Faamaumauga a Ioane 10:1-42
10 “E moni, e moni, ou te fai atu iā te outou, o lē e lē ui mai i le faitotoʻa o le lotoā o mamoe, ae ui mai i se isi mea, o se tagata gaoi lea ma faomea.+
2 A o lē e ui mai i le faitotoʻa, o ia lea o le leoleo o le lafu mamoe.+
3 E tatala atu le faitotoʻa iā te ia e le leoleo faitotoʻa,+ ma e faalogo foʻi mamoe i lona leo.+ E na te valaau ana mamoe i o latou igoa ma taʻitaʻi ese atu.
4 Pe a ia aumaia i fafo ana mamoe uma, ona muamua atu lea o ia, ae mulimuli atu mamoe iā te ia, auā e iloa e mamoe lona leo.
5 E lē mulimuli atu mamoe i se tagata ese, ae o le a sosola ese mai iā te ia, auā e lē iloa e mamoe leo o tagata ese.”
6 Ua fetalai atu Iesu iā i latou i lenei talafaatusa, ae e latou te leʻi malamalama i le uiga o mea ua ia fetalai atu ai iā i latou.
7 Ona toe fetalai atu lea o Iesu: “E moni, e moni, ou te fai atu iā te outou, o aʻu o le faitotoʻa o mamoe.+
8 O i latou uma na ō mai ma faaaogā sesē loʻu igoa, o i latou ia e gāoi ma faomea; ae e leʻi faalogo mamoe iā i latou.
9 O aʻu o le faitotoʻa; o sē e ui mai iā te aʻu, e faaolaina o ia, ma e ulu atu o ia i totonu, ma toe ulufafo, ma maua le vao lelei e ʻai ai.+
10 O lē e gaoi, e pau le mea e sau ai o ia, ina ia gaoi, fasi ma faaumatia.+ Ae ua ou sau ina ia maua e mamoe le ola, ma saga maua atili ai.
11 O aʻu o le leoleo mamoe lelei;+ e foaʻi atu e le leoleo mamoe lelei lona ola mo mamoe.+
12 A o le tagata faigaluega, e lē o le leoleo mamoe o ia, e lē o ia foʻi e ana mamoe. Ua vaai atu o ia ua sau le luko, ona ia lafoaʻi lea o mamoe ae sola, ma ua sau le luko ma puʻe mamoe ma faataapeapeina.
13 Auā o ia o se tagata faigaluega, ma e lē manatu mamafa i mamoe.
14 O aʻu o le leoleo mamoe lelei. Ua ou iloa aʻu mamoe, ma e iloa foʻi aʻu e aʻu mamoe,+
15 e pei ona iloa aʻu e le Tamā ma ou iloa foʻi le Tamā;+ ou te foaʻiina atu foʻi loʻu ola mo mamoe.+
16 “Ua iā te aʻu isi mamoe, e lē o i lenei lotoā;+ e tatau foʻi ona ou aumaia i latou, ma o le a latou faalogo i loʻu leo, ona avea ai lea o i latou ma lafu e tasi, e tausia e le leoleo mamoe e toʻatasi.+
17 O le mea lea e alofa ai le Tamā iā te aʻu,+ auā ou te foaʻiina atu loʻu ola+ ina ia ou toe maua mai ai.
18 E leai se tasi na te aveesea loʻu ola mai iā te aʻu, ae ou te lotomalie e foaʻiina atu. Ua iā te aʻu le pule e foaʻi atu ai, ua iā te aʻu foʻi le pule e toe maua mai ai.+ Ua ou maua lenei poloaʻiga mai i loʻu Tamā.”
19 Ona o nei upu, ua toe vaeluaina ai foʻi tagata Iutaia.+
20 Ua faapea ane le toʻatele: “Ua iā te ia se temoni ma ua faalētonu lona mafaufau. Aiseā tou te faalogo ai fua iā te ia?”
