Faamaumauga a Ioane 13:1-38
13 A o leʻi oo i le tausamiga o le Paseka, ua silafia e ia, ua oo mai lona taimi*+ e tuua ai lenei lalolagi ae alu atu i le Tamā.+ Ua alofa Iesu i ona soo i le lalolagi, ma ua alofa iā i latou e oo i le gataaga.+
2 Ua faia le talisuaga afiafi, ma ua uma ona tuu e le Tiapolo i le loto o Iuta le Sekara,+ le atalii o Simona, e na te faalataina o ia.+
3 Ua silafia e Iesu ua tuuina mai e le Tamā mea uma i ona aao, ma na sau o ia mai i le Atua, e toe alu atu foʻi o ia i le Atua.+
4 Ua tulaʻi o ia a o faia le talisuaga afiafi, ma tuu ese lona ofu tele. Ua tago i le solo ma fusi ai lona puimanava.*+
5 Ina ua māeʻa, ona ia tuu lea o ni vai i le tanoa, ma amata ona fufulu ai vae o ona soo, ua ia soloi foʻi i le solo lea sa fusi ai o ia.
6 Ua oo atu o ia iā Simona Peteru. Ona fai mai lea o Peteru iā te ia: “Le Alii e, e te fufuluina ea oʻu vae?”
7 Ua tali atu Iesu iā te ia: “E te lē malamalama i le taimi lenei i le mea lea ou te faia, ae e te malamalama i ai mulimuli ane.”
8 Ua fai mai Peteru iā te ia: “E te lē fufuluina lava oʻu vae.” Ua tali atu Iesu: “Afai ou te lē fufuluina ou vae,+ e leai sou tofi faatasi ma aʻu.”
9 Ua fai mai Simona Peteru iā te ia: “Le Alii e, ia fufulu e lē na o oʻu vae, ae o oʻu lima foʻi ma loʻu ulu.”
10 Ua tali atu Iesu iā te ia: “O lē ua uma ona tāʻele, e manaʻomia ona fufulu tau o ona vae, auā o loo mamā le tino atoa. Ua mamā outou, ae lē o outou uma.”
11 Auā ua ia silafia le tagata e faalataina o ia.+ O le mea lea ua ia fetalai ai: “E lē o outou uma e mamā.”
12 Ina ua uma ona ia fufuluina o latou vae, ona ofu lea o lona ofu tele ma toe taoto e taumafa, ua ia faapea atu iā i latou: “Po ua outou malamalama i le mea ua ou faia iā te outou?
13 Ua outou taʻua aʻu o le ‘Aʻoaʻo’ ma o le ‘Alii,’ ma e saʻo outou auā o aʻu lava lenā.+
14 O le mea lea, pe afai o aʻu o le Alii ma o le Aʻoaʻo, ae ua ou fufuluina o outou vae,+ e tatau foʻi la iā te outou ona fufulu e le tasi vae o le isi.*+
15 Auā ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.+
16 E moni, e moni, ou te fai atu iā te outou, e lē sili le pologa i lona matai, e lē sili foʻi lē ua auina atu, i lo o lē na te auina atu o ia.
17 Afai ua outou iloa nei mea, e fiafia outou pe a outou faia.+
18 Ou te lē o fai atu iā te outou uma; auā ua ou iloa ē ua ou filifilia. Ae ua tupu lenei mea ina ia taunuu ai tusitusiga paia:+ ‘O lē na ʻai i aʻu meaʻai, ua ia aa mai iā te aʻu i lona mulivae.’*+
19 Ou te fai atu nei mea iā te outou a o leʻi taunuu, ina ia outou talitonu ai o aʻu o ia pe a taunuu nei mea.+
20 E moni, e moni, ou te fai atu iā te outou, o lē e taliaina so o se tasi ou te auina atu, ua ia talia foʻi aʻu,+ ma o lē e na te taliaina aʻu, ua talia foʻi e ia o Lē na auina mai aʻu.”+
21 Ua uma ona fetalai Iesu i nei mea, ona ootia ai lea o lona loto;* ua ia molimau ma fetalai atu: “E moni, e moni, ou te fai atu iā te outou, e iai se tasi o outou e na te faalataina aʻu.”+
