Iosua 14:1-15
14 O laueleele nei na ave e tagata Isaraelu e fai ma o latou tofi i le nuu o Kanana, ia na avatu e Eleasaro le ositaulaga, o Iosua le atalii o Nuno, ma ulu o aiga o le fanauga a Isaraelu e fai ma o latou tofi.+
2 Ua maua o latou tofi e ala i le faia o le vili,*+ e pei ona poloaʻi mai ai Ieova e ala iā Mose mo ituaiga e iva, ma le ʻafa o le ituaiga o Manase.+
3 Na avatu e Mose i le isi itu* o Ioritana+ le tofi o isi ituaiga e lua, ma le isi ʻafa o le ituaiga o Manase; e na te leʻi tuuina atu foʻi se tofi i le fanauga a Levi faatasi ma i latou.+
4 O le fanauga a Iosefa e lua ona ituaiga,+ o Manase ma Efaraima;+ e leʻi tuuina atu se vaega o le laueleele i le ituaiga o Levi, e na o aai+ e nonofo ai ma fanua mo a latou lafumanu, ma a latou meatotino.+
5 Ona vaevaeina lea e tagata Isaraelu le laueleele, e pei ona poloaʻi mai ai Ieova iā Mose.
6 Ona ō mai lea o tane o Iuta iā Iosua i Kilikala,+ ma ua faapea mai Kalepo+ le atalii o Iefune le tagata Kinasa iā te ia: “Ua e iloa lelei le fetalaiga a Ieova+ iā Mose le tagata o le Atua moni,+ e faatatau iā te oe ma aʻu i Katesa-panea.+
7 E 40 oʻu tausaga ina ua auina atu aʻu e Mose le auauna a Ieova mai i Katesa-panea e mataʻi faalilolilo le nuu,+ ma na ou toe foʻi mai ma se tala moni.*+
8 E ui na faavaivaia e oʻu uso na matou ō faatasi loto o tagata, ae na ou mulimuli ma le lotoatoa iā Ieova loʻu Atua.+
9 Na tautō Mose i lenā aso e faapea: ‘O le laueleele na soli e ou vae, o le a tumau ona fai ma ou tofi ma lau fanau, auā ua e mulimuli ma le lotoatoa iā Ieova loʻu Atua.’+
10 A o lenei ua faaolaina mai aʻu+ e Ieova e pei ona ia folafola mai,+ ua 45 nei tausaga talu ona faia e Ieova lenei folafolaga iā Mose a o feoaʻi Isaraelu i le toafa,+ ma o lenei ua 85 oʻu tausaga.
11 O loo tumau pea loʻu malosi e pei lava o le aso na auina atu ai aʻu e Mose. E pei o loʻu malosi i lenā taimi, ua faapea foʻi loʻu malosi i le taimi nei e tau ai, ma faia isi mea.
12 Inā aumai ia iā te aʻu o lenei vaega maugā lea na folafola mai e Ieova i lenā aso. E ui na e faalogo i lenā aso o loo iai tagata Anakima+ i inā i o latou aai tetele e malupuipuia,+ ae e mautinoa e faatasi Ieova ma aʻu,+ ma ou te tuliesea foʻi i latou, e pei ona folafola mai e Ieova.”+
13 Ona faamanuia atu lea o Iosua iā te ia, ma tuuina atu Heperona iā Kalepo le atalii o Iefune e fai ma ona tofi.+
14 O le mea lenā ua avea ai Heperona ma tofi o Kalepo le atalii o Iefune le tagata Kinasa, e oo mai i aso nei, auā na ia mulimuli ma le lotoatoa iā Ieova le Atua o Isaraelu.+
15 O le igoa muamua o Heperona o Kiriata-arapa+ (o Arapa o le tagata sili i tagata Anakima). Ua lē toe iai ni taua i le laueleele.+
Faamatalaga Pito i Lalo
^ Tagaʻi i le Uiga o Upu.
^ E faasino atu i le itu i sasaʻe.
^ Epe., “se tala e tusa ma mea na i loʻu loto.”
