Faamaumauga a Ioane 11:1-57
11 E iai se tagata ua maʻi e igoa iā Lasalo; e sau o ia mai i Petania, o le nuu lea o Maria ma lona uso o Mareta.+
2 O Maria lea sa liligiina le suāuu manogi i luga o le Alii, ma solo ona vae i lona lauulu;+ ma o lona tuagane Lasalo lea ua maʻi.
3 Ona auina atu lea e ona tuafāfine se feʻau iā te ia e faapea: “Le Alii e, silasila foʻi, ua maʻi lē ua e alofa faapelepele i ai.”
4 Ina ua faafofoga Iesu i le tala, ona ia faapea atu lea: “E lē iʻu lenei maʻi i le oti, ae e iʻu ina faamamaluina ai le Atua,+ ina ia faamamaluina ai le Alo o le Atua i lenei mea.”
5 E alofa Iesu iā Mareta, ma lona uso, ma Lasalo.
6 Ae ina ua ia faalogo o loo maʻi Lasalo, na nofo pea o ia i le mea na iai mo isi aso e lua.
7 Ua mavae lenei mea, ona faapea atu lea o ia i ona soo: “Seʻi tatou toe ō i Iutaia.”
8 Ua faapea mai le ʻausoo iā te ia: “Le Aʻoaʻo e,*+ e leʻi leva atu ona saʻili tagata Iutaia e fetogi iā te oe,+ ae po o le a e toe maliu atu foʻi i ai?”
9 Ae ua tali atu Iesu: “E 12 itula o le ao, a ea?+ Afai e savali se tasi i le ao, e lē fetoʻai o ia ma se mea, auā o loo vaai o ia i le malamalama o lenei lalolagi.
10 Ae afai e savali se tasi i le pō, e fetoʻai o ia ma se mea, auā e lē o iā te ia le malamalama.”
11 Ina ua uma ona fetalai o ia i nei mea, ona ia faapea atu lea iā i latou: “Ua moe la tatou uō o Lasalo,+ ae ou te alu atu e fafagu o ia.”
12 Ona tali mai lea o ona soo iā te ia: “Le Alii e, afai o loo moe o ia, o le a toe malosi.”
13 Peitaʻi, ua fetalai Iesu e uiga i le oti o Lasalo. Ae ua manatu i latou ua fetalai o ia, o loo moe o ia e mālōlō.
14 Ona fetalai saʻo atu lea o Iesu iā i latou: “Ua oti Lasalo,+
15 ma ua ou olioli ona ou te leʻi iai i inā, auā o le mea o le a ou faia, o le a atili ai ona malosi lo outou faatuatua. Ae seʻi tatou ō atu iā te ia.”
16 Ua fai atu foʻi Toma, o lē ua taʻua o le Masaga i isi soo: “Seʻi tatou ō foʻi, ina ia tatou feoti faatasi ma ia.”+
17 Ina ua taunuu Iesu, ona ia silafia ai lea ua fā aso talu ona iai Lasalo i le tuugamau.
18 E latalata Petania i Ierusalema, e pe ā ma le lua maila* le mamao.
19 E toʻatele foʻi tagata Iutaia ua ō mai e faamāfanafana iā Mareta ma Maria, ona o lo la tuagane.
20 Ua faalogo Mareta ua sau Iesu, ona alu ai lea e faafeiloaʻi o ia, ae ua nofo pea Maria+ i le fale.
21 Ona fai mai lea o Mareta iā Iesu: “Le Alii e, ana e iai i inei, semanū e lē oti loʻu tuagane.
22 Ae ui i lea, ou te iloa o so o se mea lava e te talosaga atu ai i le Atua, e foaʻi mai lava e le Atua iā te oe.”
23 Ua fetalai atu Iesu iā te ia: “O le a toetū lou tuagane.”
24 Ua faapea mai Mareta iā te ia: “Ou te iloa e toetū o ia i le toetū+ i le aso mulimuli.”
25 Ona fetalai atu lea o Iesu iā te ia: “O aʻu o le toetū ma le ola.+ O lē e faatuatua mai iā te aʻu, e ui ina oti o ia, ae e toe ola mai lava;
26 a o ē o loo ola ma faatuatua mai iā te aʻu, e lē feoti lava.+ Pe e te talitonu i lenei mea?”
27 Ona fai mai lea o ia iā te ia: “Ioe, le Alii e, ua ou talitonu o oe o le Keriso, o le Alo o le Atua, o lē ua maliu mai i le lalolagi.”
28 Ua uma ona ia fai atu lenei mea, ona alu lea e aumai lona uso o Maria, ua musumusu atu: “Ua oo mai le Aʻoaʻo+ ma o loo fia vaai iā te oe.”
29 Ina ua ia faalogo i lenei mea, ona tū loa lea i luga ma alu atu iā Iesu.
30 E leʻi alu ane Iesu i le nuu, ae o loo iai pea o ia i le mea na la feiloaʻi ai ma Mareta.
31 Ina ua vāai atu tagata Iutaia na faatasi ma Maria i le fale, o ē na ō atu e faamāfanafana iā te ia, ua tū faavave i luga Maria ma alu i fafo, ona latou mulimuli atu lea iā te ia ma le manatu, o loo alu o ia i le tuugamau+ e tagi ai.
