Iopu 40:1-24
40 Ua faaauau ona tali mai Ieova iā Iopu:
2 “Pe e tatau i lē vaavaai masei ona finau i Lē e ona le malosi uma lava?+
Ia tali mai o lē e mana‘o e aʻoaʻia le Atua.”+
3 Ona tali atu lea o Iopu iā Ieova:
4 “Faauta! Ua faatauvaa lava aʻu.+
O le ā ea se mea ou te tali atu ai iā te oe?
Ou te tuu aʻe loʻu lima i loʻu gutu.+
5 Ua faatasi ona ou tautala atu, ma ou te lē toe tali atu;Ua faalua foʻi, ma ou te lē faaopoopo i ai se upu.”
6 Ona tali mai lea o Ieova iā Iopu mai i le matagi malosi e faapea:+
7 “Ia e sauni* faamolemole, e pei o se tagata malosi;Seʻi oʻu fesili atu iā te oe, ona e faailoa mai lea iā te aʻu.+
8 Pe e te fesiligia* ea laʻu faamasinogatonu?
Pe e te taʻusalaina ea foʻi aʻu ina ia taʻutonuina ai oe?+
9 Pe e iai sou lima e malosi e pei o le lima o le Atua moni,+Ma sou leo e pei o lona leo e taalili e pei o le faititili?+
10 Faamolemole, inā teuteu ia oe i le malosi ma le malualii;Ia e ofu i le mamalu ma le matagofie.
11 Inā sasaa atu ia le tele o lou ita;Ia e vaai atu i ē uma e faamaualuluga, ma ia faamaulaloina o ia.
12 Ia e vaai atu i ē uma e faamaualuluga, ma ia faamaulaloina o ia,Ma ia solia o ē e amioleaga i mea o loo latou tutū ai.
13 Ia natia i latou uma i le efuefu;Ia fusifusia i latou* i le mea lilo,
14 O aʻu lava ou te ta‘utino* atu iā te oe,E mafai e lou lima taumatau ona faaolaina oe.
15 O lea, o le Pemota* lenei na ou faia, faapea foʻi ma oe.
E ʻai o ia i le mutia e pei o le povi poʻa.
16 Vaai i le malosi o loo i ona suilapalapaMa le malosi o loo i maso o lona manava!
17 E faamalō e ia lona siʻusiʻu e pei o le arasi;E felavasaʻi foʻi uaua o ona ogāvae.
18 O ona ponaivi, o faagaʻau ʻapamemea ia;O ona vae e pei o tootoo uʻamea.
19 O le amataga lea o lea ituaiga i galuega a le Atua;E na o Lē na faia o ia e mafai ona tuu atu i ai lana pelu.
20 Auā e fua mai e mauga mea‘ai mo ia,E taaalo ai foʻi i inā manufeʻai uma o le fanua.
21 E taoto o ia i lalo o laau tuitui,I nofoaga i lalo o ū i le taufusi.
22 E malu o ia i le paolo o laau tuitui,E siʻomia foʻi e laau o garava o le vanu.*
23 Afai e tafe malosi le vaitafe, e lē popole o ia.
E mautinoa lava o ia, e ui ina pā mai le vai o Ioritana+ iā te ia.
24 Pe e iai se tasi e na te mafai ona puʻe o ia a o vaai mai,Pe tui lona isu i se mātau?*
Faamatalaga Pito i Lalo
^ Epe., “Inā fusi ia o lou sulugātiti.”
^ Po o le “faalēaogāina.”
^ Epe., “o latou foliga.”
^ Po o le “faamālō.”
^ Atonu o le puaa sami.
^ Po o le “ālia.”
^ Epe., “mailei.”
