Ieremia 52:1-34
52 E 21 tausaga o Setekaia+ ina ua fai o ia ma tupu, ma e 11 tausaga na pule ai o ia mai i Ierusalema. O le igoa o lona tinā o Hamutala+ le afafine o Ieremia mai i Lipena.
2 Ua ia faia pea mea leaga i le silafaga a Ieova, e tusa ma mea uma na faia e Ioakima.+
3 O le toʻasā o Ieova na tutupu ai nei mea i Ierusalema ma Iuta, seʻia oo ina ia aveesea i latou mai i ona luma.+ Ua fouvale foʻi Setekaia i le tupu o Papelonia.+
4 O le tausaga lona iva o le nofoaiga a Setekaia, i le masina lona sefulu, o le aso lona sefulu o le masina, na ō mai ai Nepukanesa le tupu o Papelonia ma lana ʻautau uma e siitaua iā Ierusalema. Ua latou tolauapi ma ati se pā e siʻomia faataamilo ai le aai.+
5 Ua siʻomia pea le aai seʻia oo i le tausaga lona 11 o le nofoaiga a le tupu o Setekaia.
6 I le masina lona fā, i le aso lona iva o le masina,+ na matuā tetele ai le oge i le aai, ua leai foʻi ni meaʻai mo tagata o le nuu.+
7 Mulimuli ane, ua faaleagaina le pā o le aai, ona sosola ai lea o fitafita uma mai i le aai i le pō e ui atu i le faitotoʻa, i le vā o pā e lua e lata i le togālaau a le tupu, a o siʻomia faataamilo e ʻau a Kaletaia le aai; ua latou ō atu pea i le ala i Arapa.*+
8 Ae ua tuliloa e le ʻautau a Kaletaia le tupu, ma ua latou maua atu Setekaia+ i fanua laugatasi o le toafa o Ieriko, ua taapeape foʻi lana ʻautau uma sa iā te ia.
9 Ua latou puʻeina le tupu ma avatu o ia i le tupu o Papelonia i Ripelu i le nuu o Amato, ona ia faamasinoina lea o ia.
10 Ua fasiotia e le tupu o Papelonia o atalii o Setekaia i ona luma, ua ia fasiotia foʻi perenise uma o Iuta i Ripelu.
11 Ona faatauasoina lea e le tupu o Papelonia o Setekaia,+ ua saisai o ia i faamau ʻapamemea, ua ave o ia i Papelonia, ma tuu o ia i le falepuipui seʻia oo i le aso e oti ai o ia.
12 O le masina lona lima i le aso lona sefulu o le masina, o le tausaga lona 19 lea o le nofoaiga a le tupu o Nepukanesa le tupu o Papelonia, na sau ai i Ierusalema Nepusatana le taʻitaʻi o leoleo, o le auauna a le tupu o Papelonia.+
13 Ua ia susunu le fale o Ieova,+ o le fale o le tupu, ma fale uma o Ierusalema; ua ia susunu foʻi fale tetele uma.
14 Ua faaleagaina foʻi pā na siʻomia ai Ierusalema e le ʻautau uma a Kaletaia, o ē na faatasi ma le taʻitaʻi o leoleo.+
15 Na ave faapagota e Nepusatana le taʻitaʻi o leoleo nisi o tagata faatauvaa o le nuu, ma nisi o le nuu na totoe i le aai. Na ia ave foʻi ē na sosola atu i le tupu o Papelonia faapea foʻi ma tufuga popoto na totoe.+
16 A o nisi o ē e sili ona matitiva o le nuu, na tuu pea e Nepusatana le taʻitaʻi o leoleo ina ia galulue i vine, ma faia galuega mamafa.+
17 Na nutililiia foʻi e ʻautau a Kaletaia poutū ʻapamemea+ sa i le fale o Ieova, o taavale toso,+ ma le faatanoa vai* ʻapamemea+ sa i le fale o Ieova, ma latou ave ʻapamemea uma i Papelonia.+
18 Na latou ave foʻi ʻapa, o suō, o seleulu, o ipu faaofuofu,+ o ipu tī,+ ma ipu ʻapamemea uma na faaaogā i le auaunaga i le malumalu.
