Ieremia 9:1-26
9 E! pe ana avea loʻu ulu ma vai,O oʻu mata ma puna o loimata.+
Ina ia ou tagi ai i le ao ma le pō,Ona o ē ua fasiotia o loʻu nuu.
2 E! pe ana iai soʻu fale i le toafa e nonofo ai tagata femalagaaʻi.
Ina ia ou tuua ai loʻu nuu ma alu ese mai iā i latou,Auā o i latou uma o ē ua mulilulua,+O se faapotopotoga o tagata faaʻoleʻole.
3 Ua latou loloʻu o latou laulaufaiva e pei o se ʻaufana;Ua tumu le nuu i tala pepelo ma ua leai se faamaoni.+
“Ua latou faia lea mea leaga ma lea mea leaga,Ma ua latou lē uaʻi mai iā te aʻu,”+ ua fetalai mai ai Ieova.
4 “O outou uma, ia faaeteete i lou tuaoi,Ma aua lava neʻi faatuatuaina lou uso.
Auā e taufaalata uso uma,+Ma e taufaaleaga tuaoi uma.+
5 E taʻitasi i latou ma taufaasesē i lona tuaoi,Ma e leai se tasi e tautala i le upu moni.
Ua aʻoaʻoina o latou laulaufaiva e tautatala i mea pepelo.+
Ua vaivai i latou ona o le faia o mea sesē.
6 Ua e nofo i totonu o le nuu faaʻoleʻole.
O lo latou faaʻoleʻole ua latou lē mananaʻo ai e iloa aʻu,” ua fetalai mai ai Ieova.
7 O lea, o le mea lenei ua fetalai mai ai Ieova o ʻau:
“Ou te faamamāina i latou ma tofotofoina i latou,+Auā o le ā se isi mea ou te faia i le tama fafine a loʻu nuu?
8 O o latou laulaufaiva o ni aū e oti ai e tautatala faaʻoleʻole.
E tautala i le filemu le tagata i lona gutu i lona tuaoi,Ae ua ia lamalama iā te ia i lona loto.”
9 “Po ou te lē faasalaina ea i latou ona o nei mea?” ua fetalai mai ai Ieova.
“Po ou te lē taui atu ea foʻi i se atunuu faapenei?+
10 Ou te tagi ma auē i luga o maugaMa usu se pese faanoanoa* i luga o fanua e tataa ai lafumanu i le toafa,Auā ua susunuina i latou ina ia leai se tagata e ui ane ai,Ua lē lagona foʻi le leo o lafumanu.
Ua sosola ese manufelelei o le lagi ma manu tataa; ua ō ese i latou.+
11 Ou te faia Ierusalema ma faupuʻega maa,+ o le mea e nonofo ai taʻifau o le vao,+Ou te faia foʻi aai o Iuta ma mea gaogao, e leai se tasi e nofo ai.+
12 O ai sē ua lava lona atamai e malamalama ai i lenei mea?
O ai sē na fetalai i ai le fofoga o Ieova, e mafai ona ia folafola atu lenei mea?
Aiseā ua fano ai le laueleele?
Aiseā ua susunuina ai e pei o le toafaIna ia lē toe ui ane ai se isi?”
13 Ua tali mai Ieova: “Auā ua latou teena laʻu tulafono* na ou tuuina i o latou luma, ma ona ua latou lē savavali ai ma lē faalogo i loʻu leo.
14 Nai lo o lea, ua latou savavali e tusa ma le maaa o o latou lava loto,+ ma ua latou mulimuli i tupua o Paala, e pei ona aʻoaʻo i latou e o latou tamā e fai.+
15 O lea, o le mea lenei ua fetalai mai ai Ieova o ʻau, o le Atua o Isaraelu, ‘O aʻu lava ou te fafaga i lenei nuu i laau oona, ma faainu i latou i vai oona.+
16 Ou te faataapeape i latou i atunuu e leʻi iloa e i latou po o latou tamā foʻi,+ ma ou te auina atu le pelu e mulimuli iā i latou, seʻia ou faaumatia i latou.’+
17 O le mea lenei ua fetalai mai ai Ieova o ʻau,‘Inā mafaufau ia outou.
Ia aami i fafine e usuina pese faanoanoa,*+Ma ia feʻau atu foʻi i fafine tomai ina ia ō mai,
18 Ina ia latou faavave mai ma lagi se auega mo i tatou,Ina ia tafe ifo loimata i o tatou mata,Ma sisina ifo vai i o tatou laumata.+
19 Auā ua lagona le leo o auega mai i Siona:+
“E! ua faatafunaina i tatou.
Ua tele lava lo tatou māsiasi!
Auā ua tatou tuua le laueleele, ma ua latou talepe i lalo o tatou fale.”+
20 O outou fafine, inā faalogo mai ia i le afioga a Ieova.
Ia lagona e o outou taliga le afioga a lona fofoga.
Ia outou aʻoaʻo a outou fanau teine i lenei auega,Ma ia aʻoaʻo e le tasi le isi i lenei pese faanoanoa.*+
21 Auā ua alu aʻe le oti i o tatou faamalama;Ua ulu mai i totonu o o tatou ‘olo malolosiIna ia aveese tamaiti mai i auala,Ma tauleleʻa mai i nofoaga faitele.’+
22 Inā fai atu ia, ‘O le mea lenei ua fetalai mai ai Ieova:
“E paʻuʻū tino oti o tagata e pei o otaota i luga o le laueleele,E pei foʻi o se laina o fusi saito faatoʻā uma ona seleina i tua o lē e selesele,Ae e leai se tasi e na te aoaoina.”’”+
23 O le mea lenei ua fetalai mai ai Ieova:
“Aua neʻi mitamita le tagata atamai i lona atamai;+Aua neʻi mitamita le tagata malosi i lona malosi;Aua foʻi neʻi mitamita le tagata mauʻoa i ana ʻoa.”+
24 “A o lē e mitamita, inā mitamita ia o ia i lenei mea:
Ona ua iā te ia le tofā mamao ma ua ia iloa aʻu,+O aʻu o Ieova, o Lē e faaalia le alofa faamaoni, o le faamasinotonu, ma le amiotonu i le lalolagi,+Auā ou te fiafia i nei mea,”+ ua fetalai mai ai Ieova.
25 “Faauta! E oo mai ona aso,” ua fetalai mai ai Ieova, “ou te taui atu ai iā i latou uma ua peritomeina ae e leʻi peritomeina lava,+
26 o Aikupito,+ o Iuta,+ o Etoma,+ o le fanauga a Amoni,+ o Moapi,+ ma i latou uma e sele o latou manifinifi o loo nonofo i le toafa;+ auā e leʻi peritomeina atunuu uma, ma e leʻi peritomeina foʻi loto+ o le aiga uma o Isaraelu.”
Faamatalaga Pito i Lalo
^ Po o le “pese o auega.”
^ Po o le “faatonuga.”
^ Po o “pese o auega.”
^ Po o le “pese o auega.”