Faamaumauga a Ioane 15:1-27
15 “O aʻu o le vine moni, a o loʻu Tamā o lē e galue vine.
2 O lālā uma ua iā te aʻu e lē fua mai, e na te aveeseina, a o lālā uma e fua mai, e na te teuteuina* ina ia saga fua tele mai.+
3 Ua uma ona faamamāina outou, ona o le upu na ou tautala atu ai iā te outou.+
4 Ia tumau ona outou autasi ma aʻu, ma o le a tumau ona ou autasi ma outou. E pei ona lē mafai ona fua mai o se lālā pe a lē tumau ona pipii i le vine, e faapena foʻi outou, pe a lē tumau ona autasi ma aʻu.+
5 O aʻu o le vine, a o outou o lālā. O lē e tumau ona autasi ma aʻu ma ou te autasi ma ia, o le a fua tele mai o ia;+ auā e lē mafai ona outou faia se mea e tasi pe a ou lē iai.
6 Afai e lē tumau ona autasi se tasi ma aʻu, e lafoaʻi ese o ia e pei o se lālā ma mago ai. E aoina e tagata na lālā ma lafo i le afi ma susunu ai.
7 Afai e tumau ona outou autasi ma aʻu, ma tumau foʻi aʻu upu iā te outou, o so o se mea lava e tou te mananaʻo i ai e tou te ōle atu ai, e foaʻiina mai lava iā te outou.+
8 Ua faamamaluina loʻu Tamā ona o lenei mea, i lo outou saga fua tele mai ma faamaonia ai o outou o oʻu soo.+
9 E pei ona alofa mai le Tamā iā te aʻu,+ e faapena foʻi ona ou alofa atu iā te outou; ia outou tumau i loʻu alofa.
10 Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa.
11 “Ua ou tautala atu i nei mea iā te outou, ina ia iā te outou loʻu olioli, ma faaatoatoaina ai lo outou olioli.+
12 O laʻu poloaʻiga lenei, ia outou alolofa o le tasi i le isi e pei ona ou alofa iā te outou.+
13 E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.+
14 O outou o aʻu uō, pe afai tou te faia mea ua ou poloaʻi atu ai.+
15 Ou te lē toe taʻua outou o pologa, auā e lē iloa e se pologa le mea e faia e lona matai. Ae ua ou taʻua outou o uō, auā ua ou faailoa atu iā te outou mea uma na ou faalogo ai mai i loʻu Tamā.
16 Tou te leʻi filifilia aʻu, ae ua ou filifilia outou. Ua ou tofia foʻi outou ina ia saga fua tele mai, ma ia tumau o outou fua, ina ia foaʻi mai iā te outou e le Tamā so o se mea tou te talosaga atu ai i loʻu igoa.+
17 “O mea nei ua ou poloaʻia ai outou, ina ia outou alolofa o le tasi i le isi.+
18 Afai e ʻinoʻino mai le lalolagi iā te outou, ia outou iloa ua ʻinoʻino muamua mai iā te aʻu nai lo o outou.+
19 Afai o ni tagata o le lalolagi outou, e alofa mai le lalolagi iā te outou auā o ona tagata. A o lenei, e lē o ni tagata o le lalolagi outou,+ ae ua ou filifilia outou mai i le lalolagi, o le mea lea e ʻinoʻino ai le lalolagi iā te outou.+
20 Ia outou manatua upu na ou fai atu ai iā te outou: E lē sili se pologa i lona matai. Afai na latou faasauā mai iā te aʻu, e latou te faasauā foʻi iā te outou.+ Afai e latou te tausi i laʻu upu, e latou te tausi foʻi i a outou upu.
21 Ae latou te faia nei mea uma e tetee atu ai iā te outou ona o loʻu igoa, auā latou te lē iloa Lē na auina mai aʻu.+
22 Pe ana ou lē sau ma tautala atu iā i latou, semanū e leai sa latou agasala.+ A o lenei, ua leai sa latou faamolemolega mo a latou agasala.+
23 O lē e ʻinoʻino mai iā te aʻu, ua ʻinoʻino foʻi i loʻu Tamā.+
24 Pe ana ou lē faia iā i latou galuega e leʻi faia e se tasi, semanū ua leai sa latou agasala;+ a o lenei ua latou vāai iā te aʻu ma ʻinoʻino mai iā te aʻu. Ua latou ʻinoʻino foʻi i loʻu Tamā.
25 Ae ua tupu lenei mea ina ia taunuu ai le upu ua tusia i la latou Tulafono: ‘Ua latou ʻinoʻino mai fua iā te aʻu.’+
26 Pe a oo mai le fesoasoani ou te auina mai iā te outou mai le Tamā, o le agaga lea o le upu moni+ e sau mai le Tamā, o le a molimau lenā agaga e uiga iā te aʻu.+
27 O le a outou molimau atu foʻi,+ auā na outou faatasi ma aʻu mai i le amataga.
Faamatalaga Pito i Lalo
^ Ele., “faamamāina.”
