Iosua 22:1-34
22 Ona aami lea e Iosua o le ituaiga o Reupena, o le ituaiga o Kato, ma le ʻafa o le ituaiga o Manase
2 ua faapea atu iā i latou: “Ua outou tausia mea uma na poloaʻi atu ai Mose le auauna a Ieova iā te outou,+ ma ua outou usiusitaʻi foʻi i mea uma na ou poloaʻi atu ai iā te outou.+
3 E tou te leʻi tuulafoaʻia o outou uso i nei aso e tele e oo mai i le aso nei,+ ma ua outou tausia poloaʻiga a Ieova lo outou Atua.+
4 O lea, ua avatu e Ieova lo outou Atua le mapusaga i o outou uso, e pei lava ona ia folafola atu iā i latou.+ O lenei, inā toe foʻi atu ia i o outou faleʻie i le laueleele ua fai ma o outou tofi, lea na avatu e Mose le auauna a Ieova iā te outou i le isi itu* o Ioritana.+
5 Tau ina ia outou matuā faaeteete e tausia le poloaʻiga ma le Tulafono na tuuina atu e Mose le auauna a Ieova iā te outou,+ tou te alolofa iā Ieova lo outou Atua,+ savavali i ona ala uma,+ tausia ana poloaʻiga,+ pipii iā te ia,+ ma auauna iā te ia+ ma o outou lotoatoa ma o outou ola atoa.”+
6 Ona faamanuia lea o i latou e Iosua ma aauina ese atu, ma ua latou ō i o latou faleʻie.
7 Na foaʻi atu e Mose i le ʻafa o le ituaiga o Manase se tofi i Vasana,+ a o le isi ʻafa na foaʻi i ai e Iosua se tofi i le itu i sisifo o Ioritana+ faatasi ma o latou uso. Ona faamanuia foʻi lea o i latou e Iosua, ma aauina atu i latou e ō i o latou faleʻie.
8 Ua ia faapea atu iā i latou: “Inā toe foʻi ia i o outou faleʻie, ma le tele o ʻoa, o lafumanu e tele, faatasi ai ma siliva, o auro, o ʻapamemea, o uʻamea, ma ofu e matuā tele lava.+ Inā ave ia o mea o le vete+ mai i o outou fili ma tufatufa atu i o outou uso.”
9 Ua mavae lenā, ona ō ese atu lea o le fanauga a Reupena, o le fanauga a Kato, ma le ʻafa o le ituaiga o Manase, mai i le isi fanauga a Isaraelu mai i Sailo i le nuu o Kanana, e ō atu i le laueleele o Kiliata,+ i le nuu o lo latou tofi lea na latou nonofo ai e tusa ai o le faatonuga a Ieova e ala mai iā Mose.+
10 Ina ua latou latalata i Ioritana i le nuu o Kanana, ona fausia lea i inā e le fanauga a Reupena, ma le fanauga a Kato, ma le ʻafa o le ituaiga o Manase, o se fata faitaulaga e lata i le vaitafe o Ioritana, o se fata faitaulaga telē e iloagofie.
11 Mulimuli ane, ua faalogo isi o le fanauga a Isaraelu i lenei mea+ ona latou faapea ane lea: “Faauta! Ua fausia e le fanauga a Reupena, o le fanauga a Kato, ma le ʻafa o le ituaiga o Manase se fata faitaulaga i le tuaoi o le nuu o Kanana e latalata i Ioritana, i la tatou itu.”
12 Ina ua faalogo i ai le faapotopotoga atoa o le fanauga a Isaraelu, ona latou faapotopoto ai lea i Sailo+ ina ia ō atu e siitaua iā i latou.
13 Ona auina atu lea e le fanauga a Isaraelu o Fineaso+ le atalii o Eleasaro le ositaulaga i le fanauga a Reupena, ma le fanauga a Kato, ma le ʻafa o le ituaiga o Manase i le laueleele o Kiliata,
14 ma ua faatasi ma ia taʻitaʻi e toʻasefulu, e taʻitoʻatasi mai i ituaiga uma o Isaraelu, ma o i latou o ulu o aiga o o latou tamā mai i le faitau afe o Isaraelu.+
15 Ua oo atu i latou i le fanauga a Reupena, ma le fanauga a Kato, ma le ʻafa o le ituaiga o Manase i le nuu o Kiliata, ma faapea atu iā i latou:
16 “O le mea lenei ua fai mai ai le faapotopotoga uma a Ieova, ‘Aiseā ua outou lē faamaoni+ ai i le Atua o Isaraelu? Ua outou liliuese i le aso nei mai i le mulimuli atu iā Ieova, e ala i lo outou fausia o se fata faitaulaga ma fouvale ai iā Ieova.+
17 Pe e lē lava ea le mea sesē na faia i Peoro? E leʻi faamamāina lava i tatou e oo mai i le aso nei, e ui na oo le mala i le faapotopotoga a Ieova.+
18 Po ua outou mananaʻo ea e liliuese mai i le mulimuli atu iā Ieova? Afai tou te fouvale iā Ieova i le asō, e oo mai lava taeao lona toʻasā i le faapotopotoga atoa o Isaraelu.+
19 O lenei, afai e lē o mamā le laueleele o lo outou tofi, ia outou sopo atu i le laueleele o le tofi o Ieova+ lea o loo iai le faleʻie paia o Ieova,+ ma nonofo ai faatasi ma i matou; ae aua neʻi outou fouvale iā Ieova e ala i lo outou fausia o se fata faitaulaga, e faaopoopo atu i le fata faitaulaga a Ieova lo tatou Atua,+ ma matou aafia ai i la outou fouvalega.
