Iosua 10:1-43
10 Ina ua faalogo Atoni-sateko le tupu o Ierusalema ua faatoʻilaloina ma faaumatia Ai e Iosua, ma ua ia faia iā Ai ma lona tupu+ e pei ona ia faia iā Ieriko ma lona tupu,+ ma ua faia fo‘i e tagata Kipeona se leleiga ma tagata Isaraelu+ ma ua faatasi pea ma i latou,
2 ona ia matuā fefe ai lea,+ auā o Kipeona o se aai telē, e pei o se aai e pulea e se tupu. E sili atu lona telē i lo o Ai,+ e malolosi uma foʻi ona tagata.
3 Ona auina atu lea e Atoni-sateko le tupu o Ierusalema o le feʻau lenei iā Oama le tupu o Heperona,+ o Pirama le tupu o Iaremuta, o Iafia le tupu o Lakisa, ma Tiperi le tupu o Ekelona,+ e faapea:
4 “Inā ō mai ia ma fesoasoani mai iā te aʻu, seʻi o tatou osofaʻia Kipeona auā ua latou faia se leleiga ma Iosua ma tagata Isaraelu.”+
5 Ona faapotopoto faatasi ai lea o tupu nei e to‘alima o Amorī:+ o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona, o i latou ma a latou ʻautau uma, ua ō atu ma tolauapi ina ia siitaua atu iā Kipeona.
6 Ona auina atu lea e tagata Kipeona o se feʻau iā Iosua i le togālauapi i Kilikala+ e faapea: “Aua e te tuulafoaʻiina au pologa.+ Inā sau faavave ia e laveaʻi i matou ma fesoasoani mai, auā ua faapotopoto tupu uma o tagata Amorī mai i vaega maugā, ina ia siitaua mai iā i matou.”
7 Ona alu aʻe lea o Iosua mai i Kilikala, o ia ma le ‘autau uma o tagata totoa malolosi.+
8 Ona fetalai mai lea o Ieova iā Iosua: “Aua e te fefe iā i latou,+ auā ua ou tuuina atu i latou i ou lima.+ E leai foʻi se tasi e tū mai e tetee iā te oe.”+
9 Ona faafuaseʻi lea ona osofa‘ia i latou e Iosua, ina ua mavae le pō atoa o alu aʻe o ia mai i Kilikala.
10 Ua faafenumiaʻi i latou e Ieova i luma o Isaraelu,+ ona matuā fasiotia lea o i latou e Isaraelu i Kipeona, ma tuliloa pea iā i latou i le ala e alu aʻe i Pete-orana, ma fasiotia i latou e oo atu i Aseka ma Maketa.
11 A o sosola i latou i luma o Isaraelu ma ō ifo mai i le ala o Pete-orana, ona faatotō ifo lea e Ieova i o latou luga o uato‘a tetele mai i le lagi e oo atu lava i Aseka, ma ua feoti ai i latou. O le mea moni, e sili atu ona toʻatele tagata na feoti i uatoʻa, nai lo o ē na fasiotia e tagata Isaraelu i le pelu.
12 O le taimi tonu lea, i le aso na faato‘ilaloina ai e Ieova tagata Amorī i luma o tagata Isaraelu, na fai atu ai Iosua iā Ieova i luma o Isaraelu:
“Le lā e, inā tumau ia+ i luga o Kipeona,+Le masina e, inā tumau ia i luga o le vanu* o Ailona.”
13 Ona tumau ai lea o le lā ma le masina seʻia oo ina faatoʻilalo e le nuu ona fili. Pe e lē o tusia ea ia mea i le tusi a Iasera?+ Na tumau le lā i le ogatotonu o le lagi e tusa ma le aso atoa, e leʻi vave goto.
14 E leai se aso na muamua pe na mulimuli na pei o lenā aso, na faafofoga ai Ieova i le leo o se tagata,+ auā na tau Ieova mo Isaraelu.+
15 Ua mavae lea mea, ona toe foʻi lea o Iosua ma Isaraelu uma na faatasi ma ia i le togālauapi i Kilikala.+
16 Ae ua sosola tupu e to‘alima ma lalafi i le ana i Maketa.+
17 Ona oo mai lea o le tala iā Iosua e faapea: “O loo lalafi tupu e to‘alima i le ana i Maketa.”+
18 Ona faapea atu lea o Iosua: “Inā fuli atu ia ni maa tetele i le gutu o le ana, ma tofia ni tamāloloa e leoleoina i latou.
19 A o outou, aua tou te nofoa‘i. Ia tuliloa i o outou fili ma ia fasiotia i latou.+ Aua neʻi tuua i latou e ō atu i o latou aai, auā ua tuuina mai i latou e Ieova lo outou Atua i o outou lima.”
20 Ina ua uma ona matuā fasiotia i latou e Iosua ma tagata Isaraelu, seʻia oo ina tafiesea i latou vaganā ai nisi na sao ma sosola ma ulu atu i aai malolosi,
21 ona toe foʻi atu lea o tagata uma ma le saogalemu i le togālauapi iā Iosua i Maketa. E leai se tasi na mafai ona fai atu se upu leaga i tagata Isaraelu.
