Iosua 11:1-23
11 Ina ua faalogo Iapino le tupu o Hasora i lenei mea, ona auina atu lea o lana feʻau iā Iopapa le tupu o Matona,+ faapea le tupu o Semarona, le tupu o Akasafa,+
2 o tupu sa i le itu i mātū o vaega maugā, o ē sa i fanua laugatasi* i le itu i saute o Kinereta, o ē sa i Sefila* ma vaega malifa o Toro+ i le itu i sisifo,
3 o tagata Kanana+ i le itu i sasaʻe ma sisifo, o tagata Amorī,+ o tagata Hetī, o tagata Perisē, o tagata Iepusē i vaega maugā, ma tagata Hivī+ i le nuu o Mesepa i le auvae mauga o Heremoni.+
4 Ona latou ō mai lea ma a latou ʻautau uma, o tagata e matuā toʻatele lava e pei o le oneone o le matafaga, ma solofanua e matuā tele lava ma kariota o le taua.
5 Ona faapotopoto lea o nei tupu uma e pei ona fuafuaina, ua ō mai ma tolauapi faatasi i le vai o Meroma, e siitaua iā Isaraelu.
6 Ona fetalai mai lea o Ieova iā Iosua: “Aua e te fefe ona o i latou,+ auā o taeao i le taimi faapenei, ou te tuu atu ai i latou uma o ni ē ua fasiotia iā Isaraelu. Ia e faapipili vae o a latou solofanua,+ ma e susunu a latou kariota i le afi.”
7 Ona osofaʻia faafuaseʻi lea o i latou e Iosua ma tagata totoa uma i le vai o Meroma.
8 Ua tuuina atu e Ieova i latou i lima o Isaraelu,+ ua latou fasia ma tuliloa iā i latou e oo i le aai tele o Saitonu+ ma Meserefo-maima,+ ma le vanu o Mesepa i le itu i sasaʻe; ua fasiotia i latou seʻia oo ina leai se tasi na totoe.+
9 Ona faia lea e Iosua iā i latou e pei ona fetalai mai ai Ieova iā te ia: ua ia faapipili vae o a latou solofanua, ma susunu a latou kariota i le afi.+
10 E lē gata i lea, ua toe foʻi Iosua ma faatoʻilaloina Hasora ma fasiotia lona tupu i le pelu,+ auā o Hasora na avea muamua ma faauluuluga o nei malo uma.
11 Ua latou ō atu ma fasiotia tagata uma na iai i le pelu, ua faaumatia i latou+ ma e leai se mea e iai le ola na totoe.+ Ona ia susunuina lea o Hasora i le afi.
12 Ua faatoʻilaloina e Iosua o aai uma o nei tupu ma fasiotia o latou tupu i le pelu.+ Ua ia faaumatia i latou,+ e pei ona poloaʻi mai ai Mose le auauna a Ieova.
13 Peitaʻi, e leʻi susunuina e Isaraelu aai na tutū i luga o mea maupuʻepuʻe; e na o Hasora lava na susunu e Iosua.
14 Ua ave foʻi e tagata Isaraelu mo i latou o le vete uma mai i nei aai ma lafumanu.+ E na o tagata na latou fasiotia i le pelu seʻia tafiesea uma i latou.+ E leai se tasi na latou faatotoeina.+
15 E pei ona poloaʻi mai o Ieova i lana auauna o Mose, ua faapea fo‘i ona poloaʻi mai ai Mose iā Iosua,+ ma na faia faapea e Iosua. E leai se mea e na te leʻi faia o mea uma na poloaʻi mai ai Ieova iā Mose.+
16 Ua faato‘ilalo e Iosua lenei laueleele uma, o le vaega maugā, o Nekepi,*+ o le laueleele uma o Kosena, o Sefila,+ o Arapa,*+ ma le vaega maugā o Isaraelu ma ona fanua maulalalo,
17 e mai i le mauga o Kalaka e alu aʻe i Seira, ma oo atu i Paala-kato+ i le vanu o Lepanona i le auvae mauga o Heremoni,+ ua ia puʻea o latou tupu uma ma fasiotia i latou.
18 E tele aso na tau ai Iosua ma nei tupu uma.
19 E leai se aai na faia se leleiga ma tagata Isaraelu, e na o tagata Hivī o loo nonofo i Kipeona.+ A o isi aai uma na latou faatoʻilaloina i le taua.+
20 Auā na tuu e Ieova o latou loto e faamaaa+ e ō mai ai e siitaua iā Isaraelu, ina ia faaumatia ai e ia i latou e aunoa ma le alofagia.+ Na tatau ona tafiesea i latou, e pei ona poloaʻi mai ai Ieova iā Mose.+
21 I lenā taimi, na faaumatia ai e Iosua tagata Anakima+ mai i vaega maugā, mai i Heperona, mai i Tiperi, mai i Anapa, mai i vaega maugā uma o Iuta, ma vaega maugā uma o Isaraelu. Na faaumatia e Iosua i latou ma o latou aai.+
22 E leai se tagata Anakima na totoe i le laueleele o tagata Isaraelu, ua na o Kasa,+ Kata,+ ma Asetota+ na totoe ai.+
23 Ua maua e Iosua le laueleele uma e pei lava ona folafola atu e Ieova iā Mose,+ ona avatu ai lea e Iosua iā Isaraelu e fai ma o latou tofi, e tusa ma mea ua tuuina atu iā i latou ina ia vaevaeina i o latou ituaiga.+ Ua lē toe iai foʻi ni taua i le laueleele.+
Faamatalaga Pito i Lalo
^ Po o “i Arapa.”
^ Po o “le fanua maulalo.”
^ Po o “le itu i saute.”
^ Po o “le fanua laugatasi o le toafa.”
