Ioelu 2:1-32
2 “Inā ili ia le pū i Siona!+
Ia outou alalaga i le alaga o le taua i loʻu mauga paia.
Ia gatete tagata uma e nonofo i le laueleele,*Auā o loo sau le aso o Ieova!+ Ua lata tele mai!
2 O le aso o le pōuliuli ma le pogisa,+O le aso o le faamalumalu ma le pogisa tele,+E pei foʻi o le malamalama o le vaveao ua sulugia ai luga o mauga.
Ua iai se nuu e toʻatele ma malolosi;+E leʻi iai lava muamua se nuu faapena,Ma o le a lē toe iai lava se nuu faapenaI tausaga o tupulaga uma.
3 O loo i o latou luma le afi e faatamaʻia ai,Ma o loo i o latou tua foʻi le afi e faaumatia ai.+
Ua pei o le faatoʻaga i Etena+ le laueleele i o latou luma,Ae o tua ua iai le toafa,Ma e leai se mea e sao mai ai.
4 Ua foliga mai i latou e pei o ni solofanua,Ma ua taufetuli i latou e pei o ni solofanua o le taua.+
5 O lo latou paʻō e pei o kariota a o latou taufaioso i tumutumu o mauga,+E pei o le gapāpā o le afi mumū ua faatamaʻia ai tagutugutu o laau.
E pei o le nuu malosi ua faapotopoto faatasi e tau.+
6 O le a matuā atuatuvale tagata ona o i latou.
O le a mūmū foʻi foliga uma ona o le popole.
7 E latou te taufetuli e pei o tagata totoa,E latou te feʻaʻei i le aupā e pei o fitafita,E taʻitasi ma agaʻi i lona lava ala,Ma e latou te lē ʻaloese mai foʻi i o latou ala.
8 E lē tautūlei le tasi i le isi;E taʻitasi le tagata ma alu i lona ala.
Pe a paʻuʻū isi ona o auupega,*E agaʻi pea i luma isi i le ala.
9 E latou te ō atu faavavevave i le aai, ma tamomoʻe i le aupā.
E latou te feʻaʻei atu i fale, ma ō atu i faamalama e pei o se gaoi.
10 E gatete le laueleele ma lūlūina le lagi i o latou luma.
E pogisa le lā ma le masina,+Ma e lē toe fepulafi mai le malamalama o fetu.
11 O le a tulei mai foʻi e Ieova lona siʻufofoga i luma o lana ʻautau,+ auā e matuā toʻatele lava lana ʻautau.+
Auā e malosi lē e faataunuuina Lana afioga;Auā o le aso o Ieova e malosi tele ma e matuā mataʻutia.+
O ai sē e mafai ona tatalia?”+
12 O le fetalaiga lenei a Ieova: “Ae o lenei, ia outou toe foʻi mai iā te aʻu ma o outou lotoatoa,+Ma le anapogi,+ o le fetagisi, ma le tagiauē.
13 Ia saeia o outou loto,+ ae e lē o o outou ofu,+Ma ia foʻi mai iā Ieova lo outou Atua,Auā e tigā alofa* ma alofa mutimutivale o ia, e telegese lona toʻasā+ ma e tele lona alofa faamaoni,+Ma o le a suia lona manatu* i le faaooina mai o le malaia.
14 O ai e iloa pe e toe liliu mai o ia, ma suia lona manatu*+Ma avatu iā te outou se faamanuiaga,Ina ia outou avatu ai le taulaga i meaʻai ma le taulaga i meainu mo Ieova lo outou Atua?
15 Inā ili ia le pū i Siona!
Ia talaʻi* se anapogi; ia faasilasila atu se fonotaga paia.+
16 Ia faapotopoto le nuu atoa; ia faapaia le faapotopotoga.+
Ia faapotopoto toeaina; ia faapotopoto tamaiti ma tamameamea e leʻi teʻa ma le susu.+
Ia alu atu le alii faaipoipo mai i lona potu, ma le tamaʻitaʻi faaipoipo mai i lona potumoe.
17 Ia fetagisi ositaulaga, o auauna a IeovaI le vā o le faapaologa ma le fata faitaulaga+ ma faapea atu:
‘Ieova e, seʻi e alofa mai i ou tagata;Aua neʻi e faia lou tofi o se mea e inosia,Ina neʻi pule ai nuu iā i latou.
