Faamaumauga a Ioane 18:1-40
18 Ina ua uma ona fetalai atu Iesu i nei mea, ona ō lea o ia ma ona soo i le isi itu o le vanu o Ketarono,*+ i le mea o iai le togālaau, ma ua ō atu i ai ma ona soo.+
2 E iloa foʻi lea nofoaga e Iuta, o lē e faalataina o ia, auā e masani ona feiloaʻi Iesu ma ona soo i inā.
3 Ona ave lea e Iuta o le ʻaufitafita ma leoleo a le ʻaufaitaulaga sili ma le ʻau Faresaio, ua ō atu i inā ma sulu, o molī, ma auupega.+
4 Ua silafia e Iesu mea uma o le a oo iā te ia, ona ia alu atu lea ma faapea atu iā i latou: “O ai o loo outou saʻilia?”
5 Ua latou tali mai iā te ia: “O Iesu le Nasareta.”+ Ona ia fetalai atu lea iā i latou: “O aʻu lenei o ia.” O loo tū faatasi mai foʻi ma i latou Iuta, o lē na te faalataina o ia.+
6 Ae ina ua fetalai atu Iesu iā i latou: “O aʻu lenei o ia,” ona latou solomuli lea ma ua paʻuʻū i le eleele.+
7 Ua ia toe fesili atu iā i latou: “O ai o loo outou saʻilia?” Ua latou faapea mai: “O Iesu le Nasareta.”
8 Ua tali atu Iesu: “Na ou fai atu, o aʻu lenei. Afai o aʻu lea o loo outou saʻilia, ia tuu nei tamāloloa e ō.”
9 Na tupu lenei mea, ina ia taunuu ai le upu na ia fetalai ai: “E leai lava se tasi o i latou na e foaʻiina mai iā te aʻu, ua leiloa.”+
10 O Simona Peteru foʻi, o lē ua iai le pelu, ua ia seʻi ane ma tā ai le pologa a le ositaulaga sili, ma ua tipiesea ai lona taliga taumatau.+ O le igoa o le pologa, o Maliko.
11 Ae ua fetalai atu Iesu iā Peteru: “Ia sulu le pelu i lona faamoega.+ Pe e lē tatau ea ona ou inu i le ipu ua tuuina mai e le Tamā iā te aʻu?”+
12 Ona puʻe lea o Iesu ma saisaia e fitafita ma le alii e pule i ʻau, ma leoleo o tagata Iutaia.
13 Ua latou avatu muamua o ia iā Ana, auā o ia o le tamā o le avā a Kaiafa,+ o lē ua avea ma ositaulaga sili i lenā tausaga.+
14 O Kaiafa lenei lea na fautuaina tagata Iutaia e faapea, e mo lo latou lelei le oti o le tagata e toʻatasi mo le nuu.+
15 Ona mulimuli atu lea o Simona Peteru ma le isi soo iā Iesu.+ O le soo lenā e masani ai le ositaulaga sili, ma ua ulu atu o ia faatasi ma Iesu i le lotoā o le ositaulaga sili,
16 ae o loo tū Peteru i fafo o le faitotoʻa.* Ona alu atu lea o le isi soo, lea e masani ai le ositaulaga sili, ua talanoa atu i le leoleo faitotoʻa ona aumai ai lea o Peteru i totonu.
17 Ua fai atu le auauna teine, o ia foʻi o le leoleo faitotoʻa, iā Peteru: “Po o oe o se soo o lenā tagata?” Ua ia fai mai: “E leai.”+
18 Talu ai ona o le mālūlū, ua tafu ai e pologa ma leoleo se afi malala, ma tutū faataamilo ai ina ia faamāfanafana ai i latou. O loo tū ai foʻi ma Peteru faatasi ma i latou o loo faamāfanafana i le afi.
19 Ona fesili mai lea o le faitaulaga sili iā Iesu e uiga i ona soo ma ana aʻoaʻoga.
20 Ua tali atu Iesu iā te ia: “Na ou tautala atu i luma o tagata uma. Na masani foʻi ona ou aʻoaʻo atu i sunako ma i le malumalu,+ lea e ō mai uma i ai tagata Iutaia, ma ou te leʻi tautala faalilolilo i se mea.
21 Aiseā ua e fesili mai ai iā te aʻu? Fesili atu iā i latou o ē na faalogo i mea na ou tautala atu ai iā i latou. Tagaʻi foʻi! Ua latou iloa le mea na ou fai atu ai.”