20 Pe e leʻi oo mai ea le toʻasā o le Atua i le faapotopotoga uma o Isaraelu,+ ina ua lē faamaoni Akana+ le atalii o Sera i mea e tatau ona faaumatia? E lē na o ia na fano ai i le mea sesē na ia faia.’”+
21 Ona tali mai lea o le fanauga a Reupena, ma le fanauga a Kato, ma le ʻafa o le ituaiga o Manase, ma faapea mai i ulu o le faitau afe o Isaraelu:+
22 “O le Atua o atua, o Ieova!* O le Atua o atua, o Ieova!+ O loo silafia lava e ia, ma o le a iloa foʻi e Isaraelu. Afai ua matou fouvale ma lē faamaoni iā Ieova, aua neʻi faaolaina i matou i le asō.
23 Afai na matou fausia mo i matou se fata faitaulaga e liliuese ai mai i le mulimuli atu iā Ieova, ma ofoina atu ai taulaga mū, o taulaga i meaʻai,* ma taulaga faifaatasi, e faasalaina lava i matou e Ieova.+
24 Ae na matou faia lenei mea, auā na matou popole neʻi iai se aso e faapea mai ai a outou fanau i a matou fanau: ʻ“Pe e iai ea sa outou faiā ma Ieova le Atua o Isaraelu?
25 Ua tuuina e Ieova le vaitafe o Ioritana, e fai ma tuaoi i le vā o i matou ma outou le fanauga a Reupena, ma le fanauga a Kato. E tou te lē maua se tofi mai iā Ieova.” E mautinoa o le a taofia ai e a outou fanau a matou fanau mai i le tapua‘i* iā Ieova.’
26 “Ona matou faapea ane lea, ‘Ia tatou fausia se fata faitaulaga, e lē faia ai ni taulaga mū po o se isi taulaga,
27 ae e avea o se molimau i le vā o i matou ma outou,+ ma o tatou tupulaga e mulimuli mai, ina ia tatou faia ai le auaunaga i luma o Ieova e ala i a tatou taulaga mū, o isi taulaga, ma taulaga faifaatasi,+ ina neʻi iai se aso e faapea mai ai a outou fanau i a matou fanau: “E tou te lē maua se tofi mai iā Ieova.”’
28 Ona matou faapea ane lea, ‘Ina neʻi latou fai mai iā i tatou ma o tatou tupulaga e mulimuli mai, ona tatou fai atu lea: “Tagaʻi i le faatusa lenei o le fata faitaulaga a Ieova na faia e o matou tamā, e lē ina ia faia ai taulaga mū po o se isi taulaga, ae ina ia avea ma molimau i le vā o i matou ma outou.”’
29 E mamao iā i matou ona fouvale iā Ieova, ma liliuese i le aso nei mai i le mulimuli atu iā Ieova,+ e ala i le faia o se fata faitaulaga mo taulaga mū, o taulaga i meaʻai, ma isi taulaga, e ese mai i le fata faitaulaga a Ieova lo tatou Atua lea o loo i luma o lona faleʻie paia!”+
30 Ina ua faalogo Fineaso le ositaulaga, ma taʻitaʻi o le faapotopotoga, o ulu ia o le faitau afe o Isaraelu na faatasi ma ia, i upu na fai atu ai le fanauga a Reupena, o le fanauga a Kato, ma le fanauga a Manase, ona faamalieina ai lea o i latou.+
31 Ona fai atu lea o Fineaso le atalii o Eleasaro le ositaulaga i le fanauga a Reupena, o le fanauga a Kato, ma le fanauga a Manase: “Ua matou iloa i le aso nei o loo faatasi Ieova ma i tatou, auā ua outou lē faia lenei gaoioiga lē faamaoni iā Ieova. O lenei, ua outou laveaʻiina le fanauga a Isaraelu mai i le aao o Ieova.”
32 Ona toe foʻi lea o Fineaso le atalii o Eleasaro le ositaulaga ma taʻitaʻi, mai i le fanauga a Reupena, ma le fanauga a Kato i le nuu o Kiliata, ma ō atu i le nuu o Kanana ma taʻu atu le tala i isi o le fanauga a Isaraelu.
33 Ua lelei fo‘i lenei tala i le fanauga a Isaraelu; ma ua vivii atu le fanauga a Isaraelu i le Atua, e latou te leʻi toe talanoa foʻi e ō atu e siitaua i le fanauga a Reupena ma le fanauga a Kato, ma faaumatia le laueleele o loo latou nonofo ai.
34 Ona faaigoa lea e le fanauga a Reupena ma le fanauga a Kato o le fata faitaulaga,* auā “ua avea ma molimau iā i tatou e faapea o Ieova o le Atua moni ia.”
Faamatalaga Pito i Lalo
^ E faasino atu i le itu i sasaʻe.
^ Po o “O Lē e malosi, o Ieova le Atua.”
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
^ Epe., “matataʻu.”
^ Pe a fua i faamatalaga ua maua mai, e foliga mai na faaigoa le fata faitaulaga o Molimau.
