Faamaumauga a Ioane 1:1-51
1 Sa i le amataga le Upu,+ sa faatasi le Upu ma le Atua,+ ma sa avea foʻi le Upu o se atua.+
2 Sa faatasi o ia ma le Atua i le amataga.
3 Na faia mea uma lava e ala iā te ia,+ ma e leai foʻi se mea e tasi e leʻi faia e ala iā te ia.
O le mea na faia
4 e ala iā te ia, o le ola lea, ma o le ola, o le malamalama lea o tagata.+
5 Ua susulu mai le malamalama i le pōuliuli,+ ae e leʻi manumalo ai le pōuliuli.
6 Sa iai se tagata na auina mai e fai ma sui o le Atua; o lona igoa o Ioane.+
7 Na sau lenei tagata o se molimau, e molimau i le malamalama,+ ina ia talitonu ituaiga uma o tagata e ala iā te ia.
8 E lē o ia o lenā malamalama,+ ae o ia o le molimau e faatatau i lenā malamalama.
9 Ua toeitiiti ona maliu mai lea i le lalolagi o le malamalama moni, e na te faamalamalamaina ituaiga eseese o tagata.+
10 Sa iai o ia i le lalolagi,+ ma na faia le lalolagi e ala iā te ia,+ ae e leʻi iloa o ia e le lalolagi.
11 Na afio mai o ia i lona lava nuu, ae e leʻi taliaina o ia e ona lava tagata.
12 Peitaʻi, o i latou uma na taliaina o ia, na ia avatu i ai le aiā e avea ai ma fanau a le Atua,+ auā na latou faatuatua i lona suafa.+
13 E latou te leʻi fananau mai ona o le toto, po o le manaʻo o le tino, po o le manaʻo o tagata, ae e mai i le Atua.+
14 O lea, na avea le Upu ma tagata+ ma na nofo faatasi ma i tatou, ma na tatou vāai i lona mamalu, o le mamalu lea o le atalii e toʻatasi o le tamā;+ ma ua tumu o ia i le agalelei faifua ma e tautala foʻi ma le faamaoni.
15 (Na molimau Ioane e uiga iā te ia, ma ua alaga: “O ia lenei na ou fai atu ai, ‘O lē e mulimuli mai, e sili o ia iā te aʻu, auā na iai o ia ae ou te leʻi iai.’”)+
16 O lea, ua tatou maua ai pea le matuā tele o le agalelei faifua.
17 Na tuuina mai le Tulafono e ala iā Mose,+ ae ua oo mai le agalelei faifua+ ma le upu moni e ala mai iā Iesu Keriso.+
18 E leai lava se tasi ua vaai i le Atua;+ ua na o le atalii e toʻatasi+ o loo i autafa o le Tamā,*+ o ia lenā ua faamatalaina mai le Tamā.+
19 O le molimau lenei a Ioane ina ua aauina mai e tagata Iutaia le ʻauositaulaga ma sa Levī mai Ierusalema, e fesili mai iā te ia: “O ai ea oe?”+
20 E leʻi faafiti o ia ae ua taʻutino atu: “E lē o aʻu o le Keriso.”
21 Ona latou fesili mai lea iā te ia: “A o ai la? O oe ea o Elia?”+ Ua tali atu o ia: “E leai.” “Po o oe o le Perofeta?”+ Ae ua tali atu o ia: “E leai!”
22 Ua latou fai mai iā te ia: “O ai la oe? Taʻu mai ina ia matou avatu ai se tali iā i latou na aauina mai i matou. O le ā sau tala e uiga iā te oe?”
23 Ua fai atu o ia: “O aʻu o lē o loo alaga i le toafa,* ‘Ia faasaʻosaʻo le ala i luma o Ieova,’*+ e pei ona fai mai ai le perofeta o Isaia.”+
24 O i latou na aauina mai, e mai i le ʻau Faresaio.
25 Ona latou fesili mai lea iā te ia: “Aiseā la ua e faia ai papatisoga pe afai e lē o oe o le Keriso, po o Elia, po o le Perofeta?”