22 Ina ua uma ona fetalai Iesu i nei mea, ona pō lea o ona fofoga+ e se leoleo na tū ai i inā, ma fai mai: “E te tautala ea faapena i le faitaulaga sili?”
23 Ua tali atu Iesu iā te ia: “Afai ua sesē saʻu upu, ia e taʻu mai* le mea ua sesē ai, ae afai ua saʻo, aiseā la ua e pōina ai aʻu?”
24 Ona auina ese atu lea o ia e Ana a o saisai o ia, iā Kaiafa le ositaulaga sili.+
25 O le taimi lea o loo tū ai i inā Simona Peteru ma faamāfanafana i le afi. Ua latou faapea atu iā te ia: “Pe lē o oe ea o se tasi o ona soo?” Ua faafiti o ia ma faapea mai: “E leai.”+
26 Ona fai atu lea o se tasi o pologa a le ositaulaga sili, o se tauaiga o le tagata na tipi ese e Peteru le taliga:+ “Po ou te leʻi vaai ea iā te oe o faatasi ma ia i le togālaau?”
27 Ae ua toe faafiti foʻi Peteru, ona vivini loa lea o se toa.+
28 Ona latou ave lea o Iesu mai iā Kaiafa i le maota o le kovana.+ O le taeaopō lea. Ae e latou te leʻi ulu atu i le maota o le kovana, neʻi lē mamā+ i latou ma lē mafai ai ona aai i le Paseka.
29 Ona sau lea i fafo o Pilato iā i latou ma faapea atu: “O le ā se mea ua outou molia ai lenei tagata?”
30 Ua latou tali mai iā te ia: “Ana lē faia e lenei tagata se mea sesē,* semanū matou te lē aumaia o ia iā te oe.”
31 Ona fai atu lea o Pilato iā i latou: “Ia outou ave o ia ma faamasino e tusa ma la outou tulafono.”+ Ua tali ane tagata Iutaia: “E faasā ona matou fasiotia se tasi.”+
32 Ua tupu lenei mea, ina ia taunuu ai le fetalaiga a Iesu lea na faailoa mai ai le auala e maliu ai o ia.+
33 Ona toe ulu atu lea o Pilato i le maota o le kovana, ua valaau iā Iesu ma faapea mai: “Po o oe ea o le Tupu o tagata Iutaia?”+
34 Ua tali atu Iesu: “Po o ou lava manatu ua e fesili mai ai, pe na taʻu atu aʻu e nisi iā te oe?”
35 Ua tali mai Pilato: “O aʻu ea o se Iutaia? O lou lava nuu ma le ʻaufaitaulaga sili ua latou aumaia oe iā te aʻu. O le ā se mea ua e faia?”
36 Ona tali atu lea o Iesu:+ “O loʻu Malo e lē mai le lalolagi lenei.+ Ana mai le lalolagi nei loʻu Malo, semanū ua tau aʻu auauna, ina neʻi tuuina atu aʻu i tagata Iutaia.+ A o lenei, e lē mai i inei loʻu Malo.”
37 Ona fai mai lea o Pilato iā te ia: “Po o oe ea la o se tupu?” Ua tali atu Iesu: “O lenā tonu lava ua e fai mai ai o aʻu o le tupu.+ O le mea lea na ou fanau mai ai, o le mea foʻi lea na ou sau ai i le lalolagi, ina ia ou molimau i le upu moni.+ O i latou uma e fiafia i le upu moni e faalogo i loʻu leo.”
38 Ua fai mai Pilato iā te ia: “O le ā le upu moni?”
Ina ua uma ona ia fai mai lea upu, ona alu lea o ia i fafo i tagata Iutaia, ma fai atu iā i latou: “Ou te lē iloa se mea sesē ua ia faia.+
39 O le isi mea, o loo iai la outou tū e faasaʻoloto ai se tagata iā te outou i le aso o le Paseka.+ Pe tou te mananaʻo ou te faasaʻolotoina le Tupu o tagata Iutaia?”
40 Ona latou toe alalaga atu lea: “E leai, e lē o le tagata lenā, a o Parapa!” Peitaʻi, o Parapa o se tagata faomea.+
Faamatalaga Pito i Lalo
^ Po o le “ālia o Ketarono.”
^ Po o le “i le mea e ulufale atu ai.”
^ Po o le “ia e molimau mai i.”
^ Po o le “Ana lē solitulafono lenei tagata.”
