Iopu 4:1-21
4 Ona tali mai lea o Elifasa+ le Timanu e faapea:
2 “Pe a fai atu e se tasi se upu iā te oe, pe e te lē onosaʻi ea?
Auā o ai sē na te mafaia ona taofi o ana upu?
3 E moni, e toʻatele o ē na e aʻoaʻia,Sa masani ona e faamalosia ai lima ua vaivai.
4 O au upu na toe faatulaʻi ai lē ua tautevateva,Ma faamalosia ai foʻi o ē ua vaivai o latou tulivae.
5 A o lenei ua oo mai iā te oe, ma ua lofitūina ai oe;*Ua papaʻi atu foʻi iā te oe, ma ua e atuatuvale ai.
6 Po ua e mautinoa ea ona o lou migao i le Atua?
Po ua e faamoemoe ea ona o ou ala faamaoni?+
7 Ia manatua faamolemole: Po ua fano ea lē ua amio mamā?
Po ua faaumatia ea lē ua amio saʻo?
8 O mea na ou vaaia, o i latou ua suatia* mea e tigā aiMa i latou e lūlūina mea leaga, e latou te selesele mai ai lava.
9 E fano i latou i le mānava a le Atua,E oti foʻi i latou pe a sasao aʻe lona toʻasā.
10 E tagi le leona, ma e lagona foʻi le leo o le tamaʻi leona,Ae e gauia lava nifo o leona taanoa.
11 Ua fano le leona auā ua lē maua sana meaʻai,Ma ua faataapeapeina foʻi le toloaʻi a le leona.
12 Ua oo mai faalilolilo iā te aʻu se tala,Ua lagona e oʻu taliga le fāfā tala.
13 I popolega ona o mea na vaaia i le pō,Ina ua momoegase tagata,
14 Na oo mai iā te aʻu le matuā gatete,Ma na tetemū ai oʻu ivi uma.
15 Na ui ane i oʻu luma se agaga;Na mogea ai loʻu tino.
16 Na tū o ia,Ae ou te leʻi iloa ona foliga mai.
Sa ataata mai se mea i oʻu luma;Ona toʻafilemu ai lea, ma ou faalogo ai i se leo e faapea:
17 ‘Pe e sili ea le amiotonu o le tagata i lo o le Atua?
Pe e sili atu ea foʻi le mamā o le tagata i lo o Lē na faia o ia?’
18 Faauta! E na te lē faatuatuaina ana auauna,Ma e na te tuuaʻia ana agelu* i mea sesē.
19 E sili atu ai ona faia faapea i ē ua nonofo i fale omea,O iai lo latou faavae i le eleele,+E vave ona tuʻimomomoina i latou e pei o se lelefua!*
20 E matuā tuʻimomomoina i latou mai i le taeao e oo i le afiafipō;E fano foʻi i latou e faavavau, ma e lē toe manatuaina e se tasi.
21 Pe e lē pei ea i latou o se faleʻie ua motusia manoa?
E feoti i latou ona o le leai o se atamai.
Faamatalaga Pito i Lalo
^ Epe., “ua e vaivai ai.”
^ Po o le “fafauina.”
^ Po o “avefeʻau.”
^ O “lelefua” e maua i Isaraelu. O se iniseti e fā ona apaʻau e tai pei o se pepe, ma a o leʻi oo ina maua ona apaʻau, e na te ʻatiʻatia lavalava o tagata.