26 Ua tali atu Ioane: “Ou te faia papatisoga i le vai. Ae o loo tū mai i lo outou lotolotoi se tasi e tou te lē iloa,
27 o lē e mulimuli mai, ma e lē aogā ona ou tatala nonoa o ona seevae.”+
28 Na tutupu nei mea i Petania i le isi itu o Ioritana, i le mea na faia ai le papatisoga a Ioane.+
29 I le aso na sosoo ai, na ia iloa atu ai Iesu o loo sau iā te ia, ona fai ane lea o ia: “Faauta! O le Tamaʻi Mamoe+ a le Atua, o lē e aveeseina le agasala+ a le lalolagi!+
30 O ia lenei na ou fai atu ai: ‘O loo mulimuli mai lē e sili iā te aʻu, auā na iai o ia ae ou te leʻi iai.’+
31 Ou te leʻi iloa foʻi o ia, ae o le mea lea na ou sau ai e fai papatisoga i le vai, ina ia faailoa atu ai o ia iā Isaraelu.”+
32 Ua molimau foʻi Ioane e faapea: “Na ou iloa atu le agaga ua alu ifo mai i le lagi e pei o se lupe, ma tumau i ona luga.+
33 Ou te leʻi iloa foʻi o ia, a o Lē na auina mai aʻu e faia le papatisoga i le vai, na fetalai mai o ia: ‘O lē e te vaaia ua alu ifo le agaga ma tumau ai i ona luga,+ o ia lenā e papatiso atu i le agaga paia.’+
34 Na ou vaai i ai, ma ou te molimau atu o ia lenei o le Alo o le Atua.”+
35 I le aso foʻi na sosoo ai, a o tutū faatasi Ioane ma ona soo e toʻalua,
36 ma ua ia iloa atu Iesu o loo savali ane, ona ia faapea atu lea: “Faauta, o le Tamaʻi Mamoe+ a le Atua!”
37 Ua faalogo soo e toʻalua i ana upu, ona la mulimuli mai ai lea iā Iesu.
38 Ona faliu atu lea o Iesu ma silasila atu o loo la mulimuli mai iā te ia, ua ia fetalai atu: “O le ā le mea o loo oulua saʻilia?” Ua la tali mai iā te ia: “Rapi e, (o lona uiga pe a faaliliuina, o le “Aʻoaʻo”) o fea o loo e nofo ai?”
39 Ua fetalai atu o ia iā i laʻua: “Ō mai, ona oulua iloa ai lea.” Ona la ō atu lea, ma iloa ai le mea o loo nofo ai o ia, ona latou nonofo ai lea i lenā aso; pe e tusa lea o le itula e sefulu.*
40 O Aneterea+ le uso o Simona Peteru, o le tasi lea o i laʻua na faalogo i upu a Ioane, ona mulimuli ai lea iā Iesu.
41 Ona ia alu atu loa lea ma maua ai lona uso o Simona, ma fai atu i ai: “Ua ma maua le Mesia”+ (o lona uiga pe a faaliliuina, o le “Keriso”).
42 Ona ia taʻitaʻi atu lea o ia iā Iesu. Ua silasila atu Iesu iā te ia ma fetalai atu: “O oe o Simona+ le atalii o Ioane; o le a faaigoa oe o Kefa” (pe a faaliliuina, o “Peteru”).+
43 Ua finagalo o ia e alu atu i Kalilaia i le aso e sosoo ai. Ona maua ai lea e Iesu o Filipo+ ma fetalai atu iā te ia: “Inā mulimuli mai ia iā te aʻu.”
44 E sau Filipo mai Petesaita, o le aai lenā o Aneterea ma Peteru.
45 Ua maua e Filipo o Natanielu+ ma fai atu iā te ia: “Ua matou maua o ia o lē na tusia e Mose i le Tulafono ma le ʻau Perofeta: O Iesu le atalii o Iosefa+ le Nasareta.”
46 Ae ua fai mai Natanielu iā te ia: “Pe e iai se mea lelei e sau mai i Nasareta?” Ua fai atu Filipo: “Sau e vaai.”
47 Ua silasila atu Iesu iā Natanielu o loo sau iā te ia, ona ia fetalai ane lea: “Vaai, o le tagata Isaraelu moni, e lē faaʻoleʻole o ia.”+
48 Ua fai mai Natanielu iā te ia: “E faapefea ona e iloa aʻu?” Ua tali atu Iesu iā te ia: “Na ou iloa atu oe i lalo o le mati a o leʻi valaau atu Filipo iā te oe.”
49 Ua tali mai Natanielu: “Le Aʻoaʻo e,* o oe o le Alo o le Atua, o oe o le Tupu o Isaraelu.”+
50 Ona tali atu lea o Iesu: “Po ua e talitonu ona na ou fai atu, na ou iloa oe i lalo o le mati? E sili atu mea o le a e vaaia nai lo o nei mea.”
51 Ona ia fetalai atili atu lea iā te ia: “E moni, e moni, ou te fai atu iā te outou, o le a outou iloa le lagi ua matala mai, ma agelu a le Atua ua ō aʻe ma ō ifo i le Atalii o le tagata.”+
Faamatalaga Pito i Lalo
^ Po o le “o loo i le fatafata o le Tamā.” E faasino atu i le iai o se faiā māfana faapitoa.
^ Tagaʻi i le Uiga o Upu.
^ E faasino atu i le pe ā o le 4 i le afiafi.
^ Po o le “Rapi e.” Tagaʻi i le Uiga o Upu.