21 Ae ua faapea mai nisi: “E lē o ni upu nei a se tagata ua iai se temoni. E lē mafai e se temoni ona faapupula mata o se tagata ua tauaso, a ea?”
22 I lenā taimi, o loo faia ai i Ierusalema le Tausamiga o le Faapaiaga. O le taimi lea o le tau mālūlū,
23 ma o loo savali Iesu i le malumalu i le faapaologa o Solomona.+
24 Ona siʻo lea o ia e tagata Iutaia ma fesili mai iā te ia: “O afea ea e te taʻu mai ai iā i matou le mea moni e faatatau iā te oe? Afai o oe o le Keriso, ia taʻu saʻo mai.”
25 Ua tali atu Iesu iā i latou: “Ua ou taʻu atu iā te outou, ae tou te lē talitonu. O galuega o loo ou faia i le suafa o loʻu Tamā, ua molimau iā te aʻu.+
26 Peitaʻi, tou te lē talitonu lava, auā e lē o outou o ni aʻu mamoe.+
27 E faalogo aʻu mamoe i loʻu leo, ou te iloa foʻi i latou, ma e latou te mulimuli mai iā te aʻu.+
28 Ou te foaʻi atu iā i latou le ola e faavavau,+ ma o le a lē faaumatia lava se tasi o i latou, e leai foʻi se tasi e faoa i latou mai i loʻu lima.+
29 O i latou ua foaʻi mai e loʻu Tamā iā te aʻu, e sili atu ona tāua nai lo o isi mea uma, ma e leai se tasi e mafai ona faoa i latou mai i le aao o loʻu Tamā.+
30 E tasi* i maʻua ma le Tamā.”+
31 Ona toe fetagofi foʻi lea o tagata Iutaia i maa e fetogi iā te ia.
32 Ua faapea atu Iesu: “Na ou faaalia atu iā te outou le tele o galuega lelei mai i loʻu Tamā. O lē fea la o na galuega e tou te fetogia ai aʻu?”
33 Ua tali mai tagata Iutaia iā te ia: “E matou te lē o fetogia oe ona o se galuega lelei, ae ona o le upuleaga;+ auā o oe o se tagata, ae ua e faia oe ma atua.”
34 Ua tali atu Iesu: “Pe e lē o tusia ea i la outou Tulafono, ‘Ua fetalai le Atua: “O outou o atua”’?*+
35 Ua tatou iloa e lē mafai ona faalēaogāina tusitusiga paia. Afai la ua ia taʻua o ‘atua’+ i latou o loo taʻusalaina i lana afioga,
36 pe e talafeagai la ona outou fai mai iā te aʻu, o lē ua faapaiaina ma auina mai e le Tamā i le lalolagi, ‘Ua e upuleaga i le Atua,’ ona ua ou fai atu, ‘O aʻu o le Atalii o le Atua’?+
37 Afai ou te lē o faia galuega a loʻu Tamā, aua tou te talitonu mai iā te aʻu.
38 Ae afai o loo oʻu faia ia galuega, e tusa lava pe tou te lē talitonu iā te aʻu, ae ia outou talitonu i galuega,+ ina ia outou iloa, ma iloa ai pea, e autasi le Tamā ma aʻu, ma ou te autasi foʻi ma le Tamā.”+
39 Ona latou toe taumafai foʻi lea e puʻe o ia, ae ua sola ese o ia mai iā i latou.
40 Ua toe alu atu o ia i le isi itu o Ioritana, i le mea na faia muamua ai e Ioane papatisoga,+ ma ua ia nofo ai i inā.
41 Ona ō mai lea o le toʻatele o tagata iā te ia, ma faapea mai: “E leʻi faia e Ioane se faailoga e tasi, ae ua moni mea uma lava na fai mai ai Ioane e uiga i lenei tagata.”+
42 Ua faatuatua foʻi le toʻatele i inā iā Iesu.
