Faamaumauga a Ioane 4:1-54
4 Ua silafia e le Alii, ua logotala le ‘au Faresaio ua tele atu soo ua faia ma papatisoina+ e ia* nai lo o Ioane,
2 (e ui lava o soo o Iesu na faia papatisoga ae lē o Iesu)
3 ona ia tuua lea o Iutaia ae toe alu atu i Kalilaia.
4 Ae na tatau ona ui atu o ia i Samaria.
5 Ona oo atu lea o ia i se aai o Samaria ua taʻua o Sukara, e lata i le fanua lea na tuuina atu e Iakopo i lona atalii o Iosefa.+
6 O loo iai i inā le vaieli o Iakopo.+ Ua lē lavā Iesu mai i le malaga, ona ia nofo ai lea i le vaieli,* pe tusa o le itula e ono.*
7 Ua sau se fafine Samaria e asu vai. Ua fetalai atu Iesu iā te ia: “Aumai sina vai seʻi oʻu inu ai.”
8 (Ua ō atu ona soo i le aai e faatau mai ni meaʻai.)
9 Ae ua fai mai le fafine Samaria iā te ia: “Aiseā ua e talosaga mai ai mo se vai seʻi e inu ai, a o oe o le tagata Iutaia, ae o aʻu o se fafine Samaria?” (Auā e lē feaveaʻia mea a Iutaia ma Samaria.)+
10 Ona tali atu lea o Iesu iā te ia: “Ana e iloa le meaalofa foaʻifua a le Atua+ ma lē ua fai atu iā te oe, ‘Aumai sina vai seʻi oʻu inu ai,’ semanū ua e ōle mai iā te ia, ona ia avatu ai lea iā te oe o le vai o le ola.”+
11 Ua ia faapea mai iā te ia: “Lau susuga e, e leai sau pakete e asu aʻe ai le vai, ma e loloto le vaieli. O fea la e te maua mai ai lenei vai o le ola?
12 E sili ea oe i lo matou augātamā o Iakopo, o lē na tuu maia le vaieli iā i matou, ma na feinu ai o ia, ma ona atalii, ma ana lafu povi?”
13 Ua tali atu Iesu iā te ia: “O i latou uma e feinu i lenei vai, e toe fia feinu foʻi.
14 A o lē e inu i le vai ou te foaʻiina atu, e lē toe fia inu lava o ia.+ A o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.”+
15 Ua fai mai le fafine iā te ia: “Lau susuga e, aumai ia iā te aʻu lenā vai, ina ia ou lē toe fia inu ai pe toe sau ai foʻi i inei e asu vai.”
16 Ona fetalai atu lea o Iesu iā te ia: “Ia e alu ma valaau i lau tane ona e toe foʻi mai ai lea i inei.”
17 Ua tali mai le fafine: “E leai saʻu tane.” Ona fetalai atu lea o Iesu iā te ia: “Ua saʻo lau tali, e leai sau tane.
18 Auā e toʻalima au tane sa iai, ma o le tamāloa o loo lua nonofo nei, e lē o sau tane. Ua e tautala i le mea moni.”
19 Ua fai mai le fafine: “Lau susuga e, ua ou iloa o oe o se perofeta.+
20 Na tapuaʻi o matou tamā i luga o lenei mauga, ae ua outou faapea mai, o Ierusalema e tatau ona tapuaʻi ai tagata.”+
21 Ua fetalai atu Iesu: “Le mafine e, inā talitonu mai ia iā te aʻu, e oo mai le aso e tou te lē toe tapuaʻi ai i le Tamā i lenei mauga, po o i Ierusalema.
22 Ua outou tapuaʻi i mea tou te lē iloa;+ ae ua matou tapuaʻi i mea ua matou iloa, auā e amata mai i tagata Iutaia le faaolataga.+
23 Ae e oo mai le aso ma ua oo foʻi nei i ai, o ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o le mea moni, o loo saʻilia e le Tamā tagata faapena e tapuaʻi atu iā te ia.+
24 O le Atua o le Agaga,+ ma o i latou e tapuaʻi atu iā te ia, e tatau ona tapuaʻi atu e tusa ai ma le agaga ma le upu moni.”+
25 Ua fai mai le fafine iā te ia: “Ou te iloa o le a maliu mai le Mesia, o lē ua taʻua o le Keriso. Pe a sau o ia, o le a ia faailoa mai iā i matou mea uma.”
26 Ua fetalai atu Iesu iā te ia: “O aʻu lenei o ia, lea o loo tautala atu iā te oe.”+
27 Ua taunuu ona soo, ma ua faateʻia i latou ona o loo talanoa o ia ma se fafine. Ae ua leai se tasi e faapea mai: “E iai se mea o e saʻilia?” pe “Aiseā ua e talanoa atu ai iā te ia?”