19 Na ave foʻi e le taʻitaʻi o leoleo o tanoa,+ o salefu,* o ipu faaofuofu, o ʻapa, o tuugāmolī,+ o ipu tī, ma ipu faaofuofu ua faia i le auro māoʻi ma le siliva māoʻi.+
20 A o poutū e lua, o le faatanoa vai,* o povi poʻa ʻapamemea e 12+ sa i lalo ifo o le faatanoa vai, ma taavale toso na faia e le tupu o Solomona mo le fale o Ieova, e leʻi mafai ona fuatia le mamafa o le ʻapamemea o nei mea uma.
21 A o poutū, e 18 kupita* le maualuga o poutū taʻitasi, e faataamilo ai foʻi se manoa e 12 kupita e fuaina ai;+ o lona mafiafia e tusa lea ma tamatamaʻilima* e fā pe a tuufaatasi, ma e ʻōʻō totonu.
22 O le ulupou sa i ona luga e faia i le ʻapamemea; o le maualuga o le ulupou e tasi e lima kupita;+ o le mea valavala ma rimoni na faataamilo i le ulupou, sa faia foʻi i le ʻapamemea. E faapena foʻi le poutū lona lua atoa ma rimoni.
23 E 96 rimoni i itu; e 100 rimoni e faataamilo i le mea valavala.+
24 Na ave foʻi e le taʻitaʻi o leoleo le ositaulaga sili o Seraia,+ ma Sefanaia+ le ositaulaga lona lua, ma leoleo faitotoʻa e toʻatolu.+
25 Na ia ave foʻi mai i le aai le tagata aloaʻia e toʻatasi o lē na pule i fitafita, o tagata e toʻafitu sa iai i le aai o ē na vavalalata i le tupu, faapea le failautusi a le taʻitaʻiʻau, o lē e faapotopotoina tagata o le nuu, ma tagata lautele e toʻa 60 na maua i le aai.
26 Ua ave i latou e Nepusatana le taʻitaʻi o leoleo ma avatu i le tupu o Papelonia i Ripelu.
27 Ua fasiotia e le tupu o Papelonia i latou i Ripelu+ i le nuu o Amato. O lea, ua ave faapagota ai Iuta mai i lona laueleele.+
28 O tagata nei na ave faapagota e Nepukanesa: i le tausaga lona fitu, e toʻa 3,023 tagata Iutaia.+
29 I le tausaga lona 18 o le nofoaiga a Nepukanesa,+ e toʻa 832 tagata na aumaia mai i Ierusalema.
30 I le tausaga lona 23 o le nofoaiga a Nepukanesa, na ave faapagota ai e Nepusatana le taʻitaʻi o leoleo tagata Iutaia e toʻa 745.+
O tagata uma na ave faapagota, e toʻa 4,600.
31 I le tausaga lona 37 talu ona ave faapagota Ioakina+ le tupu o Iuta, i le masina lona 12 i le aso lona 25 o le masina, na faasaʻoloto ai* Ioakina le tupu o Iuta e Evile-marota le tupu o Papelonia i le tausaga na avea ai o ia ma tupu, ma tatala ai Ioakina mai i le falepuipui.+
32 Ua ia tautala atu ma le agalelei iā Ioakina, ua ia faasili foʻi le nofoālii o Ioakina nai lo o nofoālii o isi tupu na ave faapagota faatasi ma ia i Papelonia.
33 Ona aveesea lea e Ioakina o ona ofu na faafalepuipui ai, ma ua ʻai foʻi e lē aunoa i luma o le tupu i aso uma o lona ola.
34 Ua tuuina atu foʻi e lē aunoa iā te ia o meaʻai mai i le tupu o Papelonia i aso taʻitasi, i aso uma o lona ola seʻia oo i le aso na oti ai.
Faamatalaga Pito i Lalo
^ Po o “le fanua laugatasi o le toafa.”
^ Epe., “Sami.”
^ O se mea e pei o se tamaʻi suō e aveese ai malala mai i le afi.
^ Epe., “Sami.”
^ Epe., “faaeaina ai le ulu o.”