Aiseā e faapea mai ai tagata, “O fea o iai lo latou Atua?”’+
18 Ona fuā ai lea o Ieova ona o lona nuuMa alofa mutimutivale i ona tagata.+
19 O le a tali mai Ieova i lona nuu:
‘Ou te foaʻi atu iā te outou fatu, o le uaina fou ma le suāuu,Ma e tou te matuā maoona ai;+Ou te lē toe faia outou ma mea e tauemu i ai isi nuu.+
20 Ou te faateʻa mamao mai iā te outou o lē e mai i mātū,Ou te faataapeapeina o ia i se laueleele mātūtū ma ua faagaogaoina,Ou te tuliesea lana ʻautau o i luma i le sami i sasaʻe,*Ma lana ʻautau o i tua i le sami i sisifo.*
O le a alu aʻe le manogi leaga mai iā te ia,Ma e alu aʻe pea foʻi le sauga mai iā te ia;+Auā o le a faia e le Atua mea tetele.’
21 Le fanua e, aua e te fefe.
Ia fiafia ma olioli, auā o le a faia e Ieova mea tetele.
22 O outou manu o le fanua, aua tou te fefefe,Auā e toe ola lauusiusi mutia o le fanua e aai ai lafumanu,+E fua mai foʻi laau;+O le a matuā fua mai lava le mati atoa ma le vine.+
23 O outou le fanau a Siona, ia outou fiafia ma olioli iā Ieova lo outou Atua;+Auā o le a ia avatu iā te outou le timu talafeagai i le tau e afu ai mea,O le a ia faatotō ifo foʻi iā te outou timuga,O le timu i le tau e afu ai mea ma le timu i le tau e totogo ai mea, e pei ona sa iai muamua.+
24 O le a tumu mea e soli ai saito i fatu ua faamamāina,Ma o le a taumasuasua mea e tali ai suāvine i le uaina fou ma le suāuu.+
25 O le a ou avatu iā te outou le taui mo tausagaNa ʻai ai a outou fuata e sē akerise matutua, o sē akerise e leʻi oso apaʻau, o sē akerise e faatamaʻia mea, ma sē akerise e ʻaina mea,O laʻu ʻautau tele na ou auina atu iā te outou.+
26 O le a outou aai lava ma maoona ai,+Ma o le a outou vivii i le suafa o Ieova lo outou Atua,+O lē na faia mea ofoofogia mo outou;O le a lē toe māsiasi ai lava loʻu nuu.+
27 O le a outou iloa ai ou te faatasi ma Isaraelu,+Ma o aʻu o Ieova lo outou Atua,+ e leai lava se isi!
O le a lē toe māsiasi ai lava loʻu nuu.
28 Mulimuli ane ou te liligi ifo loʻu agaga+ i luga o ituaiga uma o tagata,Ona fai lea e o outou atalii ma o outou afafine o valoaga,E fai miti a o outou toeaina,+E iloa foʻi e o outou tauleleʻa faaaliga.
29 E oo lava foʻi i aʻu tane pologa ma fafine pologa,Ou te liligi ifo ai loʻu agaga i na aso.
30 Ou te faia foʻi mea ofoofogia* i le lagi ma le lalolagi,O le toto ma le afi, ma le asu faaniutū.+
31 O le a liua le lā i le pōuliuli, e liua foʻi le masina i le toto,+A o leʻi oo mai le aso tele ma le mataʻutia o Ieova.+
32 E faaolaina foʻi i latou uma o ē e valaau i le suafa o Ieova;+Auā o le a iai i le mauga o Siona ma Ierusalema o ē e sao mai,+ e pei ona fetalai mai ai Ieova,O ē e totoe ua valaauina e Ieova.”
Faamatalaga Pito i Lalo
^ Po o le “lalolagi.”
^ Po o “aū.”
^ Po o le “alofa fua.”
^ Po o le “faanoanoa o ia.”
^ Po o le “faanoanoa.”
^ Epe., “faapaia.”
^ E faasino atu i le Sami Mate.
^ E faasino atu i le Metitirani.
^ Po o “vavega.”