32 Ua taunuu Maria i le mea o loo iai Iesu ma iloa mai o ia, ona ia faapaʻū lea i vae o Iesu, ma faapea mai: “Le Alii e, ana e iai i inei, semanū e lē oti loʻu tuagane.”
33 Ina ua silasila atu Iesu ua fetagisi o ia ma tagata Iutaia ua ō mai ma ia, ona ootia ai lea o lona loto* ma ua matuā mafatia.
34 Ua ia fesili atu: “O fea ua outou tuu ai o ia?” Ua latou fai mai: “Le Alii e, inā maliu mai ia e silasila i ai.”
35 Ona tagi ai lea o Iesu.+
36 O lea, ua faapea mai ai tagata Iutaia: “Vaai foʻi i lona alofa faapelepele iā te ia!”
37 Ae ua faapea mai nisi: “Pe e lē mafai ea e lenei tagata o lē na ia faapupulaina mata o le tauaso,+ ona taofia le oo o le oti i lenei tagata?”
38 Ua toe ootia le loto o Iesu, ona alu atu lea i le tuugamau. O le mea moni, o le tuugamau, o se ana, ma o loo taatia ai se maa.
39 Ua fetalai atu Iesu: “Ia aveese le maa.” Ae ua fai mai Mareta le tuafafine o lē ua oti: “Le Alii e, ua tatau ona manogi lona tino, auā o lona fā lenei o aso.”
40 Ua fetalai atu Iesu iā te ia: “Po ou te leʻi fai atu ea iā te oe, afai e te talitonu, e te vaai i le mamalu o le Atua?”+
41 Ona latou aveese ai lea o le maa. Ua tepa aʻe Iesu i le lagi,+ ma faapea atu: “Loʻu Tamā e, ou te faafetai atu iā te oe ona ua e faafofoga mai iā te aʻu.
42 E moni ua ou iloa, e te faafofoga mai pea iā te aʻu. Ae ona o le motu o tagata o loo tutū mai, ua ou tautala atu ai ina ia latou talitonu ua e auina mai aʻu.”+
43 Ua uma ona fetalai o ia i nei mea, ona alaga atu lea ma le leotele: “Lasalo e, inā sau ia i fafo!”+
44 Ona sau ai lea i fafo o le tagata na oti, o loo fusi ona vae ma ona lima i ʻie ma o loo fusi foʻi ona foliga i se ʻie. Ua fetalai atu Iesu iā i latou: “Ia tatala o ia ma tuu atu e alu.”
45 O le mea lea, ua faatuatua ai iā te ia le toʻatele o tagata Iutaia na ō mai iā Maria, ma vāai i mea ua ia faia;+
46 ae ua ō atu nisi o i latou ma taʻu atu i le ʻau Faresaio mea na faia e Iesu.
47 Ona faapotopoto faatasi lea e le ʻaufaitaulaga sili ma le ʻau Faresaio o le Faamasinoga Sili, ma faapea atu: “O le ā sa tatou mea a fai, ona ua faia e lenei tagata le tele o faailoga?+
48 Afai tatou te tuu ai pea o ia, o le a faatuatua tagata uma iā te ia, ona ō mai lea o tagata Roma ma aveese lo tatou fale* ma lo tatou nuu.”
49 Ae ua faapea mai se tasi o i latou, e igoa iā Kaiafa,+ o le ositaulaga sili i lenā tausaga: “Tou te lē iloa lava se mea;
50 pe e tou te lē iloa ea, e mo lo outou lava lelei le oti o le tagata e toʻatasi mo le nuu, nai lo o le faaumatia o le nuu atoa?”
51 Peitaʻi, e lē o ia na pogai ai nei upu; ae ona o ia o le ositaulaga sili i lenā tausaga, ua ia valoia ai o le a maliu Iesu mo le nuu atoa,
52 ma e lē mo na o le nuu, ae ina ia faapotopoto faatasi ai le fanau a le Atua o loo taapeape solo.
53 Ona amata ai lea i lenā aso, ona latou taupulepule e fasioti iā te ia.
54 O le mea lea ua lē toe femaliuaʻi ai Iesu i luma o tagata Iutaia, ae ua ia tuua i inā, ae alu atu i le aai e taʻua o Efaraima+ e latalata i le vao, ma nonofo ai i inā ma ona soo.
55 Ua latalata le Paseka+ a tagata Iutaia, ma e toʻatele ua tuua o latou nuu, ae ō atu i Ierusalema ina ia faamamāina ai i latou, a o leʻi oo i le Paseka.
56 Ua latou ō atu ma saʻili iā Iesu, ma ua fai atu le tasi i le isi a o latou tutū i le malumalu: “O le ā so outou manatu? Pe e faamata o le a lē sau o ia i le tausamiga?”
57 Ae ua uma ona tuuina atu e le ʻaufaitaulaga sili ma le ʻau Faresaio faatonuga e faapea, afai e iloa e se tasi le mea o iai Iesu, e tatau ona faailoa mai, ina ia latou puʻe ai iā te ia.
Faamatalaga Pito i Lalo
^ Po o le “Rapi e.” Tagaʻi i le Uiga o Upu.
^ Ele., “o lona agaga.”
^ E faasino atu i le malumalu.