28 Ona tuu ai lea e le fafine o lana faguvai, ae alu atu i le aai ma fai atu i tagata:
29 “Ō mai e vāai i le tagata ua ia taʻu maia iā te aʻu mea uma na ou faia. Pe faamata e lē o ia o le Keriso?”
30 Ona latou tuua lea o le aai ma ō mai iā te ia.
31 Ae o le taimi lea, ua faatauanau mai ai le ʻausoo iā te ia e faapea: “Le Aʻoaʻo e,*+ inā taumafa ia.”
32 Ae ua fetalai atu o ia iā i latou: “O loo iā te aʻu meaʻai tou te lē iloa.”
33 Ona talatalanoa lea o le ʻausoo e faapea: “Pe na iai se tasi na avatua iā te ia ni meaʻai?”
34 Ae ua fetalai atu o ia: “O laʻu meaʻai, o le faia lea o le finagalo o lē na auina mai aʻu,+ ma faaiʻu lana galuega.+
35 Pe e tou te lē faapea ane ea ua toe fā masina ona oo lea i le seleselega? Faauta! ou te fai atu iā te outou: Inā tetepa aʻe ia outou ma vāai atu i le faatoʻaga, ua matua mo le seleselega.+ Ua
36 maua e le tagata selesele lona totogi, ma aoaoina fua mo le ola e faavavau, ina ia olioli faatasi ai o lē e lūlū ma lē e selesele.+
37 Ua moni ai le faaupuga: O le tasi e lūlū, a o le isi e selesele.
38 Ua ou aauina atu outou e selesele i mea tou te leʻi galulue ai. Ua galulue isi, ae ua outou maua aogā mai i a latou galuega.”
39 Ua faatuatua iā te ia le toʻatele o tagata Samaria mai i lenā aai, ona o le molimau a le fafine e faapea: “Ua ia taʻu mai iā te aʻu mea uma na ou faia.”+
40 O lea, ina ua ō mai tagata Samaria iā te ia, ona latou talosaga mai lea iā te ia ina ia latou nonofo, ma na nofo ai o ia i inā mo aso e lua.
41 O le iʻuga, e toʻatele isi tagata ua talitonu ona o ana fetalaiga,
42 ma ua latou fai atu i le fafine: “Ua matou talitonu ona e lē gata o au upu, ae ona ua matou faalogo ai lava i matou, ma iloa ai o lenei tagata o ia moni lava o le faaola o le lalolagi.”+
43 Ua mavae aso e lua, ona alu atu ai lea o ia i Kalilaia.
44 Peitaʻi, ua molimau atu Iesu e faapea, e lē mamalu se perofeta i lona lava nuu.+
45 Ua taunuu o ia i Kalilaia, ma ua talileleia o ia e tagata Kalilaia, auā na latou vāai i mea uma na ia faia i le tausamiga i Ierusalema,+ auā na latou iai foʻi i le tausamiga.+
46 Ua toe alu atu o ia i Kana i Kalilaia, lea na ia faaliliuina ai le vai i le uaina.+ Na iai i Kapanaumi se auauna a le tupu, o lē ua maʻi lona atalii.
47 Ina ua faalogo lenei tagata ua tuua e Iesu Iutaia ae maliu mai i Kalilaia, ona sau ai lea ma talosaga mai iā Iesu, ina ia alu ifo e faamālōlō lona atalii, auā ua toeitiiti lava a oti o ia.
48 Peitaʻi, ua fetalai atu Iesu iā te ia: “E lē taitai ona outou talitonu, seʻiloga tou te vāai muamua i faailoga ma mea ofoofogia.”+
49 Ae ua fai mai le auauna a le tupu iā te ia: “Le Alii e, maliu ifo ia a o leʻi oti si oʻu atalii.”
50 Ua fetalai atu Iesu iā te ia: “Inā alu ia, ua ola lou atalii.”+ Ua talitonu le tamāloa i le upu na fetalai atu ai Iesu, ma alu loa.
51 A o alu atu o ia, na faafetaui o ia e ana pologa, ma taʻu mai o loo ola* lona atalii.
52 O lea, ua ia fesili atu ai iā i latou i le itula na toe malosi ai o ia. Ua latou fai ane: “O ananafi i le itula e fitu* na teʻa ai lona fiva.”
53 Ona iloa ai lea e le tamā, o le itula tonu lava lea na fetalai atu ai Iesu iā te ia: “Ua ola lou atalii.”+ Ua talitonu foʻi o ia ma lona aiga uma.
54 O le faailoga lona lua+ lea ua faia e Iesu, ina ua ia tuua Iutaia ae maliu mai i Kalilaia.
Faamatalaga Pito i Lalo
^ Ele., “Iesu.”
^ Po o le “vaipuna.”
^ E faasino atu i le pe ā o le 12 i le aoauli.
^ Po o le “Rapi e.” Tagaʻi i le Uiga o Upu.
^ Po o le “ua toe malosi.”
^ E faasino atu i le pe ā o le 1 i le aoauli.
