Faamaumauga a Ioane 20:1-31
20 I le uluaʻi aso o le vaiaso, ua usu ai Maria le Makatala i le tuugamau a o pogisa lava,+ ma ua ia iloa ai ua uma ona aveese le maa mai le tuugamau.+
2 Ona ia tamoʻe atu lea iā Simona Peteru ma le isi soo, o lē ua alofa faapelepele+ i ai Iesu, ma faapea atu iā i laʻua: “Ua latou aveese le Alii mai i le tuugamau,+ ma ua matou lē iloa le mea ua latou tuuina ai o ia.”
3 Ona ō atu lea o Peteru ma le isi soo agaʻi i le tuugamau.
4 Ua amata ona taufetuli i laʻua, ae ua saoasaoa atu le isi soo iā Peteru, ma ua taunuu muamua o ia i le tuugamau.
5 Ua punou o ia ma autilo i totonu ma iloa atu ʻie lino o loo taatitia mai,+ ae e leʻi ulu atu o ia i totonu o le tuugamau.
6 Ona mulimuli atu lea o Simona Peteru iā te ia, ua ulu atu i le tuugamau, ma ua ia vaaia ai ʻie lino o loo taatitia mai.
7 O le ʻie foʻi na ufiufi ai lona ao, e lē o taatitia faatasi mai ma isi ʻie, ae ua tāʻai ma tuu ese i le isi itu.
8 Ona ulu atu foʻi lea o le isi soo, o lē na taunuu muamua i le tuugamau, ua ia vaai ma talitonu ai.
9 Auā e la te leʻi matuā malamalama i tusitusiga paia e faapea, e tatau ona toetū mai o ia mai le oti.+
10 Ona toe foʻi lea o i laʻua i o la aiga.
11 Ae ua tū pea Maria i fafo i tafatafa o le tuugamau, o loo tagi. A o tagi o ia, ua punou ma autilo atu i totonu o le tuugamau,
12 ua ia iloa atu ai agelu e toʻalua+ o loo oofu i ofu papaʻe, ua nonofo i le mea na tuu ai le tino o Iesu, o le tasi e i ulu, a o le tasi e i vae.
13 Ona la fai atu lea iā te ia: “Le mafine e, aiseā ua e tagi ai?” Ua fai mai o ia iā i laʻua: “Ua latou aveesea loʻu Alii, ma ou te lē iloa le mea ua latou tuuina ai o ia.”
14 Ua uma ona ia fai atu i nei mea, ona ia faliu lea i tua, ma vaaia ai Iesu o loo tū mai, ae e na te leʻi iloa o Iesu lea.+
15 Ua fetalai atu Iesu iā te ia: “Le mafine e, aiseā ua e tagi ai? O ai o loo e saʻilia?” Ua fai mai o ia ma le manatu o le tagata faitogālaau lea, e faapea: “Lau susuga e, afai na e aveesea o ia, ia taʻu mai iā te aʻu le mea ua e tuuina ai o ia, ina ia ou alu atu e ave o ia.”
16 Ua fetalai atu Iesu iā te ia: “Maria e!” Ua ia faliu ma faapea mai iā te ia i le gagana Eperu: “Raponi e!” (o lona uiga “le Aʻoaʻo e!”)
17 Ua fetalai atu Iesu iā te ia: “Aua e te pipii mai iā te aʻu, auā ou te leʻi alu aʻe i le Tamā. Ae ia e alu i oʻu uso+ ma fai atu iā i latou, ‘Ou te alu aʻe i loʻu Tamā,+ ma lo outou Tamā,+ i loʻu Atua ma lo outou Atua.’”
18 Ona alu atu lea o Maria le Makatala ma taʻu atu le tala i le ʻausoo e faapea: “Ua ou vaai i le Alii!” Ona ia taʻu atu lea o mea na ia fetalai atu ai iā te ia.+
19 Ua oo i le afiafi o le uluaʻi aso o le vaiaso, ma o loo loka faitotoʻa i le mea o loo iai le ʻausoo ona o le fefefe i tagata Iutaia, ae ua alu atu Iesu ma tū i lo latou lotolotoi ma fetalai atu: “Ia outou maua le filemu.”+
20 Ua uma ona ia fetalai atu i nei mea, ona ia faaali atu lea iā i latou o ona lima ma lona itu.+ Ona olioli ai lea o le ʻausoo ina ua vāai i le Alii.+
21 Ua toe fetalai atu Iesu iā i latou: “Ia outou maua le filemu.+ E pei ona auina mai aʻu e le Tamā,+ e faapea foʻi ona ou aauina atu outou.”+
22 Ua uma ona ia fetalai atu i lenei mea, ona ia feula atu lea iā i latou ma faapea atu: “Ia talia le agaga paia.+
23 Afai e tou te faamagaloina agasala a se tasi, ona faamagaloina lava lea; ae afai e tou te lē faamagaloina agasala a se tasi, ona lē faamagaloina lava lea.”
24 A o Toma,+ o se tasi o le toʻa 12, o lē ua taʻua o le Masaga, e leʻi iai o ia ma i latou ina ua alu atu Iesu.
25 Ona faapea atu lea o isi soo iā te ia: “Ua matou vāai i le Alii!” Ae ua fai mai o ia iā i latou: “E lē taitai ona ou talitonu seʻiloga ou te vaai i manuʻa* i ona lima i mea na tutuʻi i fao, ma tuu loʻu tamatamaʻilima i mea na tutuʻi i fao, ma loʻu lima i lona itu.”+
26 Ua mavae aso e valu, ua toe iai foʻi ona soo i totonu o le fale, ma ua faatasi ai ma Toma. E ui lava o loo loka faitotoʻa, ae ua alu atu Iesu ma tū i lo latou lotolotoi ma fetalai atu: “Ia outou maua le filemu.”+
27 Ona ia fetalai atu lea iā Toma: “Tuu mai lou tamatamaʻilima i i, ma vaai mai i oʻu lima, ma tuu mai lou lima i loʻu itu, ma soia e te masalosalo,* ae ia e talitonu mai.”
28 Ua tali mai Toma iā te ia: “Loʻu Alii e, ma loʻu Atua!”
29 Ua fetalai atu Iesu iā te ia: “Po ua e talitonu ea ona ua e vaai mai iā te aʻu? E fiafia i latou e lē vāai mai ae talitonu mai pea.”
30 O le mea moni, na faia foʻi e Iesu le tele o isi faailoga i luma o ona soo, ae e lē o tusia i lenei tusi.+
31 Ae ua tusia nei mea ina ia outou talitonu ai, o Iesu o le Keriso, o le Alo o le Atua, ma pe a outou talitonu, e tou te maua ai le ola e ala i lona suafa.+