22 Ona faapea atu lea o Iosua: “Ia outou tatala le gutu o le ana ma aumai i fafo iā te aʻu tupu e to‘alima.”
23 Ona latou aumaia lea iā te ia mai i le ana o nei tupu e to‘alima: o le tupu o Ierusalema, o le tupu o Heperona, o le tupu o Iaremuta, o le tupu o Lakisa, ma le tupu o Ekelona.+
24 Ina ua latou aumaia i fafo nei tupu iā Iosua, ona valaau lea o Iosua i tamāloloa o Isaraelu ma fai atu i taʻitaʻiʻau o tagata o le taua na ō ma ia: “Inā ō mai ia i luma. Ia tutū o outou vae i tuāua o nei tupu.” Ona latou ō mai ai lea i luma ma tutū o latou vae i tuāua o tupu.+
25 Ona fai atu lea o Iosua iā i latou: “Aua le fefefe pe matataʻu.+ Ia lototetele ma faamalolosi, auā e faapenei ona faia e Ieova i o outou fili uma, o ē o loo siitaua mai iā te outou.”+
26 Ona fasiotia lea o i latou e Iosua ma faatautau i luga o laau e lima, ma na tautau ai pea i laau seʻia oo i le afiafi.
27 Ina ua goto le lā, ona poloaʻi atu lea o Iosua e ave ifo i latou mai i luga o laau,+ ma lafo i le ana lea na latou lalafi ai. Ona tuu lea o maa tetele i le gutu o le ana, ma o loo iai pea e oo mai i aso nei.
28 Ua faatoʻilaloina e Iosua Maketa+ i lenā lava aso ma fasiotia i le pelu. Ua ia faaumatia lona tupu ma i latou uma na iai, ma e leai se tasi na sao mai ai.+ Na ia faia i le tupu o Maketa,+ e pei lava ona ia faia i le tupu o Ieriko.
29 Ona ō atu lea o Iosua ma Isaraelu uma mai i Maketa i Lipena, ma siitaua atu i Lipena.+
30 Na tuuina atu foʻi e Ieova le aai ma lona tupu+ i lima o Isaraelu, ma na latou fasiotia i latou uma na iai i le pelu. E leai se tasi na sao mai ai. Na latou faia i lona tupu, e pei lava ona latou faia i le tupu o Ieriko.+
31 Ona ō atu foʻi lea o Iosua ma Isaraelu uma mai i Lipena i Lakisa+ ma tolauapi ai, ma siitaua atu foʻi i ai.
32 Na tuuina atu e Ieova Lakisa i lima o Isaraelu, ona latou faatoʻilalo ai lea o le aai i le aso lona lua, ma fasiotia i latou uma na iai i le pelu,+ e pei lava ona latou faia i Lipena.
33 Ona alu aʻe ai lea o Orama le tupu o Kasera+ e fesoasoani i le aai o Lakisa, ae ua fasiotia ai o ia ma ona tagata e Iosua, seʻia leai se tasi na sao mai ai.
34 Ua ō atu Iosua ma Isaraelu uma mai i Lakisa i Ekelona+ ma tolauapi ai, ma siitaua atu foʻi i ai.
35 Ua latou faatoʻilaloina le aai i lenā aso ma faaumatia ona tagata i le pelu. Na fasiotia i latou uma sa iai i lenā aso, e pei lava ona latou faia i Lakisa.+
36 Ona ō aʻe lea o Iosua ma Isaraelu uma mai i Ekelona i Heperona,+ ma siitaua atu i ai.
37 Ua latou faatoʻilaloina le aai ma fasiotia i le pelu lona tupu, ma i latou uma na iai i ona nuu, e leʻi faasaoina foʻi se tasi, e pei lava ona faia e Iosua i Ekelona.
38 Mulimuli ane, ua ō atu Iosua ma Isaraelu uma i Tiperi,+ ma siitaua atu i ai.
39 Ua ia faatoʻilaloina le aai ma ona nuu uma, ma fasiotia i le pelu lona tupu ma i latou uma sa iai,+ e leʻi faasaoina foʻi se tasi.+ Na ia faia iā Tiperi ma lona tupu, e pei lava ona ia faia i Heperona faapea Lipena ma lona tupu.
40 Ua faato‘ilaloina foʻi e Iosua le laufanua atoa e aofia ai vaega maugā, o Nekepi,* o Sefila,*+ o malifa, ma o latou tupu uma. E na te leʻi faasaoina foʻi se tasi, ae na ia faaumatia mea uma e mānava,+ e pei lava ona poloaʻi mai ai Ieova le Atua o Isaraelu.+
41 Ua faato‘ilaloina foʻi e Iosua o i latou mai i Katesa-panea+ e oo atu i Kasa,+ ma le laufanua uma o Kosena+ e oo atu i Kipeona.+
42 Ua pu‘ea foʻi e Iosua o nei tupu uma ma o latou nuu i le taimi e tasi, auā sa tau Ieova le Atua o Isaraelu mo Isaraelu.+
43 Ona toe foʻi atu lea o Iosua ma Isaraelu uma i le togālauapi i Kilikala.+
Faamatalaga Pito i Lalo
^ Po o “le fanua laugatasi.”
^ Po o “le itu i saute.”
^ Po o “le fanua maulalo.”
