Iopu 42:1-17
42 Ona tali atu lea o Iopu iā Ieova e faapea:
2 “Ua ou iloa nei e mafai ona e faia mea uma lava,E lē mafai foʻi ona vaoia se mea e te finagalo i ai.+
3 Na e fetalai, ‘O ai lenei ua ia faafenumiaʻia la‘u fautuaga e aunoa ma le poto?’+
O lea, sa ou tautala ae ou te leʻi malamalamaE uiga i mea ofoofogia tele, ua ou lē iloa ai.+
4 Na e fetalai, ‘Faamolemole, ia faafofoga mai seʻi oʻu tautala atu.
Se‘i o‘u fesili atu iā te oe, ona e faailoa mai lea iā te aʻu.’+
5 Ua faalogo oʻu taliga e uiga iā te oe,A o lenei ua vaai atu oʻu mata iā te oe.
6 O le mea lea ou te toe faafoʻi mai ai aʻu upu,+Ma ua ou salamō i le efuefu ma le lefulefu.”+
7 Ina ua uma ona fetalai mai Ieova iā Iopu i nei upu, ona fetalai ane lea o Ieova iā Elifasa le Timanu:
“Ua ou matuā ita lava iā te oe ma au aumea e toʻalua,+ auā ua outou lē tautatala ma le faamaoni e uiga iā te aʻu,+ e pei o laʻu auauna o Iopu.
8 O lenei, ia outou ave ni povi poʻa se fitu ma ni mamoe poʻa se fitu, ma ō atu i laʻu auauna o Iopu, ma ia outou fai ai se taulaga mū mo outou. Ona tatalo lea o laʻu auauna o Iopu mo outou.+ Ou te taliaina lava lana talosaga* ina ia aua neʻi faalumaina outou ona o lo outou vālea, auā ua outou lē tautatala ma le faamaoni e uiga iā te aʻu, e pei o laʻu auauna o Iopu.”
9 Ona ō ane lea o Elifasa le Timanu, o Pilitati le Sua, ma Sofara le Naama, ma faia e pei ona fetalai mai ai o Ieova iā i latou. Ua talia foʻi e Ieova le tatalo a Iopu.
10 Ina ua uma ona tatalo Iopu mo ana aumea,+ ona faaiʻu lea e Ieova o puapuaga o Iopu+ ma toe faafo‘isia lona tamaoaiga.* Ua faaluaina e Ieova ana mea sa iai muamua.+
11 Ua ō mai iā te ia ona uso ma ona tuafāfine uma, ma i latou uma na iloa muamua o ia,+ ua latou aai faatasi ma ia i lona fale. Ua latou tigā alofa iā te ia, ma faamāfanafana iā te ia ona o puapuaga uma na faataga e Ieova e oo iā te ia. Ua taʻitasi i latou ma aumai iā te ia le tupe e tasi ma se mama auro.
12 Ua faamanuia e Ieova le vaega faai‘u o le olaga o Iopu e sili atu nai lo o le amataga,+ ma ua maua e Iopu o mamoe e 14,000, o kamela e 6,000, o povi e 2,000,* ma asini fafine e 1,000.+
13 Na fanaua foʻi e ia o isi atalii e toʻafitu ma isi afafine e toʻatolu.+
14 Ua ia faaigoa le teine matua iā Iemaima, o le lona lua o Kesia, ma o le lona tolu o Kerena-puka.
15 E leai foʻi ni fafine sa i le nuu atoa e lalelei e pei o afafine o Iopu, ma na avatu e lo latou tamā iā i latou se tofi faatasi ma o latou tuagane.
16 Ina ua mavae lenei mea, na soifua Iopu mo tausaga e 140, ma na vaai foʻi o ia i lana fanau ma le fanau a lana fanau, e fā tupulaga.
17 Ona iʻu ai lea ina maliu o Iopu, ua toeaina lava ma faamalieina o ia i le olaga.*
Faamatalaga Pito i Lalo
^ Epe., “Ou te faaeaina lava ona foliga.”
^ Epe., “ona toe faafoʻisia lea e Ieova o Iopu mai i le aveina faapagota.”
^ Epe., “o povi taʻilua e 1,000.”
^ Epe., “ua matua ma tele ona aso.”