22 Ona fetilofaʻi lea o le ʻausoo, auā ua latou lē iloa po o ai o loo ia fetalai i ai.+
23 E iai se tasi o soo e alofagia e Iesu,+ ua taoto e latalata iā* Iesu.
24 Ona geno atu lea o Simona Peteru i lenā tagata ma faapea atu iā te ia: “Taʻu mai po o ai lea o loo ia fetalai i ai.”
25 Ona faalagolago lea o ia i le fatafata o Iesu ma fai mai iā te ia: “Le Alii e, o ai ea o ia?”+
26 Ua tali atu Iesu: “O lē ou te avatu i ai le fasi falaoa ua ou loloiina.”+ Ona ia loiloi lea o le fasi falaoa ma avatu iā Iuta le atalii o Simona le Sekara.
27 Ua uma ona ave e Iuta le fasi falaoa, ona ulu lea o Satani iā te ia.+ Ona faapea atu lea o Iesu iā te ia: “O le mea ua e manatu e fai, ia vave nei loa ona fai.”
28 Peitaʻi, e leai se tasi o i latou ua taooto e aai, ua iloa pe aiseā ua ia fetalai atu ai faapea iā te ia.
29 O le mea moni, talu ai o lea e iā Iuta le pusa tupe,+ ua manatu ai nisi, o loo fetalai atu Iesu iā te ia, “Ia faatau mai mea tatou te manaʻomia mo le tausamiga,” pe e tatau ona ia avatu ni mea i ē e matitiva.
30 Ua uma ona ia talia le fasi falaoa, ona alu loa lea o ia i fafo, ma ua pō.+
31 Ina ua alu o ia i fafo, ona faapea atu lea o Iesu: “Ua faamamaluina nei le Atalii o le tagata,+ ma ua faamamaluina le Atua e ala iā te ia.
32 O le a faamamaluina o ia e le Atua,+ ma o le a faamamaluina nei loa o ia e le Atua.
33 Le fanau e, ua lē o toe umi se taimi tatou te faatasi ai. O le a outou saʻili mai iā te aʻu; ma e pei ona ou fai atu i tagata Iutaia, ou te toe fai atu ai nei foʻi iā te outou, ‘E lē mafai ona outou ō mai i le mea ou te alu i ai.’+
34 Ua ou tuuina atu iā te outou se poloaʻiga fou, ina ia outou alolofa o le tasi i le isi. E pei ona ou alofa atu iā te outou,+ ia outou alolofa foʻi o le tasi i le isi.+
35 O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”+
36 Ona fai mai lea o Simona Peteru iā te ia: “Le Alii e, o fea a e maliu i ai?” Ua tali atu Iesu: “O le mea ou te alu i ai, e lē mafai ona e mulimuli mai ai nei iā te aʻu, ae e mulimuli ane e te alu atu i ai.”+
37 Ua fai mai Peteru iā te ia: “Le Alii e, aiseā e lē mafai ai ona ou mulimuli atu nei iā te oe? O le a ou tuuina atu loʻu ola ona o oe.”+
38 Ua tali atu Iesu: “E te tuuina atu ea lou ola ona o aʻu? E moni, e moni, ou te fai atu iā te oe, a o leʻi vivini le toa, ae ua faatolu ona e faafiti iā te aʻu.”+
Faamatalaga Pito i Lalo
^ Ele., “itula.”
^ Po o le “fusi ai o ia.”
^ Po o le “o la outou tiute tauave foʻi la le fufulu e le tasi o vae o le isi.”
^ Po o le “ua ia faasagatau mai iā te aʻu.”
^ Ele., “o lona agaga.”
^ Ele., “taoto i le fatafata o.”
