fafine.+
E faaumatia e le pelu ana oloa, ma e faoa lava.+
38 E faaleagaina ona vai ma mamate ai.+
Auā o le nuu o faatusa ua tā,+Ma ua latou gaoioi pea ma le vālea ona o a latou vaaiga mataʻutia.
39 O le mea lea, e nonofo faatasi manu o le toafa ma manu o loo uiō leotetele,E nonofo ai foʻi iaena.+
E lē toe nofo ai lava se tasi,Pe toe nofoia i augātupulaga uma.”+
40 “E pei o le faaumatiaina e le Atua o Sotoma ma Komoro+ ma ona aai tuaoi,”+ ua fetalai mai ai Ieova, “e leai se tagata e nofo ai i inā, e leai foʻi se tagata e faamautū ai i inā.+
41 Faauta! E ō mai se nuu mai i le itu i mātū;E faatūina foʻi se atunuu tele ma ni tupu sili+Mai i vaega pito sili ona mamao o le lalolagi.+
42 E latou te uu le ʻaufana ma le tao.+
E sauā i latou ma e lē alolofa mutimutivale.+
O lo latou leo e pei o le sami ua fesouaʻiina,+A o latou tiʻetiʻe i solofanua.
E latou te sauniuni e pei o se tagata e toʻatasi e siitaua mai iā te oe, le tama fafine a Papelonia e.+
43 Ua faalogo le tupu o Papelonia i le tala e uiga iā i latou,+Ona vaivai ai lea o ona lima.+
Ua maua o ia i mafatiaga,O tigā e pei o se fafine o le a fanau.
44 “Faauta! E alu aʻe se tasi i laufanua saogalemu e pei o se leona mai i vao lauolaola i tafatafa o Ioritana, ae ua toeitiiti ona ou faasosola ese lea o i latou mai iā te ia. Ou te tofia foʻi lē ua filifilia e pule iā te ia.+ Auā o ai se isi e pei o aʻu, o ai foʻi se tasi e tofotofo mai iā te aʻu? O ai se leoleo mamoe e mafai ona tū mai i oʻu luma?+
45 O le mea lea, inā outou faalogologo mai ia i le faaiʻuga ua faia e Ieova* iā Papelonia,+ ma le mea ua ia finagalo ai i le nuu o tagata Kaletaia.
E moni, e fetosoaʻiina solo o ē iti o le lafu.
E na te faatafunaina le mea e latou te nonofo ai ona o i latou.+
46 E gatete le laueleele i le leo o le faatoʻilaloina o Papelonia,E lagona foʻi le alaga i atunuu.”+
Faamatalaga Pito i Lalo
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Po o le “pou faailoilo.”
^ Epe., “solia.”
^ Epe., “Ua tuuina mai lona lima.”
^ Epe., “solia.”
^ Epe., “faafifilemu.”
^ Po o “perofeta pepelo.”
^ Po o “le finagalo o Ieova.”
